Tou Teuteuʼi Te ʼAho Fakamanatu ʼAki He Lotofiafia
1. Ko te temi ʼo te ʼAho Fakamanatu ʼe ko he faigamalie ʼaia ke tou fai tea?
1 Ko te ʼAho Fakamanatu ʼae ʼe fai ʼi te Feliatolu ʼaho 26 ʼo Malesio, ʼe ko he faigamalie lelei ke tou fakafiafia ki te fakatuʼutuʼu ʼae neʼe fai e te ʼAtua ʼo ʼuhiga mo te haofaki. (Esa. 61:10) Kaʼe ʼi muʼa ʼo te hoko ʼo te ʼAho Fakamanatu, ʼe ʼaoga ke tou nofo teuteu ki ai ʼaki he lotofiafia. ʼO feafeaʼi?
2. Kotea ʼae ʼe ina ʼekenaki tatou ke tou teuteuʼi te ʼAho Fakamanatu?
2 Tou Teuteuʼi Te Toʼotoʼoga ʼAia: ʼE maʼuhiga te Taumafa ʼa te ʼAliki kaʼe ʼe ko he toʼotoʼoga ʼe maʼa maʼa pe ia. Kaʼe ʼe maʼua ke fai fakatomuʼa he ʼu fakatuʼutuʼu ke ʼaua naʼa galo he koga maʼuhiga. (Taag. 21:5) ʼE tonu ke filifili he koga meʼa lelei pea mo te hola ʼae ka fai ai. ʼE toe ʼaoga foki ke teuteuʼi te pane mo te vino ʼae ka fakaʼaoga. ʼE tonu ke fakamaʼa pea ke tokalelei te koga meʼa ʼae ʼe fai ki ai. ʼE toe ʼaoga ke teuteu lelei ia te tehina ʼae neʼe hinoʼi ki te akonaki, pea mo foaki he ʼu fakatotonu ʼo ʼuhiga mo te feʼaveʼaki ʼo te pane mo te vino pea mo te tali ʼo te hahaʼi. ʼE mahino ia, ʼe lahi te ʼu faʼahi kua tokalelei ia. ʼE tou fai te ʼu fakatuʼutuʼu ʼaia, ʼuhi ko totatou lotofakafetaʼi ki te toʼotoʼoga maʼuhiga ʼaia ʼo ʼuhiga mo te totogi ʼae neʼe fai e Sesu.—1 Pet. 1:8, 9.
3. ʼE feafeaʼi hatatou teuteuʼi totatou loto ki te Taumafa ʼa te ʼAliki?
3 Tou Teuteuʼi Totatou Loto: ʼE toe maʼuhiga ke tou teuteuʼi totatou loto ke tou mahino ki te maʼuhiga ʼae ʼo te ʼAho Fakamanatu kia tatou. (Eseta. 7:10) Moʼo fakahoko te faʼahi ʼaia, ʼe tonu ke tou toʼo he temi ke tou lau ia te ʼu koga Tohi-Tapu ʼo ʼuhiga mo te ʼAho Fakamanatu, pea mo tou metitasio ki te ʼu ʼaho fakaʼosi ʼo te maʼuli ʼo Sesu ʼi te kele. Ko tatatou metitasio ki te maʼuli fakasakilifisio ʼo Sesu ʼe ina ʼekenaki anai tatou ke tou faʼifaʼitakiʼi ia ia.—Kal. 2:20.
4. Kotea te ʼu tapuakina neʼe fakafealagia e te totogi ʼe lahi ai totatou fiafia?
4 Ko te mate ʼa Kilisito ʼe ina fakalakatonuʼi te pule faʼitaliha ʼa Sehova. ʼE ina fakafealagia te ʼateaina mai te agahala pea mo te mate. (1 Soa. 2:2) ʼE ina fakafealagia he ʼu felogoʼi lelei mo te ʼAtua pea mo avahi te ʼala ʼae ki te maʼuli heʼe gata. (Kol. 1:21, 22) ʼE toe tokoni mai ke malohi age tatatou fakatotonu ʼae ke tou fakahoko tatatou fakapapau ʼae neʼe tou fai kia Sehova pea ke tou taupau maʼu tatatou agatonu ʼi totatou ʼuhiga tisipulo ʼa Kilisito. (Mat. 16:24) ʼOfa pe ke tuputupu ʼo lahi tokotou fiafia ʼi te temi ʼae ʼe kotou teuteu ai ki te ʼAho Fakamanatu ʼae ʼe tou fakatalitali ki ai pea mo te temi ʼae ka kotou kau ai anai.