Te Polokalama ʼo Te Fakatahi Makehe ʼAho Tahi ʼo Te Taʼu 2010
1. (a) Koteā te ʼu kupu tāfito Fakatohi-tapu neʼe tou vakaʼi ʼi te ʼu fakatahi makehe ʼaho tahi ʼaē kua hili? (b) ʼE ʼi ai koa he ʼu puani tāfito ʼi te ʼu fakatahi makehe ʼaho tahi kua hili neʼe tokoni atu ki takotou minisitelio?
1 “Ke Tou ʼIloʼi Papau Ia Te ʼu Meʼa ʼAē ʼe Maʼuhiga Tāfito,” “Tou Nofo Agatonu Ohagē Ko He Faga Ovi e Tahi,” “Tou Haga Fakamoʼoni Ki Te Moʼoni,” pea “Ko Tātou Te Kele—Ko Sehova Ko Totatou Tufuga Faʼu ʼIpu.” (Filp. 1:9, 10, 27; Soa. 18:37; Isa. 64:8) Ko he ʼu kupu tāfito neʼe tou vakaʼi ʼi te ʼu fakatahi makehe ʼaho tahi ʼaē kua hili. ʼE kotou fia kau koa ki te fakatahi makehe ʼaho tahi ʼo te taʼu gāue 2010? ʼE ko tona kupu tāfito ʼaenī: “Ko Te Temi ʼAē Kei Toe Kua Nounou,” ʼe toʼo mai te vaega Tohi-Tapu ʼo 1 Kolonito 7:29.
2. ʼE lava fakatupu feafeaʼi ia he fakaʼamu lahi ke hoko mai lā ia te fakatahi lahi ʼaenī?
2 ʼI te temi pē ʼaē kua ʼiloʼi ai e takotou kōkelekāsio ia te ʼaho ʼaē kā fai ai ia te fakatahi, kotou fakatupu ia he fakaʼamu lahi ke hoko mai lā te fakatahi makehe ʼaia ʼaho tahi. Ko ʼihi mātuʼa ʼe natou tokoni ki tanatou fānau ke natou fakaʼamu ki te fakatahi ʼaia, ʼo natou tohi ʼi te kaletalio fakafāmili ia te ʼaho ʼaē kā fai ai te fakatahi, ʼaki he lisi ʼo te ʼu meʼa ʼaē ʼe tonu ke natou tahi ʼolo mo ia ki te fakatahi, pea mo natou lau ia te ʼu ʼaho ʼaē kei toe ʼi muʼa ʼo te hoko mai ʼo te fakatahi. ʼI takotou fai ia takotou Tauhi Fakafāmili ʼaē ʼi te afiafi, ʼe lagi kotou toe fia vakaʼi anai ia takotou ʼu nota ʼo te ʼu fakatahi makehe ʼaho tahi ʼaē kua hili. ʼE kotou toe lava teuteuʼi ai ia tokotou loto ki te fakatahi ʼaia, ʼaki hakotou toe vakaʼi ia te tohi Tirez profit de l’École du ministère théocratique, ʼi te ʼu pāsina 13-16, ke tokoni atu kiā koutou pea mo tokotou fāmili ke kotou “tōkakaga ki takotou faʼahiga fagono.”—Luka 8:18.
3. ʼE lava ʼaoga feafeaʼi kiā tātou ia te ʼu manatu ʼaē kā tou logo anai kiai?
3 Kotou Maʼuliʼi Te ʼu Meʼa ʼAē ʼe Kotou Ako: ʼE tou logo tuʼumaʼu ki te ʼu palalau ʼaenī mokā ʼosi ia he fakatahi lahi: “ ʼI toe polokalama lelei leva ʼaenī!” ʼE moʼoni tuʼumaʼu ia te ʼu palalau ʼaia, heʼe ko he fakatuʼutuʼu ia neʼe fai e Sehova. (Taag. 10:22) Ke fua lelei kiā tātou ia te ʼu manatu ʼaē neʼe tou logo kiai, ʼe tonu ke tou metitāsioʼi pea mo taupau maʼu. (Luka 8:15) Kā kua ʼosi ia te fakatahi, pea ʼi takotou toe liliu ʼaē ki ʼokotou ʼapi, kotou toʼo ia he temi ke kotou fai palalau fakafāmili ki te polokalama peʼe kotou fai palalau mo nātou ʼaē ʼe kotou motokā tahi. Kotou fefaipalalauʼaki ʼo ʼuhiga mo te ʼu fakatuʼutuʼu pea mo te ʼu manatu ʼaē kā tokoni atu anai ki takotou minisitelio. ʼI takotou fai ia te faʼahi ʼaia, ʼe tokoni atu anai ke ʼaoga fualoa kiā koutou ia te ʼu manatu ʼi te kua ʼosi ʼo te fakatahi.—Sake 1:25.
4. He koʼē ʼe maʼuhiga anai kiā tātou ia te fakatahi makehe ʼaenī?
4 ʼE malave tuʼumaʼu ʼi ʼotatou loto mokā ʼe foaki mai ia he meʼa ʼofa ʼe ʼaoga tāfito kiā tātou. ʼE mole tou fakaʼamu koa lā ki te ʼu lelei ʼaē neʼe teuteuʼi e Sehova maʼa tātou ʼi tatatou fakatahi makehe ʼaho tahi ʼaē kā hoko mai? ʼE feala ke tou tui papau ʼe ʼi ai anai ia tona ʼaoga kiā tātou ʼi te ʼu ʼaluʼaga fuli pē. ʼE tou ʼamanaki ʼe tou lava maʼu mai tatatou Tamai, ia Sehova, ia te meʼa ʼofa totonu ʼaē ʼe fakalotomālohiʼi ai tātou pea mo akoako tātou ke tou fakahoko ia te gāue ʼaē neʼe ina foaki mai ke tou fai.—2 Tim. 4:2; Sake 1:17.