Kotea ʼAe Ka Fakahoko e Te Puleʼaga ʼo Te ʼAtua?

TE ʼU GAUE KUA FAKAHOKO E TE PULEʼAGA ʼO TE ʼATUA

ʼI te alatike ki muʼa atu, neʼe fakahaha ai te fakailoga ʼae neʼe fakakikite e Sesu. Pea ko te fakailoga ʼaia ʼe ko he fakamoʼoni kua fakatuʼu te Puleʼaga ʼo te ʼAtua ʼi selo pea ko Sesu Kilisito ʼae ʼe Hau ai.

ʼE ui ʼi te Tohi-Tapu neʼe li ifo e Sesu ia Satana mo tana kau temonio ʼi te temi leva ʼae neʼe Hau ai. Pea talu mai tonatou li ifo ʼaia, ʼe mole kei feala hanatou olo ki te lagi, kua natou fakaheʼi pe te kele katoa. Ko he tahi tupuʼaga ʼaia ʼo te kua ʼaʼasili kovi ʼo te ʼu aluʼaga ʼae ʼe hoko talu mai te taʼu 1914.—Fakaha 12:7, 9.

Logo la te ʼaʼasili kovi ʼo te ʼu aluʼaga ʼi te malamanei, kae ʼe tokaga pe ia Sesu ki te hahaʼi ʼi tona ʼuhiga Hau ʼo te Puleʼaga ʼo te ʼAtua. Tokolahi ʼe natou iloʼi te ʼu pelesepeto ʼo te Tohi-Tapu pea mo maʼuliʼi. ʼE natou iloʼi te faʼahi ʼaia ʼuhi ko te gaue faifakamafola ʼe fai ʼi te malamanei katoa, ohage pe ko tona fakakikite e Sesu. (Esaia 2:2-4) Neʼe ako ai e te tokolahi he maʼuli fakafamili fiafia pea ke mole natou fakamuʼamuʼa ʼi tonatou maʼuli te ʼu gaue fakamalama peʼe ko te ʼu koloa. Kua natou fiafia ʼi te temi nei. Pea ʼe fia fai ia Sehova ʼi te faʼahiga hahaʼi ʼaia ke liliu ko he hahaʼi fakalogo ʼo tona Puleʼaga.

TE ʼU GAUE KA FAKAHOKO ANAI E TE PULEʼAGA ʼO TE ʼATUA

Logo la te kua pule ʼa Sesu ʼi selo, kae kei pule pe te tagata ʼi te kele. Kae neʼe ui fenei e te ʼAtua kia Sesu: “Ke ke pule i lotomalie o ou fili!” (Pesalemo 110:2) ʼEi, kua vave pulihi e Sesu ia natou fuli ʼae ʼe fakafeagai ki te Puleʼaga. Pea ʼe maʼuli fimalie anai te hahaʼi ʼae ʼe fakalogo ki te ʼAtua.

Koʼeni te ʼu gaue kua vave fakahoko e te Puleʼaga ʼo te ʼAtua:

• ʼE ina pulihi anai te ʼu lotu hala fuli. ʼE fakata ʼi te Tohi-Tapu ia te ʼu lotu hala ki he fafine paomutu. Ko te fafine paomutu ʼaia kua vave fakaʼauha pe. ʼE pulihi anai te ʼu lotu ʼae neʼe natou akoʼi ki te hahaʼi ni loi ʼo ʼuhiga mo te ʼAtua pea neʼe natou fakamamahiʼi te hahaʼi. ʼE punamaʼuli anai te hahaʼi moka hoko te aluʼaga ʼaia.—Fakaha 17:15, 16.

• ʼE ina fakagata anai te pule ʼa te tagata. ʼE pulihi anai e te Puleʼaga ʼo te ʼAtua te ʼu puleʼaga fakatagata fuli.—Fakaha 19:15, 17, 18.

• ʼE ina pulihi anai te hahaʼi agakovi. Kotea ʼe hoko kia natou ʼae ʼe natou fai te meʼa ʼae ʼe kovi pea ʼe mole natou fia fakalogo ki te ʼAtua? “E taaki anai te kau agakovi mai [te kele, MN].”—Taaga Lea 2:22.

• ʼE ina pulihi anai ia Satana mo te kau temonio. ‘ ʼE mole toe fakaheʼi anai e Satana mo te kau temonio ia te ʼu puleʼaga.’—Fakaha 20:3, 10.

ʼE feafeaʼi anai te maʼuli ʼo natou ʼae ʼe fakalogo ki te Puleʼaga ʼo te ʼAtua?

TE ʼU GAUE KA FAKAHOKO E TE PULEʼAGA ʼO TE ʼATUA MAʼA TE MALAMANEI

ʼE pule ia Sesu mai te lagi, pea ʼe lahi anai te ʼu gaue ka ina fakahoko kae neʼe mole feala ke fai e he pule fakatagata. Pea ʼe tokoni anai ki ai te toko 144 000 neʼe filifili mai te kele. (Fakaha 5:9, 10; 14:1, 3) Pea ʼe natou fakahoko anai te finegalo ʼo te ʼAtua ʼi te kele. Kotea ia te ʼu tapuakina ka foaki anai e te Puleʼaga ʼo te ʼAtua maʼa te hahaʼi ʼo te kele?

• ʼE ina pulihi anai te mahaki mo te mate. “E mole ui e he tahi: E au mahaki” pea “ ʼe mole toe ʼi ai anai te mate.”—Esaia 33:24; Fakaha 21:4.

• ʼE ina foaki anai te tokalelei mo te fimalie moʼoni. “E lahi anai te manuia o ou foha” pea ‘ ʼe natou tahi nofo anai ʼi tona lalo fuʼu vite pea mo tona lalo fuʼu fiku, pea ʼe mole toe fakamatakuʼi anai natou e he tahi.’—Esaia 54:13; Mikea 4:4.

• ʼE ina foaki anai ki te tagata he gaue ʼe fiafia ai. “E fiafia anai aku kau filifiliia i te gaueaga o onatou nima. E mole natou gaue anai ki te noa.”—Esaia 65:22, 23.

• ʼE ina fakatokatoka anai te ʼu fihifihia ʼo te malamanei. “E fiafia anai te toafa mo te fenua kakaha; e fiafia anai te fenua lavaki, pea e matala anai ia ia o hage ko he nalesise.”—Esaia 35:1.

• ʼE ina akoʼi anai ki te hahaʼi te ʼu faʼahi ʼae ʼe tonu ke natou fai ke natou maʼuli ai ʼo heʼe gata. “Koʼeni ia te fakaʼuhiga ʼo te maʼuli heʼe gata, ke natou ako ke natou iloʼi ia koe, te ʼAtua moʼoni pe ʼe tahi pea mo ia ʼae neʼe ke fekauʼi mai, ia Sesu Kilisito.”—Soane 17:3.

ʼE loto e te ʼAtua ke ke maʼu te ʼu tapuakina ʼaia. (Esaia 48:18) ʼE fakamahino ʼi te alatike ʼae ka hoa mai te ʼu faʼahi ʼe feala ke ke fai ʼi te temi nei ke ke iloʼi ai te ka haʼu taulekaleka ʼaia.