ʼAua Naʼa Kotou Manatu ʼe Mole Feala Hakotou Fai He Ako Tohi-Tapu Heʼe Kotou Maʼumaʼua
1. He koʼē ko ʼihi ʼe mole natou fia fai ni ako Tohi-Tapu?
1 Ko ʼihi ʼe mole natou fia fai ni ako Tohi-Tapu heʼe natou maʼumaʼua ʼaupitō. ʼE maʼua ke ʼi ai he temi moʼo tokaga kiā ia ʼaē ʼe ako. ʼE ʼaoga he temi moʼo teuteuʼi te ako, mo fai te ako pea mo tokoni kiā ia ke ina tauʼi ʼona faigataʼaʼia. Neʼe ʼui e te ʼapositolo ko Paulo neʼe ina foaki tona maʼuli moʼo tokoni kiā nātou ʼaē ʼi Tesalonika ke natou ʼiloʼi ia Sehova. (1 Tes. 2:7, 8) ʼE lava feafeaʼi hatatou fai he ako Tohi-Tapu logopē totatou maʼumaʼua ʼaupitō?
2. ʼE tou fakaʼaoga feafeaʼi anai totatou temi mo kapau ʼe tou ʼoʼofa kiā Sehova?
2 Ko Te Tauhi ʼAē Kiā Sehova ʼe Fakamaʼua Kiai He Temi: ʼE moʼoni, ʼe maʼua ke ʼi ai hotatou temi moʼo tauhi kiā Sehova. Ohagē lā, ʼe tou toʼo he temi moʼo kau ki te ʼu fono, mo fai faka mafola, mo lau te Tohi-Tapu pea mo faikole. Ko he tahi kua ʼohoana, logopē tona maʼumaʼua, kae ʼe fiafia anai hana toʼo he temi ke fakatahi ai mo tona ʼohoana. ʼE feafeaʼi age lā tatatou fiafia mokā tou “totogi” he temi moʼo tauhi kiā Sehova heʼe tou ʼoʼofa kiā te ia. (Efe. 5:15-17; 1 Soa. 5:3) Ohagē ko tona ʼui e Sesu, ko te faʼahi maʼuhiga ʼo tatatou tauhi kiā Sehova ʼe ko te fai ʼo ni tisipulo. (Mat. 28:19, 20) Kapau ʼe tou fakakaukau ki te faʼahi ʼaia, ʼe tokoni mai anai ke tou tali te maʼua ʼaē ke tou fai ni ako Tohi-Tapu.
3. ʼE feafeaʼi hatatou tokaga kiā ia ʼe ako tatau aipē pe hoko ni ʼaluʼaga ʼe mole feala ai hatatou fai te ako?
3 Kae ʼe feafeaʼi mo kapau ʼe mole feala hatatou fai te ako heʼe tonu ke tou gāue, peʼe tou mahaki kovi peʼe tou maʼumaʼua ʼi te ʼu gāue ʼo te kōkelekāsio? Ko ʼihi kau fai faka mafola ʼaē ʼe tonu ʼi ʼihi temi ke natou ʼolo ki he tahi faʼahi, ʼe natou fai te ako Tohi-Tapu ʼi te telefoni peʼe ʼi te Neti. Ko nātou ʼaē ʼe mole feala hanatou ʼolo ʼo fai te ako heʼe natou mahaki kovi, neʼe natou fakatuʼutuʼu ke fai te ako ʼi tonatou ʼapi. Neʼe fakatuʼutuʼu e ʼihi mo he tahi ʼe natou falala ki ai ke ina fai te ako mokā ʼe mole natou lava fai.
4. Koteā te ʼu lelei ʼe tou maʼu mokā tou fai ni ako Tohi-Tapu?
4 Neʼe fiafia lahi Paulo ʼi tana foaki tona temi mo tona mālohi moʼo tokoni ki te hahaʼi ke natou ʼiloʼi te moʼoni. (Gaue 20:35) ʼI tana fakakaukau ki te fua ʼo tana gāue kinakina ʼi Tesalonika, neʼe uga ai tona loto ke fakafetaʼi kiā Sehova. (1 Tes. 1:2) ʼE feala ke tuputupu tatatou fiafia ʼi te minisitelio mo kapau ʼe tou fai ni ako Tohi-Tapu logopē tatatou maʼumaʼua ʼaupitō.