Kua Kotou Nonofo Teuteu Koa Ki Te Ako?
1. Koteā ia te ʼu faigamālie ʼaē ʼe kotou maʼu ʼi te faleako?
1 Peʼe ko takotou hoki hū ʼaenī ki te ako peʼe ko takotou tahi taʼu ʼaenī, ko koutou, ʼu Kilisitiano tūpulaga ʼe kotou tau mo te ʼu faigataʼaʼia pea mo te ʼu fakaneke. Kae ʼe kotou toe maʼu pē foki mo te ʼu faigamālie ke kotou “fakamoʼoni ki te moʼoni.” (Soa. 18:37) Kua kotou teuteu lelei koa ke kotou fai fakamafola ʼi te faleako?
2. Ko te ʼu ʼaluʼaga fea ʼaē kua kotou nonofo teuteu ai ki te ako?
2 Moʼo tokoni atu ke kotou maʼu he ʼu fua lelei ʼi te faʼahi fuli ʼo tokotou maʼuli, neʼe kotou maʼu te ako lahi ʼaē neʼe foaki atu e Sehova, mo takotou ʼu mātuʼa pea mo te tagata kaugana agatonu mo poto. (Taag. 1:8; 6:20; 23:23-25; Efe. 6:1-4; 2 Tim. 3:16, 17) ʼI te temi ʼaenī, kua kotou ʼiloʼi lelei ia te ʼu faigataʼaʼia ʼaē kā kotou tau mo ia ʼi te faleako. ʼAki takotou ako fakaʼatua pea mo takotou ʼiloʼi ʼaē ia te ʼu agaaga ʼe hoko ʼi takotou faleako, kotou nonofo teuteu ke kotou fai fakamafola. (Taag. 22:3) Kotou tōkakaga fakalelei ki te ako pea mo te ʼu tokoni ʼaoga mai te Tohi-Tapu ʼaē ʼe kotou maʼu ʼi te ʼu tohi e lua Les jeunes sʼinterrogent pea mo te ʼu ʼalatike ki te kau tūpulaga ʼaē ʼe tā tuʼumaʼu ʼi te Réveillez-vous !
3. Ko te ʼu ʼaluʼaga fea ʼaē ʼe feala ai anai hakotou fai fakamafola?
3 ʼI takotou telituale makehe ʼaia, ʼe feala ai ke kotou fai fakamafola ʼi hona ʼu ʼaluʼaga kehekehe. Kā tokagaʼi e ʼihi ia takotou faiteuteu fakalelei pea mo te gaohi ʼo tokotou lauʼulu, mo takotou aga pea mo takotou palalau, mo takotou fakaʼapaʼapa ki takotou ʼu kaugā ako pea mo tokotou kau faiako, ʼo fēia pē lā mo takotou gāue lelei ʼaē ʼi te kalasi, pea mo tanatou sisio ʼaē ʼe ʼi ai ia te fakatafitoʼaga mālohi ʼo tokotou maʼuli, ʼe feala anai ke fehuʼi fēnei atu e ʼihi: “He koʼē ʼe mole ke tatau mo mātou?” (Mala. 3:18; Soa. 15:19) ʼE ko he faigamālie ʼaia ke kotou fai fakamafola pea mo fakamahino age kiā nātou ia takotou tui. (1 Tim. 2:9, 10) ʼI te taʼu kātoa, ʼe feala ke hoko kiā koutou ia he ʼu ʼahiʼahi, ohagē lā ko te ʼu toʼotoʼoga fakafenua pea mo te ʼu ʼaho lalahi. Kapau ʼe fehuʼi atu pe koʼē ʼe mole kotou kau kiai, ʼe kotou tali fēnei pē anai: “ ʼE mole fakagafua e taku lotu; ko au ko te Fakamoʼoni ʼa Sehova,” peʼe kotou fakaʼaogaʼi anai ia te faigamālie ʼaia moʼo fai fakamafola ʼo ʼuhiga mo takotou Tamai ʼofa ʼaē ko Sehova? Kapau ʼe kotou teuteu lelei ʼaki te takitaki ʼa Sehova, ʼe feala anai hakotou fai fakamafola ki te kau faiako, mo takotou kaugā ako pea mo ʼihi atu.—1 Pet. 3:15.
4. He koʼē ʼe kotou falala ʼe feala ke fua lelei ia te taʼu ʼaenī ʼo takotou ako?
4 Logolā takotou lagi mātataku ʼaē ʼi te fai fakamafola ʼi te faleako, kae ʼe tonu ke kotou ʼiloʼi ʼe lagolago atu ia te tokolahi ʼe natou loto ke fua lelei ia te taʼu ʼaia ʼe koutou ako ai. Tahi ʼaē meʼa, ʼe matou fakafiafia fakatahi mo koutou, ʼi takotou lava fai fakamafola ʼi takotou telituale makehe ʼaia ki niʼihi. Koia, kotou lototoʼa pea mo nonofo teuteu ki te ako!