Tou Gāue Mālohi ʼi Te Fakamafola ʼo Te Logo ʼo Te Puleʼaga ʼo Te ʼAtua!
1 Ko Sehova ʼe ko te ʼAtua ʼo te ʼu gāue lelei, pea ʼe gāue mālohi ia moʼona fakahoko. Ko meʼa fuapē ʼe ina fai ke fua lelei kiā nātou ʼaē ʼe tauhi age kiā te ia. Neʼe tuku mai e Sesu te faʼifaʼitaki lelei ʼi tana muliʼi ia te faʼa gāue ʼo tana Tamai. ʼI te tahi lakaga, neʼe ina kapu mai te fale lotu ia nātou ʼaē neʼe natou fakaliliu ko he fale fakatau koloa, he neʼe lagolago mālohi ia ki te ʼapi ʼo Sehova. (Soa. 2:14-17) ʼE tonu foki mo tātou ke tou fakahā he lagolago mālohi fēia ʼi tatatou tauhi ʼaē kiā Sehova totatou ʼAtua, mo kapau ʼe tou loto ke ʼiloʼi tātou ko ni hahaʼi “ʼe gāue mālohi ki te fai ʼo he ʼu gāue lelei.”—Tito 2:14.
2 ʼE fua lelei ki ʼihi ia te ʼu gāue lelei ʼaē ʼe fai e te kau Kilisitiano. Ko te meʼa ʼaē ʼe maʼuhiga tāfito ki he tahi kehe, ke tou tokoni ki ai ke ina ʼiloʼi ia Sehova pea ke tauhi ki ai. (Soa. 17:3) ʼE tou fai te taʼi tokoni ʼaia ʼaki tatatou gāue mālohi ʼaē ʼi te fai fakamafola pea mo te fai ʼo ni ʼu tisipulo.
3 Koteā te fakaʼuhiga ʼo te ʼui ʼaē ke kita gāue mālohi? Ke kita fai fakamālotoloto takita gāue. ʼE gāue mālohi ia te Kilisitiano heʼe haʼu mai tona loto ʼaē ke ina fai ia te meʼa ʼaē ʼe faitotonu. Ko te kupu Fakakeleka ʼaē ʼe fakaʼaogaʼi kiai ʼe fakaʼuhiga ʼe “pula.” ʼI totatou ʼuhiga minisi ʼa te ʼAtua, ʼe tonu ke tou fakahā te kalitātē ʼaia ʼi tatatou fakamafola te logo ʼo te Puleʼaga ʼo te ʼAtua. ʼE tou gāue mālohi koa ʼi te minisitelio? ʼE tou fai koa ia meʼa fuli ʼe tou lavaʼi moʼo tokoni ki te hahaʼi ke natou ʼiloʼi te ʼu fakatuʼutuʼu ʼa Sehova?
4 Lolotoga te māhina ʼo Novepeli, ʼe tou maʼu te pilivilēsio ʼaē ko te tufa ʼo te ʼu kaupepa lalahi La Bible — Quel est son message ?, Te Kau Fakamoʼoni ʼa Sehova—Ko Ai Ia Nātou? Koteā ʼAē ʼe Natou Tui Kiai? Te ʼu laumālie ʼo te kau mate—ʼE feala koa hanatou tokoniʼi koutou peʼe nātou fakahalaʼi koutou? ʼE natou maʼuʼuli moʼoni koa?, Koteā ʼAē ʼe Hoko Kia Tatou Mokā Tou Mamate? peʼe ko he tahi age kaupepa lahi ʼe maʼu ʼi te tānakiʼaga tohi ʼo te kōkelekāsio. Tou teuteu ke tou tufa te kaupepa ʼaē ʼe tō tonu mo te ʼu faʼahi ʼaē ʼe ʼaoga ki totatou telituale, peʼe tō lelei mo he tahi pē ʼe tou felāveʼi anai mo ia ʼi te fai fakamafola.
5 Ke tou gāue mālohi ʼi te fakamafola ʼo te logo ʼo te Puleʼaga, ʼe tonu ke tou teuteuʼi fakalelei. ʼE tou ʼiloʼi lelei koa te ʼu faʼahiga palalau ki te Tohi-Tapu? ʼE feafeaʼi anai hatatou fakapipiki ia te ʼu fai palalau ʼaia mo te kaupepa ʼaē kā tou tufa? Koteā lā he ʼu puani tāfito ʼe tou lava palalau kiai? Kapau ʼe tou toʼo he temi ke tou fakamāmāhani lelei ai mo te ʼu manatu ʼaē ʼe tā ʼi te ʼu kaupepa lalahi, pea mo tou akoako fakaʼatamai he ʼu palalau ʼe leleiʼia anai e te hahaʼi ʼo ʼuhiga mo te ʼu kaupepa, ʼe mahino papau ia ʼe tou tokalelei anai ki te temi ʼaē kā tou tufa ai te ʼu kaupepa ʼaia, ʼo tou gāue mālohi ki tona fakahā age kiā nātou.
6 Mai tona ʼaluʼaga ʼaē ʼe tou māʼuʼuli nei ʼi te ʼu temi maʼuhiga, koia ʼe maʼuhiga ai ia te logo ʼaē ʼe tou tala ki te hahaʼi. ʼE tonu ke tou gāue mālohi ʼi te fakamafola ʼo te logo ʼo te Puleʼaga, ʼo tou tokoni ki te hahaʼi ke natou ʼiloʼi te ʼAtua mo tana Folafola. ʼI tatatou gāue mālohi ʼaē ʼi te fakamafola ʼo te ʼatamai mālama ʼaē ʼe ina foaki te maʼuli ki te hahaʼi, ʼe tou fakahā fakalelei ai tatatou kua foaki ʼaē ʼo totatou maʼuli kiā Sehova pea mo totatou ʼofa ʼaē kiā te ia. Kotou fai te ʼu fehuʼi ʼaenī kiā kotou totonu pē: ‘ ʼE au gāue mālohi koa ki te ʼu gāue lelei? ʼE feala koa ke ʼui ʼe au gāue fakamālotoloto pea mo au fai mo toku loto kātoa ia taku lagolago ʼaē ki te gāue fai fakamafola?’ ʼAki tatatou ʼu tali, ʼe tou fakahā ai peʼe feafeaʼi te mālohi ʼo te ʼu gāue ʼaē ʼe tou fai ʼi te minisitelio. Kapau ʼe lahi tatatou kau ki te fakamafola ʼo te logo ʼo te Puleʼaga, pea ʼe toe lahi age anai mo tatatou gāue mālohi ʼaē kiai. ʼE sio tonu anai ʼihi ʼe ko tātou ko he hahaʼi ʼe gāue mālohi ki te fai ʼo he ʼu gāue ʼe lelei.