He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 1 ʼo ʼAukusitō

“ ʼI tau manatu, ʼe ʼi ai moʼoni koa he tahi ʼe tokaga kiā nātou ʼaē ʼe mamahi pea mo māsisiva? [Tuku ke fai mai hana tali. Pea kotou lau age ia te Pesalemo 72:12, 13.] ʼE fakamahino ʼi te ʼalatike ʼaenī peʼe fakahoko feafeaʼi anai e Sesu ia te fakapapau ʼaia.” Fakahā age te ʼalatike ʼaē ʼe kamata ʼi te pāsina 28.

Réveillez-vous! ʼo ʼAukusitō

“ ʼE lahi te ʼu ʼata iā ʼaho nei ʼe hā ai te ʼu temonio, mo te ʼu fafine gaohi meʼa fakatemonio, pea mo fai fakalauʼakau. ʼI tau manatu, ʼe maʼuli moʼoni koa te kau temonio? [Tuku ke fai mai hana tali. Pea kotou lau age ia 1 Kolonito 10:20.] ʼE fakahā ʼi te ʼalatike ʼaenī pe koteā ʼaē ʼe ʼui ʼi te Tohi-Tapu ʼo ʼuhiga mo te kau temonio pea ʼe feafeaʼi hotatou puipui mai iā nātou.” Fakahā age te ʼalatike ʼaē ʼe kamata ʼi te pāsina 20.

Te Tule Leʼo ʼaho 1 ʼo Sepetepeli

“Tokolahi te hahaʼi ʼe natou mātataku naʼa maumau peʼe molehi anai te kele e he tau fakanukeleʼea peʼe ʼi te fetogi ʼaē ʼo te agaaga ʼo te kele. ʼI taʼu manatu, ʼe hoko anai koa he faʼahi fēia? [Tuku ke fai mai hana tali.] ʼE feala ke ke tokagaʼi ia te ʼu palalau ʼaenī ʼe fai ʼi te Tohi-Tapu ʼo ʼuhiga mo te faʼahi ʼaia. [Lau age ia Fakahā 11:18.] ʼE fakahā ʼi te nusipepa ʼaenī ia te ʼu tali kiā fehuʼi e fā ʼo ʼuhiga mo te fakaʼosi ʼo te mālamanei.”

Réveillez-vous! ʼo Sepetepeli

“ ʼI tau manatu, ko te ʼu telefoni feʼāveʼaki, mo te meli pea mo te fai palalau ʼaē ʼi te Neti, mo ʼihi age meʼa fēia ʼe fakafelogoiʼaki ai te hahaʼi, ʼe natou lava fakafīmālieʼi koa ia te nofo tokotahi ʼa he tahi peʼe liliu anai koa ia te ʼu meʼa ʼaia ʼo fakalēsili age tana nofo tokotahi? [Tuku ke fai mai hana tali.] Koʼenī te tokoni ʼe fai mai ke tou tauʼi ia te nofo tokotahi. [Lau age ia Gāue 20:35.] ʼE foaki ʼi te nusipepa ʼaenī ia te tahi ʼu tokoni mai te Tohi-Tapu.”