Ke Mahino Gafua Tatatou Faiako
1. Ke lelei pea mo ʼaoga he faiako, koteā ʼaē ʼe maʼuhiga?
1 ʼE maʼuhiga ʼaupitō ke faigafua tatatou faiako, ke mahino lelei ia te hahaʼi ki te ʼu puani ʼaē ʼe tou akoʼi age kiā nātou. Tou vakaʼi age muʼa ia te faʼahiga faiako ʼaē ʼa te Tagata Faiako Lahi ko Sesu, heʼe tokoni mai anai ke hikihiki ai tatatou ‘popoto ʼaē ʼi te faiako.’—2 Tim. 4:2; Soa. 13:13.
2. Koteā ʼaē ʼe fakamaʼua kiai mokā ʼe mahino gafua takita faiako, pea ʼe malave feafeaʼi te taʼi faiakonaki ʼaia?
2 Ke Faigafua Tatatou ʼu Palalau: ʼI te Akonaki ʼi te Moʼuga, ʼe lahi ia te ʼu moʼoni maʼuhiga ʼaē neʼe heʼeki talanoa kiai he tagata, kae neʼe feala pē ki te hahaʼi ke natou mahino gafua ki te ʼu moʼoni fuli ʼaia. (Mat., kāpite 5-7) Ko te hahaʼi tokolahi ʼaē neʼe lolotoga fakalogo kiā Sesu neʼe natou ‘ōfo ʼi tana taʼi faʼahiga faiakonaki.’ Ko te ʼu ofisie ʼaē neʼe fekauʼi ke ʼolo ʼo puke ia Sesu, ʼi te lahi ʼaupitō ʼo tanatou ʼofolele, neʼe natou ʼui fēnei: “ ʼE mole heʼeki ʼi ai he tahi age tagata kua palalau fēia.” (Mat. 7:28, 29; Soa. 7:46) ʼE mole he ʼuhiga ke kita fakaʼaogaʼi he ʼu kupu pea mo he ʼu palalau ʼe faigataʼa, peʼe ko he ʼu tuʼuga lea fakatātā moʼo fakamahino ia te moʼoni ke tui kiai te hahaʼi. ʼE feala pē hakita fakamahino fakalelei ia te moʼoni ʼaki he ʼu palalau ʼe māhani kiai ia te hahaʼi.
3. He koʼē ʼe feala ki ʼihi ke lahi fau te ʼu puani ʼaē ʼe natou fakahā ki te hahaʼi, pea koteā ʼaē kā kita fai ke mole hoko ia te faʼahi ʼaia?
3 Tou Fakafuafua Lelei Te ʼu Manatu ʼAē Ke Tou Fakahā: Neʼe mahino ia Sesu ki te ʼu meʼa ʼaē neʼe ʼaoga ki te nofoʼaki ʼi te temi ʼaē neʼe faiakonaki ai kiā nātou. (Soa. 16:12) ʼE tonu ke tou mahino pea mo fai he ʼu palalau ʼe ʼaoga ki te hahaʼi, tāfito lā mokā tou fai fagonogono ki ʼotatou kāiga, mo te hahaʼi ʼaē ʼe foʼofoʼou, peʼe ko te tamaliki liliki. ʼE tonu ke tou tōkakaga ke mole lahi fau te ʼu puani ʼaē ʼe tou fakahā tatau aipē peʼe lagi natou fakalogo fakalelei ki tatatou ʼu fai fakamatala. Ko nātou ʼaē ʼe fakamālotoloto ki te moʼoni, ʼe hoko atu anai tanatou ako ke natou mahino ki te ʼAtua moʼoni, ko Sehova.—Soa. 17:3; 1 Ko. 3:6.
4. He koʼē ʼe lelei ke tou fakahā pē te ʼu manatu tāfito kae ʼaua naʼa lahi fau te ʼu puani ʼaē ʼe tou talanoa kiai?
4 Tou Fakahā Age Pē Te ʼu Manatu Tāfito: Neʼe mahino gafua te hahaʼi ki te ʼu faiakonaki ʼa Sesu, he neʼe mole lahi fau te ʼu puani ʼaē neʼe talanoa kiai. ʼI te temi ʼaē neʼe ina ʼui fēnei ai: “Ko nātou fuli ʼaē ʼe nonofo ʼi te ʼu falemaka fakamanatu . . . ʼe natou hū mai anai ki tuʼa,” neʼe fakafuafua e Sesu neʼe mole heʼeki ʼaoga ia ke talanoa age ki te ʼu ʼamanaki ʼaē e lua, ʼo nātou ʼaē ʼe fakatuʼuake. (Soa. 5:28, 29) Kā tou fai he ʼu ako Tohi-Tapu, ʼe tonu ke tou fakahā age pē ia te ʼu manatu tāfito pea ke tou tōkakaga naʼa tou talanoa ki he ʼu manatu ʼe hoki vakaʼi ki muli age.
5. Ko te tapuakina fea, ʼe feala ke tou maʼu mo kapau ʼe mahino gafua tatatou faiakonaki?
5 ʼE tou loto fakafetaʼi ʼi te mahino gafua ʼo te ʼu akonaki ʼaē ʼe foaki mai e Sehova ʼo ʼuhiga mo te ʼu meʼa fuli ʼaē ʼe ʼaoga kiā tātou! (Mat. 11:25) ʼOfa pē mo tātou, ke mahino gafua ia tatatou faiakonaki pea ke tou fiafia ʼi he minisitelio ʼe fua lelei.