ʼE Maʼua Ki Te ʼu Minisi Kilisitiano Ke Natou Faikole
1. Koteā ʼaē ʼe ʼaoga moʼo fakahoko tatatou minisitelio?
1 ʼE mole feala ke tou fakahoko te minisitelio ʼaki pē totatou mālohi takitokotahi. ʼE foaki mai e Sehova ia te mālohi ke tou fai te gāue. (Filp. 4:13) ʼE ina fakaʼaogaʼi ia tana kau ʼāselo ke natou tokoni mai ke tou maʼu ia te hahaʼi ʼaē ʼe hagē ko ni ʼu ovi. (Fakh. 14:6, 7) ʼE ko Sehova ʼaē ʼe ina fakatuputupu ia te ʼu pulapula ʼo te moʼoni ʼaē ʼe tou tō pea mo fakavai. (1 Ko. 3:6, 9) Koia ʼaē ʼe maʼuhiga ʼaupitō ai ki te kau minisi Kilisitiano ke natou falala ki tatatou Tamai ʼe ʼi selō, ʼo natou faikole!
2. Koteā he ʼu faʼahi ʼe feala ke tou faikole kiai?
2 Maʼa Tātou Totonu: ʼE tonu ke tou faikole ʼi te temi fuli pē ʼaē ʼe tou fai fakamafola ai. (Efe. 6:18) Koteā he ʼu faʼahi ʼe feala ke tou faikole kiai? ʼE feala ke tou faikole ke tou maʼu ia he ʼu manatu ʼe lelei ʼo ʼuhiga mo te hahaʼi ʼaē ʼo totatou telituale peʼe ke tou maʼu ia te lototoʼa. (Gāue 4:29) ʼE feala ke tou kole kiā Sehova ke ina taki tātou ki te hahaʼi ʼaē ʼe fia logo ki te moʼoni, pea ʼe feala ke tou ako mo nātou ia te Tohi-Tapu. Kapau ʼe fai mai he fehuʼi e he tahi, ʼe feala ke tou faikole fakanounou pea mo fakalogologo, ʼo tou kole kiā Sehova ke tokoni mai ke tou fai he tali e totonu. (Neh. 2:4) ʼE feala ke tou toe kole ke tou maʼu ia te poto ʼaē ke tou fakamuʼamuʼa tuʼumaʼu pē ia te minisitelio. (Sake 1:5) Tahi ʼaē meʼa, ʼe fiafia ia Sehova mokā tou fai he ʼu palalau fakafetaʼi ʼi tatatou ʼu faikole ʼi tatatou maʼu ia te pilivilēsio ʼaē ke tou kau ʼi tana ʼu minisi.—Kol. 3:15.
3. ʼE tokoni feafeaʼi tatatou hūfakiʼi ʼihi ki te haʼele ki muʼa ʼo te gāue fai fakamafola?
3 Maʼa Te Hahaʼi: ʼE tonu ke tou toe “fehūfakiʼaki,” ʼo lagi tou toʼo te ʼu higoa ʼo totatou ʼu tehina mo tuagaʼane mokā feala ke tou fai te faʼahi ʼaia. (Sake 5:16; Gāue 12:5) ʼE kotou mahamahaki koa ʼo mole feala ai ke lahi te ʼu gāue ʼaē ʼe kotou fai ʼi te fai fakamafola? Pea ʼe feala ke kotou hūfakiʼi te ʼu tehina mo tuagaʼane ʼaē kei mālolohi. ʼAua naʼa kotou meʼa noaʼi ia te fakatupu fakalotomālohi ʼaē ʼo takotou hūfakiʼi nātou ʼaia! ʼE toe lelei foki ke tou hūfakiʼi te ʼu pule fenua, ke natou tali lelei pē te gāue fai fakamafola, ke feala ai ki totatou ʼu tehina ke natou “maʼu he maʼuli fīmālie pea mo tokalelei.”—1 Tim. 2:1, 2.
4. He koʼē ʼe tonu ke tou faʼa kātaki tuʼumaʼu ʼi te faikole?
4 Ko te tala ia te logo lelei ʼi te kele kātoa ʼe ko he toe gāue lahi ʼaupitō. Kapau ʼe tou “kātaki tuʼumaʼu ʼi te faikole,” ʼe tou fakahoko anai te gāue ʼaki te tokoni ʼa Sehova.—Loma 12:12.