Tou Manatuʼi ʼAki He Loto Fakafetaʼi Ia Te Totogi ʼAē Neʼe Foaki e Sehova Pea Mo Sesu
1, 2. He koʼē ʼe tonu ke tou fakamanatuʼi ʼaki he loto fakafetaʼi ia te totogi ʼaē neʼe foaki e Sehova pea mo Sesu?
1 ʼI tanatou fakalogo ki te fakatotonu ʼa Sesu, ko te kau Kilisitiano ʼi te mālamanei kātoa ʼe natou fakatahitahi anai ʼi te Moeaki, ʼaho 22 ʼo Malesio 2008, ʼi te ʼosi tō ʼo te laʼā moʼo fakamanatu ia te mate ʼo Sesu Kilisito. (Luka 22:19; 1 Ko. 11:23-26) ʼE tou fia fai ia te faʼahi ʼaia ʼuhi ko totatou loto fakafetaʼi kiā meʼa fuli ʼaē neʼe fakahoko ʼi te ʼaho ʼaia kua hili nei kiai taʼu e 1 975. ʼI tana taupau tana agatonu ʼi te temi ʼaē neʼe gaohi koviʼi ai pea mo matehi ʼi te pou fakamamahi, neʼe fakatapuhā e Sesu ia te huafa ʼo tana Tamai, ʼo ina foaki ai ia te tali kātoa ki te ʼu fasituʼu ʼaē neʼe fai e Satana.—Sopo 1:11; Taag. 27:11.
2 Ko te taʼataʼa ʼo Sesu neʼe ina fakamoʼoni ia te fuakava foʼou, ʼo fakafealagia ai ki te hahaʼi agahala ke natou liliu ko he ʼu foha ʼo te ʼAtua ʼaki te ʼamanaki ʼaē ke natou kaugā hau mo Kilisito ʼi te Puleʼaga ʼi selō. (Sel. 31:31-34; Mko. 14:24) Tahi ʼaē meʼa, neʼe hā lelei ia te ʼofa lahi ʼo te ʼAtua ki te mālamanei ʼi tana foaki ia tona ʼAlo ʼofaina ko he sākilifisio, ohagē ko tona fakamahino e Sesu totonu kiā Nikotemo.—Soa. 3:16.
3. ʼE fua lelei feafeaʼi anai kiā nātou ʼaē kā ʼomai ki te ʼAho Fakamanatu?
3 Kotou Fakaafe Ia Te Hahaʼi: ʼI Te Minisitelio ʼo Te Puleʼaga ʼo Sānualio neʼe fai mai ai te tokoni ʼaē, ke tou fai he lisi ʼo totatou ʼu feʼilo pea mo tou fakaafe ia nātou takitokotahi. Neʼe kua kotou kamata fakaafe koa ia nātou ʼaē neʼe kotou tohi ʼi takotou lisi? Kua kotou fai koa he ʼu fakatuʼutuʼu ke kotou kau lahi ki te tufa makehe ʼaē kā kamata anai ʼi te ʼuluaki ʼaho ʼo Malesio moʼo fakaafe ia te hahaʼi ki te ʼAho Fakamanatu? Ko nātou ʼaē kā ʼomai anai ʼo fakalogo, ʼe natou maʼu ai anai he ʼu manatu Fakatohi-tapu ke fakamālohiʼi ai tanatou tui ki te totogi, ʼaē ʼe feala ai ke maʼu ia te maʼuli heʼegata.—Loma 10:17.
4. He koʼē ʼe tonu ke tou ʼomai fakatomuʼa ki te ʼAho Fakamanatu?
4 Ko nātou fuli ʼaē ʼe feala, ʼe tonu ke natou fakatuʼutuʼu ke natou ʼomai fakatomuʼa moʼo fai he fakatalitali ʼe lelei kiā nātou ʼaē kā ʼomai anai ki te fakaafe makehe ʼaia. ʼUhi heʼe hahaʼi anai te nofoʼaki ʼi te ʼAho Fakamanatu, ʼe maʼuhiga ke tou tōkakaga tāfito ki te hahaʼi foʼou ʼo fēia mo nātou ʼaē ʼe mole ʼomai putuputu ki te ʼu fono.
5. ʼE kotou lava teuteuʼi feafeaʼi tokotou loto ki te toʼotoʼoga ʼaia?
5 Kotou Teuteu Tokotou Loto: ʼI te kiʼi kaupepa Tou Vakaʼi Ia Te Tohi-Tapu ʼi Te ʼAho Fuli—2008 pea mo te kaletalio ʼo te taʼu 2008, ʼe maʼu ai te polokalama ʼo ʼuhiga mo te lau ʼo te Tohi-Tapu ki te ʼAho Fakamanatu, pea ʼe kamata ʼi te ʼaho 17 ʼo Malesio. Ko takotou vakaʼi ia te ʼu meʼa maʼuhiga ʼaē neʼe hoko ʼi te ʼu ʼaho fakaʼosi ʼo te maʼuli ʼaē ʼo Sesu ʼi te kele, ʼe tokoni atu anai ke kotou teuteuʼi tokotou loto ki te ʼAho Fakamanatu ʼo te mate ʼo Sesu. (Esita. 7:10) Ko te faikole pea mo te metitāsioʼi ʼo te ʼu fakamatala Fakatohi-tapu ʼaia, ʼe fakatuputupu ai anai ia tatatou loto fakafetaʼi ʼaē ki te ʼofa ʼo Sehova pea mo tona ʼAlo, ʼi tanā foaki ia te totogi.—Pes. 143:5.
6. ʼE fua lelei feafeaʼi anai kiā tātou te fakatuputupu ʼo totatou loto fakafetaʼi ki te totogi ʼaē neʼe foaki e Sehova pea mo Sesu?
6 ʼI te fakaovi mai ʼo te ʼAho Fakamanatu, tou teuteu fakalelei totatou loto pea mo tou tokoni ki niʼihi ke natou teuteuʼi mo ʼonatou loto ki te toʼotoʼoga maʼuhiga ʼaia. ʼI tatatou manatuʼi ʼaki he loto fakafetaʼi ia te totogi ʼaē neʼe foaki e Sehova pea mo Sesu, ʼe mālohi ai anai tatatou ʼu felōgoi ʼaē mo nāua. (2 Ko. 5:14, 15) ʼE toe uga ai anai mo tātou ke tou mulimuli ki tanā faʼifaʼitaki, ʼo tou fakahā he ʼofa fakasākilifisio ki te hahaʼi.—1 Soa. 4:11.