“Kotou Haga Nonofo ʼi Te ʼOfa ʼo Te ʼAtua”
1. He koʼē neʼe tā ia te tohi “Kotou Haga Nonofo ʼi Te ʼOfa ʼo Te ʼAtua”?
1 Kua tou fakaʼamu lā ke tou ako ia te tohi foʼou “Kotou Haga Nonofo ʼi Te ʼOfa ʼo Te ʼAtua” ʼi te Ako Tohi-Tapu ʼo Te Kōkelekāsio ʼaē kā kamata anai ʼi te vāhaʼa ʼo te ʼaho 23 ʼo Fepualio! Ko te polokalama ʼo te ako tohi ʼo te tohi Te Fakahā ʼe fakagata leva anai ʼi te temi ʼaia. Ko te tohi ʼaē neʼe fai e te Kolesi Pule kiā nātou fuli ʼaē ʼe ʼoʼofa kiā Sehova, ʼe fakaʼosi ʼaki te ʼu palalau ʼaenī: “ ʼE matou fakaʼamu moʼoni ke tokoni atu ia te tohi ʼaenī ke kotou haga maʼuliʼi ia te moʼoni pea mo feala ai ke kotou nonofo ‘ ʼi te ʼofa ʼo te ʼAtua . . . ki te maʼuli heʼegata.’—Suta 21.”
2. Ko te ʼu ʼaluʼaga fea ʼo totatou maʼuli ʼe tokoni mai anai kiā tātou ia te tohi foʼou ʼaia?
2 Fakakaukauʼi Fakatomuʼa: ʼE ʼaoga feafeaʼi ia te ʼu pelesepeto Fakatohi-tapu ki te ʼu ʼaluʼaga ohagē lā ko te fakakaugā, te ʼu fakafiafia, te fakaʼapaʼapa ki te puleʼaga, te ʼu agamāhani takitokotahi, te ʼohoana, te ʼu fai palalau, pea mo te ʼu agaʼi fenua? ʼE akoʼi anai totatou leʼo ʼo loto ʼo mulimuli pē ki te ʼu lēkula māʼoluga faitotonu ʼaē ʼe tuʼu ʼi te Folafola ʼa te ʼAtua. (Pes. 19:7, 8) ʼAki te tuputupu ʼo tatatou mahino ʼaē ki te ʼu faʼahiga manatu ʼa Sehova, ʼe tou lotomālohi anai ke tou fakafiafiaʼi ia tona loto, pea ko he faʼahi ʼe ina uga anai tātou ke tou fakalogo kiā te ia ʼi te ʼu faʼahi fuli ʼo totatou maʼuli.—Taag. 27:11; 1 Soa. 5:3.
3. He koʼē ʼe tonu ke tou faiga mālohi ʼo fai hatatou ʼu tali ʼi te ʼu ako Tohi-Tapu ʼaē ʼe tou fai ʼi te vāhaʼa fuli?
3 Kotou Fakatuʼutuʼu Ke Kotou Fai Hakotou ʼu Tali: ʼI te temi ʼaē ʼe kotou teuteuʼi ai takotou ako Tohi-Tapu, kotou fakatuʼutuʼu ke kotou fakavikiviki ki te ʼAtua ʼi te lotolotoiga ʼo tana hahaʼi. (Hep. 13:15) Ko te ʼu kōkelekāsio fuli ʼe natou ako anai pea mo fai palalau fakatahi ki te tohi foʼou ʼaia. ʼI te mole lahi fau ʼo he ʼu palakalafe ke teuteuʼi, ʼe feala ai ke tou loto falala ʼo vaevae mo ʼihi ia te ʼu manatu ʼaē neʼe tou ako. ʼAki tatatou ʼu tali ʼaē neʼe tou teuteuʼi lelei pea mo totonu, ʼe uga ai anai niʼihi ki te ʼofa pea mo he ʼu gāue lelei, pea ʼe foaki ai anai he ʼu fai palalau fakafiafia pea mo ʼaoga ʼo ʼuhiga mo te ʼu palakalafe ʼaē ʼe vakaʼi. (Hep. 10:24) Pea tahi, ʼe lahi anai ia totatou fiafia mokā tou fai takitokotahi ia hatatou ʼu tali ʼo ʼuhiga mo tatatou tui.
4. He koʼē ʼe tonu ke tou fakalogo ki te ʼu fakatotonu ʼa Sehova?
4 ʼI te pō fakaʼosi ʼo tona maʼuli ʼaē ʼi te kele ʼi tona ʼuhigaʼi tagata, neʼe fakamahino e Sesu ia te maʼuhiga ʼaē ke tou fakalogo ki te ʼu fakatotonu ʼa Sehova, ke feala ai hatatou haga nonofo ʼi te ʼofa ʼo te ʼAtua. (Soa. 15:10) ʼAki te tokoni ʼa te tohi “Te ʼOfa ʼo Te ʼAtua,” ʼe tou fakatotonu mālohi ai anai, ke tou maʼuliʼi ia te ʼu pelesepeto Fakatohi-tapu ʼi te ʼaho fuli pea mo tou ‘haga nonofo aipē ʼi te ʼofa ʼo te ʼAtua.’—Suta 21.