Ko Ni Foʼi Piesi Liliki e Lua

Ko te faʼahi maʼuhiga ʼaē ke tou lagolago ki te ʼu gāue ʼo te Puleʼaga ʼo te ʼAtua, ʼe ko te foaki ʼatatou falā maʼa te gāue fai fakamafola ʼi te mālamanei kātoa. Kae ʼe feafeaʼi koa mo kapau ʼe mole lahi ʼatatou koloa?

ʼI te tahi lakaga, neʼe sio ia Sesu ki te fafine vītua masiva neʼe ina tuku te ʼu foʼi piesi liliki e lua ki te puha tānaki koloa ʼo te fale tapu. Ko tona ʼofa ʼaē kiā Sehova ʼaē neʼe ina uga ia ia ke ina foaki “te mea katoa ae e ina mau, te mea katoa ae nee tonu ke mauli ai.” (Mko. 12:41-44) ʼI te fakatokagaʼi e Sesu ia te faʼahi ʼaia, ʼe hā mai neʼe maʼuhiga ʼaupitō ki te ʼAtua ia tona meʼa ʼofa. ʼO toe fēia aipē ki te kau Kilisitiano ʼo te ʼuluaki sēkulō, neʼe mahino kiā nātou ʼe mole ko natou pē ʼaē ʼe maʼu koloa ʼe feala ke natou lagolago ʼaki ʼanatou paʼaga ki te minisitelio. Neʼe talanoa ia Paulo ki te faʼifaʼitaki ʼa te kau Masetonia ʼaē, logolā “tonatou masiva lahi . . . nee natou kole fakamalotoloto . . . ke natou kau ki te tokoni.”—2 Ko. 8:1-4.

Koia, kapau ʼe tou foaki pē “ni foi piesi liliki e lua,” ʼaua naʼa galo kiā tātou ko te tānaki ʼo he ʼu kiʼi meʼa ʼofa ʼe feala ai ke maʼu he falā lahi. Ko tatatou foaki ʼaki he loto kātoa, ʼe fakafiafia anai tatatou Tamai ʼi selō ʼaē ʼe loto fia foaki, koteʼuhi “e ofa te Atua ki ae e foaki mo te fiafia.”—2 Ko. 9:7.