Tou ‘Fai Ia He Fagonogono ʼe Kātoa’ ʼi Tatatou Fai Fagonogono ʼi Te ʼu Falefata
1. Ko te faʼahi fea ʼaē ʼe kau ki te “fai ʼo he fagonogono ʼe kātoa ʼo ʼuhiga mo te logo lelei”?
1 Ohagē ko te ʼapositolo ko Paulo, ʼe tou fia “fai [ia] he fagonogono ʼe kātoa ʼo ʼuhiga mo te logo lelei.” (Gāue 20:24) Koia, ʼe tou faiga ai ke tou fakaaʼu ia te logo lelei ʼo te Puleʼaga ki te hahaʼi tokolahi ʼo totatou telituale. ʼE kau kiai te hahaʼi tokolahi ʼaē ʼe nonofo ʼi te ʼu falefata. ʼI ʼihi temi, ʼe lagi faigataʼa hatatou kaku kiā nātou ʼaē ʼe nonofo ʼi te ʼu taʼi falefata ʼaia. Kae ʼuhi ʼaē ʼe kaugamālie te hahaʼi ʼaē ʼe nonofo ai, ʼe ko he ʼu faigamālie ʼaupitō ʼaia kiā tātou ke tou fakamafola ia te logo lelei.
2. He koʼē ʼe maʼuhiga ia te fakaʼeteʼete pea mo te fakasiosio tonu ʼi te fai fagonogono ʼaē ʼi te ʼu falefata?
2 ʼUhi ko te ʼu fai fakapō pea mo te ʼu agamālohi, kua lahi ia te ʼu falefata kua lokaʼi pea kua leʼo e he tahi peʼe kua fakatuʼu ai ni ʼu meʼa fai pāki. (2 Tim. 3:1, 2) ʼE lagi ʼi te ʼu falefata ʼaia kua fai ia he fakatuʼutuʼu ke mole tali ke hū ia nātou ʼaē ʼe mole fakagafua ki ai. Ko he tagata leʼo ʼe ina ʼui mai anai ke tou mavae ʼi te falefata, tāfito lā mo kapau ko he tahi ʼi te ʼu nofoʼaga ʼaia ʼe muna. Koia, ʼe maʼuhiga ai ke tou aga fakaʼeteʼete pea mo tou maʼu ia he fakasiosio tonu.
3. Ko te temi fea ʼaē ʼe lelei ai ke tou fai fagonogono ʼi te ʼu falefata, pea koteā tona tupuʼaga?
3 Te Temi ʼAē ʼe Tonu Ke Fai Fagonogono Ai: Ohagē pē ko ʼihi telituale, ʼe lelei age hatatou fai fakamafola ʼi te ʼu falefata mokā ʼe nonofo te hahaʼi iō nātou. ʼE feala ki te hahaʼi ke natou loto mahalohalo mo kapau ʼe tou feʼoloʼaki ʼi he falefata kae lāvaki. Tokolahi ia te kau fai fakamafola neʼe natou maʼu atu te hahaʼi kiō nātou ʼi te afiafi, ʼo fēia mo te ʼu hili hoʼatā ʼo te Moeaki pea mo te ʼAhotapu. Kā tou fai fagonogono ʼi te ʼu falefata kae kei māfoatā, tāfito lā ʼi te ʼu fakaʼosi vāhaʼa, ʼe lagi mole leleiʼia anai e te hahaʼi.
4, 5. ʼE feafeaʼi hatatou lava hū ki he ʼu falefata ʼe lokaʼi?
4 Kā Fakagafua Ke Tou Hū Ki Loto: ʼE mole tonu anai ki te kau fai fakamafola ke natou felōgoi mo te pule ʼo te falefata peʼe ko he tahi ʼe gāue ai ʼi muʼa ʼo hanatou fai tanatou minisitelio. Kapau ko te falefata ʼe lokaʼi ʼe ʼi ai hona telefoni ʼi te hūʼaga, pea ʼe feala ke tou fakaʼaogaʼi moʼo kumi he tahi ʼe ina tali anai ke tou fai palalau mo ia. ʼE tahi ʼalu pē ia te falefata, ʼe lagi feala ke tou fai fakamafola ki te tahi age ʼu kogafale ʼo te falefata, mokā kua tou ʼosi palalau mo he tahi neʼe ina fakagafua mai ke tou hū ki loto. Kae ʼi ʼihi age ʼaluʼaga, ʼe lagi lelei age anai ke tou mavae ʼi te falefata pea ke tou fakaʼaogaʼi te telefoni ʼaē ʼi te hūʼaga moʼo palalau ki he tahi age. ʼE tonu anai ke tou maʼu ia te fakasiosio tonu moʼo vakavakaʼi peʼe ko te toko fia ʼaē kā tou telefoni anai ki ai ʼi te temi ʼaia.
5 Ko ʼihi ʼe lagi natou loto anai ke kotou fakahā age te tupuʼaga ʼo takotou fia palalau ʼaē mo nātou ʼi te telefoni ʼi te hūʼaga ʼo tonatou falefata. Kapau ʼe hoko he ʼaluʼaga fēia, pea kotou fai ia he fakaʼalofa fakaʼapaʼapa. Kotou toʼo tona higoa mo kapau ʼe tuʼu ʼi te lisi ʼo te telefoni. Kotou fakahā fakanounou age ia te kupu tāfito ʼo te faʼahi ʼaē ʼe kotou fia palalau mo ia. Ko ʼihi neʼe natou maʼu ia he ʼu fua lelei ʼaki tanatou lau fakahagatonu ia he ʼu ʼuluaki palalau ʼi te tohi Comment raisonner.
6. Koteā ʼaē ʼe tonu anai ke tou fai mokā tou fai fagonogono ʼi he ʼu falefata ʼe ʼi ai hona tagata leʼo?
6 Kapau ʼi te falefata ʼe ʼi ai hona tagata leʼo ʼi te hūʼaga kae ʼe mole ina tali ke tou hū ʼo fai fagonogono ʼi loto, ʼe tou faiga anai ke tou fai fagonogono age ki ai. Tokolahi te hahaʼi leʼo ʼe natou fia lau ia tatatou ʼu tohi. ʼE lagi feala pē foki ke tou kamata ia he ʼu ako Tohi-Tapu pea mo fai te ako ʼaia ʼi te hūʼaga. Kapau ko te tagata leʼo ʼe ina fakagafua mai ke tou ʼaʼahi he tahi ʼi te falefata neʼe ina tali ia te logo lelei, pea ʼe lagi lelei anai ke ʼaua naʼa tou fakaʼaogaʼi ia te faigamālie ʼaia moʼo fisifisi ʼi he tahi age ʼu matapā ʼo te falefata.
7. Koteā ʼaē ʼe tonu ke tou manatuʼi ʼo ʼuhiga mo tatatou kato fai fakamafola?
7 ʼE Maʼuhiga Ia Te Faʼahiga Faiteuteu Pea Mo Te Aga: Kapau ʼe tou ʼamo ni ʼu kato lalahi, ʼe feala ke fakatupu mahalohalo. Koia ʼaē, ʼe lagi lelei age ke tou fakaʼaogaʼi he kihiʼi kato peʼe mole tou toʼo he kato. Ko ʼihi kau fai fakamafola ʼe natou ʼai tanatou ʼu tohi ki he kalasea pea mo natou toʼotoʼo pē tanatou Tohi-Tapu peʼe natou ʼai ʼi tonatou tagaʼi vāvaʼe peʼe ʼi tonatou tagaʼi kofu.
8. ʼE tonu ke fakatuʼutuʼu feafeaʼi ia te kūtuga ʼaē ʼe fai fagonogono ʼi he falefata?
8 ʼE mole lelei ke tou fakapupu fau, tāfito lā ʼi te ʼu hūʼaga ʼo te ʼu falefata peʼe ʼi te ʼu tauʼaga motokā, heʼe feala ai anai ke tokagaʼi fau tātou. ʼE tonu ke tou tōkakaga mokā tou fai fakamafola ʼi te ʼu falefata ʼo te ʼu kolo ʼaē ʼe lahi ai ia te ʼu fai fakapō. (Taag. 22:3) Ohagē lā, ko he ʼu kaugā fai fakamafola e toko lua peʼe toko tolu ʼe lagi natou gāue fakatahi anai ʼi he laufata ke faigafua hanatou fesioʼaki, ʼo lagi natou fesuisuiʼaki ʼi te fai ʼo te ʼu matapā kae fakatalitali ʼihi.
9. ʼE tou fakahā feafeaʼi tatatou aga fakaʼapaʼapa, pea he koʼē ʼe maʼuhiga ia te faʼahi ʼaia?
9 Kā kotou hū ki he falefata, holoholoʼi fakalelei tokotou ʼu sūlie pea mo māpunuʼi fakalelei te matapā ʼo te hūʼaga. ʼI tatatou aga fakaʼapaʼapa ʼaia, ʼe mole ʼiʼita ai anai ia te hahaʼi ʼo te ʼu nofoʼaga ʼaia. Kapau kua kotou hū ki loto, kotou foimo fakatuʼutuʼu ke kotou fehūfi ki te foʼi kato hila peʼe kotou ʼolo ki te laufata ʼaē ʼe tonu ke kotou fai fagonogono ai, kae ʼaua takotou fakapupu ʼi te hūʼaga. Ko takotou fai fēia, ʼe mole fakatupu mahalohalo anai ki te hahaʼi.
10. Koteā ʼaē ʼe tou lava fai ke ʼaua naʼa tou logoaʼa fau ʼi te ʼu hūʼaga?
10 ʼE lahi ia te ʼu falefata, ʼe logoʼi ʼi te ʼu laufata ia te logoaʼa ʼaē ʼi te ʼu hūʼaga. Koia, ʼaua naʼa kotou palalau leʼo lahi fau, kae ke feʼauga pē ia tokotou leʼo ke feala he logo atu ia ia ʼaē ʼe kotou fai palalau mo ia. Kā kotou palalau ki he tahi ʼu kaugā fai fakamafola, kotou tōkakaga ʼo palalau māmālie, kae ke fakatokatoka ia tokotou leʼo pea mo fakaʼapaʼapa ke ʼaua naʼa fakatupu mahalohalo. Ke ʼaua naʼa hohaʼa fau ki te hahaʼi ʼaē ʼe nonofo ai, ko ʼihi kaugā fai fakamafola ʼe natou kamata he matapā mai te potu taupotu ʼo te laufata, ʼosi pea natou hiki ʼo fisifisi he tahi matapā ʼi te tahi potu taupotu ʼo te laufata pē ʼaia ʼaē ʼe natou gāueʼi, kae mole natou fisifisi fakahoholo ia te ʼu matapā fuli ʼo te laufata. Tahi ʼaē, kā fisifisi fakamālohi he matapā peʼe fakaʼitaʼita, ʼe lagi mātataku anai te hahaʼi ʼaē ʼe nonofo ʼi loto.
11. Koteā te ʼu tokoni ʼe feala ke ʼaoga kiā tātou mokā tou fisifisi ki he matapā ʼe ʼi ai he kiʼi pū?
11 Kapau ʼe ʼi ai he kiʼi pū ʼi te muʼa matapā, pea kotou tutuʼu fakalelei ʼi muʼa ke feala ki ʼaē ʼi loto ke sio lelei mai kiā koutou mo ia ʼaē ʼe kaugā gāue mo koutou. Kotou sio fakalelei ki te kiʼi pū, pea kā kotou fakatokagaʼi ʼe fakasiosio mai he tahi, pea kotou fai he kiʼi fakamālo pea mo kamata atu takotou fai palalau. Kapau ʼe fehuʼi mai: ‘Ko ai?’ ʼE lagi lelei ke kotou fakahā age ia tokotou higoa pea mo ia ʼaē ʼe fai gāue mo koutou. ʼE feala ai anai hana lotolelei ʼo ʼavahi mai ia tona matapā. Kapau ʼe mole hoko te faʼahi ʼaia, pea ʼe lagi feala pē hakotou fai fakamafola age ʼi te muʼa matapā.
12. Koteā ʼaē ʼe tou lava fai ke ʼaua naʼa hoko he ʼu fihifihia mokā tou tuku he tohi ʼi he ʼu muʼa matapā ʼo he ʼu ʼapi ʼe lāvaki?
12 Kapau ʼe Lāvaki: ʼE tautau muna te ʼu pule ʼo te ʼu falefata, heʼe tonu ke natou tae ia te ʼu tohi mai te ʼu hūʼaga peʼe ʼi te ʼu tafaʼaki ʼo te falefata. Ko te ʼu tohi ʼaē ʼe tuku ʼi te ʼu muʼa matapā, ʼe feala pē ke leta haʼele ʼi te laufata pea mo fakaʼotaʼota. Koia ʼaē, ko he tohi pē ʼe tuku ʼi he muʼa matapā ʼo he ʼapi ʼe lāvaki, ʼe tonu ke tou tuku ʼi he faʼahi ʼe mole fakatokagaʼi anai e te hahaʼi ʼaē ʼe fakalaka ai.
13. Koteā ʼaē ʼe tonu ke tou fai mo kapau ʼe tou felāveʼi mo he tahi ʼe ʼitaʼita?
13 Kā ʼIʼita Te Hahaʼi: Kapau ʼe tou felāveʼi mo he tahi ʼe ʼitaʼita pea mo ina fia pāui ia te pule ʼo te falefata, ʼe lagi lelei age hatatou mavae ʼi te laufata, hoki tou toe liliu kiai ʼi he tahi age temi. ʼI ʼihi ʼaluʼaga, ʼe lagi lelei age hatatou mavae ʼi te falefata ke ʼaua naʼa hoko he fihi mo te tagata pule ʼo te falefata. Tatau aipē pe neʼe mole ina ʼui mai fakahagatonu ke ʼaua naʼa tou toe liliu age, kae ʼe lagi lelei age hatatou tohi ia te nūmelo ʼo te kogafale ʼaia ke mole toe ʼaʼahi pea mo ʼai ia te pepa ʼaia ʼi te mape ʼo te telituale. Ohagē pē ko ʼihi ʼapi ʼe mole kei ʼaʼahi, ko te ʼu tuʼasila ʼaia ʼe tonu anai ke fai vahavaha moʼo vakavakaʼi ai te meʼa ʼaē ʼe loto kiai ia te hahaʼi ʼo te ʼu ʼapi ʼaia.
14, 15. Koteā ʼaē ʼe tonu ke tou fai mo kapau ʼe kole mai e he tagata gāue ʼo te falefata ke tou mavae?
14 Kapau ʼe Kole Atu Ke Kotou Mavae: Kapau ʼi takotou lolotoga fai fagonogono, ʼe kole atu e te pule ʼo te falefata, peʼe ko te kau leʼo, peʼe ko te kau gāue ʼo te falefata, peʼe ko ʼihi ʼi te kau gāue, ke kotou mavae, ʼe fakapotopoto anai hakotou foimo fakalogo ki te fakatotonu ʼaia. ʼI te temi fuli pē, ʼe mole tou fia fihi, heʼe tupu ai anai he ʼu fihifihia mo te ʼu lao fakatagata pea mo te kau polisi. ʼI te agamāhani, ko te kau gāue ʼo te falefata ʼe mole ʼi ai hanatou ʼu manatu kovi ʼo ʼuhiga mo te kau Fakamoʼoni ʼa Sehova, kae ʼe natou fai pē ia tanatou gāue.
15 ʼI ʼihi temi, kā kole atu e he tagata gāue ke kotou mavae, ʼe feala hakotou fakamahino fakalelei age ia te tupuʼaga ʼo takotou ʼaʼahi. (1 Pet. 3:15) ʼE tou mahino ki tana loto ʼaē ke mole ʼiʼita te hahaʼi ʼaē ʼe nonofo ʼi te falefata pea mo tana fia taupau ʼaē te tokalelei ʼi te falefata. ʼE lagi feala anai ke ina fakagafua atu ke kotou nonofo ʼi te falefata. Kae kapau ʼe kole atu ke kotou mavae, pea ʼe kotou fakalogo anai ki tana kole. Kapau ko he faʼahi ʼe fakagafua atu, ʼe lagi kotou kole age anai peʼe kotou lava tuku ʼi ʼihi temi ʼi te hūʼaga peʼe ʼi te fale fō ia he ʼu tohi. (Kol. 4:6) ʼE tonu anai ke ʼiloʼi e te tehina ʼo te gāue ia te ʼu meʼa ʼaia neʼe hoko.
16. Koteā ʼaē ʼe tonu ke tou fai mo kapau ʼe hoholo atu te ʼu fihifihia mokā tou faiga ke tou fai fagonogono ʼi he falefata?
16 Kā kua hili kiai he temi feʼauga, pea ʼe lagi feala ke toe liliu ia te kau fai fakamafola ʼo fai fagonogono fakaʼeteʼete ʼi te falefata. Kae, kapau ʼe hoholo atu pē te fihifihia, ʼe tonu anai ki te kau tagata ʼāfea ke natou kumi tokoni ki te filiale, kae ʼaua naʼa faiga ia te kau fai fakamafola ke natou maʼu e nātou totonu ia he puleʼaki moʼo fakatokatoka ia te fihifihia ʼaia. Kapau ʼe mole lava gāueʼi e te kau fai fakamafola ia te ʼu falefata, pea ʼe fai anai he tahi age ʼu fakatuʼutuʼu ke feala hanatou fai palalau mo te hahaʼi, ohagē lā ke natou fakaʼaogaʼi ia te fai fagonogono ʼi te telefoni peʼe ʼi te faitohi. Ko ʼihi kau fai fakamafola ʼe natou fai fagonogono ʼi te ʼu ala ʼi muʼa ʼo te falefata peʼe ʼi tona ʼu tafaʼaki, ʼi te ʼuhu pea mo te afiafi, ʼi te ʼu temi ʼaē ʼe ʼolo ai te hahaʼi ki ʼanatou gāue pea mo te ʼu temi ʼaē ʼe natou toe liliu mai kiō nātou.
17. He koʼē ʼe maʼuhiga ia te fai fagonogono ʼi te ʼu falefata?
17 Kua vave hoko mai ia te fakaʼosi ʼo te tuʼu ʼo te ʼu faʼahiga meʼa ʼaenī. ʼE gata pē kiā nātou ʼaē ʼe fetapa ki te huafa ʼo Sehova ʼe haofaki anai. “Kae ʼe natou fetapa feafeaʼi anai kiā ia ʼaē ʼe mole natou tui ki ai? Pea ʼe natou tui feafeaʼi anai kiā ia ʼaē ʼe mole heʼeki natou logo ki ai?” (Loma 10:13, 14) Tokolahi ia nātou ʼaē ʼe natou “lotolelei ki te maʼuli heʼegata,” ʼe natou nonofo ʼi te ʼu falefata. (Gāue 13:48) ʼAki tatatou aga fakaʼeteʼete pea mo fakahā ia he fakasiosio tonu, ʼe tou lava fakaaʼu ia te logo lelei kiā nātou.