Te Tali Ki ʼAkotou ʼu Fehuʼi
◼ ʼE loaloaga feafeaʼi ia te ako ʼaē ʼe tou fai mo he tahi ʼe tuputupu ʼi tana ako Tohi-Tapu?
ʼE lelei ke hoko atu te ako ʼo he tahi ʼe tuputupu lelei ʼi tana ako Tohi-Tapu ʼo aʼu ki tana kua ʼosi fai ia te ʼu tohi e lua, Koteā ʼAē ʼe Akoʼi Moʼoni Mai ʼi Te Tohi-Tapu? pea mo te tohi “Kotou Haga Nonofo ʼi Te ʼOfa ʼo Te ʼAtua.” ʼE fēia pē anai mo ia ʼaē ʼe ina ako pea papitema kae mole heʼeki ʼosi te ʼu tohi ʼaia e lua. ʼI te hili ʼo tana papitema, ʼe feala pē ke kotou haga tohi te hola, mo te ʼu ʼaʼahi, pea mo te ako. Kapau ʼe kau he kaugā fagona ki te ako ʼaia pea mo ina fakahā hana ʼu manatu, ʼe feala mo ia ke ina lau te hola.—Vakaʼi ia Te Minisitelio ʼo Te Puleʼaga ʼo Malesio 2009, ʼi te pāsina 2.
ʼE maʼuhiga kiā nātou ʼaē ʼe foʼou ke natou maʼu he fakatafitoʼaga mālohi ʼi te moʼoni ʼi muʼa ʼo tatatou fakaʼosi tanatou ako Tohi-Tapu. ʼE ʼaoga ke natou “tauaka” iā Kilisito pea mo “mālohi ʼi te tui” ke feala ai hanatou tauʼi te ʼu ʼahiʼahi ʼaē kā hoko kiā nātou. (Kol. 2:6, 7; 2 Tim. 3:12; 1 Pet. 5:8, 9) Pea tahi ʼaē faʼahi, ke feala hanatou akoʼi fakalelei ʼihi, ʼe tonu ke natou maʼu ia “te ʼatamai mālama totonu ʼo te moʼoni.” (1 Tim. 2:4) ʼI tatatou ako kātoa ia te ʼu tohi ʼaia e lua mo tatatou kau ako, ʼe tou tokoni ai kiā nātou ke natou haga haʼele mālohi tuʼumaʼu pē ʼi “te ala ʼaē ʼe fakatau ki te maʼuli.”—Mat. 7:14.
ʼI muʼa ʼo te tali ʼaē ke papitema he tahi, ʼe lelei ke vakaʼi e te kau tagata ʼāfea peʼe kua mahino lelei ia ia ki te ʼu akonaki tāfito ʼo te Tohi-Tapu pea mo ina maʼuliʼi. ʼE lelei ki te kau tagata ʼāfea ke lahi age tanatou tōkakaga mo kapau ko ia ʼaē ʼe ako ʼe mole heʼeki ʼosi ia tana ako te ʼuluaki tohi. Kapau ʼe mole heʼeki tokalelei he tahi ki te papitema, ʼe fai anai he puleʼaki e te kau tagata ʼāfea ke foaki kiā ia he tokoni ʼaoga ke feala ke papitema ʼi he tahi age temi.—Vakaʼi ia te tohi Organisés pour faire la volonté de Jéhovah, ʼi te ʼu pāsina 217-218.
[Fakamatala ʼo te pasina 2]
ʼE maʼuhiga kiā nātou ʼaē ʼe foʼofoʼou ke natou maʼu he fakatafitoʼaga mālohi ʼi te moʼoni