Les merveilles de la création révèlent la gloire de Dieu (Te ʼu Fakatupu Taulekaleka ʼe Hā Ai Te Kolōlia ʼo Te ʼAtua)
Tokolahi ʼe natou fiafia ʼi tanatou sisio ki te fakatupu. Kae tokosiʼi ʼe natou tokagaʼi ʼe hā lelei ʼi te fakatupu ia te manatu pea mo te ʼu meʼa ʼaē ʼe logoʼi e totatou Tupuʼaga Lahi. (Loma 1:20) ʼI te temi muʼa, neʼe akoʼi e Tavite ke ina ʼiloʼi ia Sehova ʼaki ia Tana Folafola. Kae neʼe toe “sio” pea mo fakaovi kiā te Ia ʼaki ia te fakatupu. (Pes. 8:3, 4) Ko te foʼi ʼata ʼaē ko tona kupu tāfito Les merveilles de la création révèlent la gloire de Dieu, ʼe tokoni anai kiā tātou, mo ʼatatou fānau, pea mo ʼatatou kau ako ke tou vakavakaʼi ia te ʼu meʼa fuli ʼaē neʼe fakatupu e Sehova. Pea ʼe feala ke tou mahino ki te ʼu kalitātē pea mo te ʼuluagaaga ʼo totatou Tupuʼaga Lahi, pea mo te maʼuhiga ʼaē ʼo tatatou fakaovi kiā te ia. ʼI te hili ʼo takotou sioʼi ia te foʼi ʼata, kotou vakaʼi peʼe feala ke kotou tali ki te ʼu fehuʼi ʼaē ʼe hoa mai.
(1) ʼE fakamālohiʼi feafeaʼi e te lahi pea mo te faʼahiga faʼu ʼo te ʼatulaulau ia totatou ʼofa ʼaē kiā Sehova? (Esa. 40:26) (2) ʼI te sivi ʼo te agaaga ʼo te faʼufaʼu ʼo te vai, koteā ʼaē ʼe feala ke kotou ako ʼo ʼuhiga mo Ia ʼaē neʼe ina fakatupu ia te faʼahi ʼaia? (Apk. 14:7) (3) Koteā ʼaē ʼe feala ke hoko mo kanapaulā: (a) Neʼe ovi fau te kele ki te laʼā? (b) Neʼe mamaʼo fau te kele mai te laʼā? (c) Neʼe fua lahi age ia te kele? (d) Neʼe fua veliveli age ia te kele? (4) Koteā neʼe feala ke hoko mo kanapaulā neʼe mole ʼi ai he māhina? (Pes. 89:38 [89:37, MN]) (5) Neʼe fakatupu feafeaʼi e Sehova ia te tagata ke maʼuli fiafia? (6) Koteā ia te ADN? (Pes. 139:16, vakaʼi w07 1/07 p. 13 pal. 11) (7) ʼI te ʼu fakatupu fuli ʼa Sehova ʼi te kele, he koʼē ʼe makehe ia te tagata? (Sen. 1:26) (8) Koteā ia takotou faʼahiga sio ʼo ʼuhiga mo te mālama foʼou?
Te Tahi ʼu Manatu: (9) Koteā ʼaē neʼe kotou leleiʼia ʼi te ʼu manatu ʼaia e fā? (10) Neʼe malave feafeaʼi kiā koutou ia te ʼu pāki ʼaē neʼe kotou sioʼi ʼi te foʼi ʼata? (11) Koteā ia te gāue ʼe fai e te vai ʼi totatou sino? (12) Kotou tuku mai he ʼu faʼifaʼitaki ʼe hā ai ʼe feala ke māʼuʼuli fakatahi ia te ʼu fakatupu fuli? (13) ʼE ʼiloʼi feafeaʼi e te ʼu fakatupu ʼe feala ke natou fetokoniʼaki ʼi tonatou maʼuli? (14) Koteā takotou manatu ʼo ʼuhiga mo te agaaga faʼufaʼu e Sehova ʼihi ʼu fakatupu?
Kotou Sisio Ki Te Fakatupu ʼa Sehova: ʼE fakalotomālohiʼi tātou e Sesu ke tou “sisio ki te u manulele o te lagi” pea mo “kotou sisio pe e feafeaʼi te tutupu ake o te u matala o te vao.” (Mat. 6:26, 28) ʼI takotou fai ia te faʼahi ʼaia, ʼe mālohi anai takotou tui, ʼo kotou falala ai ki te Tupuʼaga pea mo kotou leleiʼia ia te poto, mo te mālohi pea mo te ʼofa ʼo Sehova. Koia ke ʼaua naʼa fakaleluʼi fau tātou e te ʼu gāue ʼo te mālama ʼaenī, tou toʼo he temi pea tou faiga ke tou fakasiosio lelei ia te ʼu fakatupu taulekaleka ʼa Sehova, pea mo tou metitāsio ki te ʼu meʼa ʼaē ʼe ina fakahā mai ʼo ʼuhiga mo totatou ʼAtua lahi.—Pes. 19:1.