“Kotou Mauli i Te Tokalelei Mo Te u Tagata Fuli”
1. Koteā te tokoni Fakatohi-tapu ʼe tou mulimuli anai kiai mokā tou felāveʼi mo ni hahaʼi ʼe ʼitaʼita?
1 Ko te hahaʼi ʼa Sehova ʼe natou manako ki te tokalelei, pea ko tatatou minisitelio ʼe ko he minisitelio ʼo te tokalelei. (Esa. 52:7) Kae ʼi ʼihi temi, ʼe tou felāveʼi mo ni hahaʼi ʼe ʼitaʼita ʼuhi ko tatatou ʼolo age kiō nātou. Koteā ʼaē kā tokoni mai anai ke tou taupau te tokalelei ʼi he ʼu ʼaluʼaga fēia?—Loma 12:18.
2. He koʼē ʼe maʼuhiga kiā tātou ke tou lotomahino?
2 Ke Tou Lotomahino: Logopē ko ʼihi ʼe ʼitaʼita heʼe natou fakafeagai ki te moʼoni, kae ko ʼihi ʼe lagi natou ʼitaʼita tupu ko he ʼu faʼahi ʼe mole hona pikipikiga mo te logo lelei. Lagi neʼe tou ʼolo kiō nātou ʼi he temi ʼe mole natou faʼa leleiʼia. Peʼe lagi ʼuhi ko ʼonatou fihifihia. Māʼia mokā natou ʼitaʼita ʼuhi ko te logo lelei, kae ʼe tonu ke tou manatuʼi ʼe fēia lā he neʼe lohiʼi nātou. (2 Ko. 4:4) Ko tatatou lotomahino ʼe tokoni mai anai ke tou fīmālie pea ke mole tou manatu ʼe ʼitaʼita ʼuhi ko tātou.—Taag. 19:11.
3. ʼE feafeaʼi hatatou fakahā te fakaʼapaʼapa kiā ia ʼaē ʼe tou fai palalau mo ia?
3 Tou Fakahā Te Fakaʼapaʼapa: Tokolahi nātou ʼi te telituale ʼe mālohi tanatou tui ki ʼanatou akonaki. (2 Ko. 10:4) ʼE natou lava filifili peʼe natou fakalogo anai pe kailoa. ʼE mole tou fia valokiʼi anai te tui ʼo ia ʼo te ʼapi peʼe tou fakahā ʼi ʼatatou palalau ʼe mole ina iloʼi he meʼa ʼo ʼuhiga mo te Tohi-Tapu. Kapau ʼe ina kole mai ke tou mavae, pea ʼe tou fai anai kiai ʼo tou fakahā te fakaʼapaʼapa.
4. Koteā te fakaʼuhiga ʼo te fai ni palalau ʼe lelei?
4 Tou Fai Ni Palalau ʼe Lelei: Māʼia peʼe palalau kovi mai te hahaʼi, kae ʼe tou tali lelei age anai ʼaki he agamalū. (Kol. 4:6; 1 Pet. 2:23) Tou faiga ke tou maʼu he ʼu faʼahi ke tou felōgoi lelei ai ʼi hatatou fihi. Lagi ʼe feala ke tou kole ʼaki he agavaivai, te ʼu tupuʼaga ʼo te fakafeagai ʼo ia ʼo te ʼapi. Kae ke mole tou fakafifihi ki ai, ʼi ʼihi temi ʼe lelei age ke tou fakagata te fai palalau.—Taag. 9:7; 17:14.
5. Koteā te ʼu lelei ʼe tou maʼu mokā tou taupau te tokalelei ʼi te minisitelio?
5 Kapau ʼe tou taupau te tokalelei, pea ko ia ʼo te ʼapi ʼe lagi ina manatuʼi lelei anai tatatou aga, mo fagono anai ʼi he tahi age lakaga mokā faiga he tahi ke fakamafola ki ai. (Loma 12:20, 21) Māʼia mokā ʼe hagē ʼe mole fetogi, kae ʼe lagi liliu anai ʼi he ʼaho ko hotatou tehina. (Kal. 1:13, 14) Tatau aipē peʼe ina leleiʼia pe kailoa te moʼoni, kae kapau ʼe tou loto lolomi mo fakahā te tokalelei, pea ʼe vikiʼi ai Sehova mo tatatou faiako.—2 Ko. 6:3.