ʼE Feʼauga Koa Taku ʼu Gāue ʼAē ʼe Au Fai?
1. Koteā te ʼu tuʼania ʼaē ʼe feala ke maʼu e he Kilisitiano agatonu?
1 Neʼe mole heʼeki kotou fai koa lā ia te taʼi fehuʼi ʼaia? Lagi ʼe mole kei lahi takotou kau ʼaē ki te minisitelio heʼe kua kotou vaivai matuʼa, peʼe kotou mahamahaki, peʼe kua lahi age tokotou ʼu maʼua fakafāmili, ʼo fakatupu ʼaki ai hakotou lotovaivai. Ko te tuagaʼane mo tana ʼu tamaliki e toko tolu neʼe faitohi ʼo ina ʼui, ʼi ʼihi temi ʼe lotomamahi, heʼe ko te temi pea mo te mālohi ʼaē ʼe ina fakaʼaogaʼi maʼa tona fāmili ʼe fakatuʼakoi ai te ʼu gāue ʼaē ʼe feala ke ina fai ʼi te minisitelio. Koteā ʼaē kā tokoni mai ke tou maʼu he manatu fakapotopoto?
2. Koteā ʼaē ʼe loto e Sehova ke tou fai?
2 Te Meʼa ʼAē ʼe Loto e Sehova Ke Tou Fai: ʼE mahino papau ia, ko tātou fuli ʼe tou loto ke lahi age tatatou gāue ʼaē ʼi te minisitelio. Kae ʼi te agamāhani, ʼe kehekehe ʼaupitō te meʼa ʼaē ʼe tou loto kiai pea mo te meʼa ʼaē ʼe tou lavaʼi moʼoni. Ko tatatou loto ʼaē ke lahi age tatatou ʼu gāue ʼi te minisitelio, ʼe hā ai tatatou mole maʼuli fakaʼauʼauganoa. ʼE tonu ke tou manatuʼi ko Sehova ʼe ina ʼiloʼi lelei totatou ʼu tuʼakoi pea ʼe mole ina fakamaʼua ʼo fakalaka age ʼi te ʼu meʼa ʼaē ʼe tou lavaʼi. (Pes. 103:13, 14) Koteā ʼaē ʼe ina loto ke tou fai? ʼE ina loto ke tou tauhi age kiā te ia ʼaki totatou nefesi kātoa, ke tou foaki kātoa age kiā te ia te ʼu meʼa lelei ʼaē ʼe tou maʼu.—Kol. 3:23.
3. ʼE lava feafeaʼi hatatou vakavakaʼi tatatou ʼu faiga ʼaē ki te minisitelio?
3 Koteā ʼaē kā tokoni mai ke tou ʼiloʼi totonu te ʼu gāue ʼaē ʼe tou lava fakahoko? ʼE tou lava faikole kiā Sehova ke tokoni mai ke tou vakavakaʼi fakalelei totatou maʼuli. (Pes. 26:2) ʼE lagi toe lava tokoni mai hotatou kaumeʼa Kilisitiano ʼe tou falala ki ai pea kua fotufotuʼa, ʼe ina ʼiloʼi lelei tātou pea ʼe lava palalau fakahagatonu mai, peʼe tonu ke tou fai he ʼu fetogi ʼi totatou maʼuli. (Taag. 27:9) Kotou toe manatuʼi foki, ʼe fetofetogi te ʼaluʼaga ʼo te maʼuli, koia ʼe lelei ai ke tou vakavakaʼi tuʼumaʼu totatou ʼaluʼaga.—Efe. 5:10.
4. ʼE tonu ke feafeaʼi tatatou manatu ʼo ʼuhiga mo te ʼu fakamanatu ʼaē ʼe fakatafito ki te Tohi-Tapu ʼo ʼuhiga mo te minisitelio?
4 Tatatou Faʼahiga Manatu Ki Te ʼu Fakamanatu: Kā fai he lele manavā, ko te hahaʼi ʼaē ʼe mamata kiai, ʼi te agamāhani ʼe natou pā kalaga moʼo fakalotomālohiʼi te kau lele ke natou fakaʼosi tanatou lele, kae mole natou fakalotovaivaiʼi nātou. ʼO toe fēia, ko te fai mai ʼo te ʼu fakalotomālohi pea mo te ʼu fakamanatu mai te Tohi-Tapu, ʼi tatatou ʼu fono pea ʼi tatatou ʼu tohi ke tou ‘fakamafola ʼaki he lotomālohi te folafola,’ ʼe fai mai ke fua lelei kiā tātou kae ʼe mole fai ia moʼo fakahā mai, ko tatatou ʼu faiga ʼe mole heʼeki feʼauga. (2 Tim. 4:2) ʼE tou lava falala, kapau ʼe tou haga fai te meʼa ʼaē ʼe tou lavaʼi, ʼe manatuʼi anai e Sehova ʼaki he agaʼofa totatou ‘ ʼofa pea mo ʼatatou gāue.’—Hep. 6:10.