He Faʼifaʼitaki ʼo He ʼu ʼUluaki Palalau

Moʼo Kamata He ʼu Ako Tohi-Tapu ʼi Te ʼUluaki Moeaki ʼo ʼAukusito

“Tokolahi te hahaʼi ʼe natou fakaʼamu ke maʼu ia te tokalelei ʼi te malamanei katoa. Kaʼe ʼe kei hoko atu pe te ʼu tau. ʼI tau manatu la, he ko ʼe ʼe faigataʼa ia te maʼu ʼo te tokalelei ʼi te malamanei?” Tuku ke fai mai hana tali. Fakaha age ia te alatike ʼi te pasina 10 ʼo Te Tule Leʼo ʼo Sulio–Sepetepeli, mo vakaʼi ia te palakalafe ʼo te ʼuluaki fehuʼi pea mo lau age ia he vaega ʼe tuʼu ai. Kotou tuku age ki ai te ʼu nusipepa pea mo fai he fakatuʼutuʼu ke kotou toe liliu ʼo vakaʼi fakatahi mo ia te tali ki te fehuʼi ʼae ʼe hoa mai ki ai.

Nota: ʼE tonu ke fai ia te faʼifaʼitaki ʼaeni lolotoga te fono gaue ʼi te ʼaho 3 ʼo ʼAukusito.

Ko Te Tule Leʼo Sulio–Sepetepeli

“ ʼE lahi te ʼu ako ʼe feala ke tou taʼofi mai te ʼu faʼifaʼitaki ʼo te ʼu tagata mo te ʼu fafine neʼe iloa ʼi te hisitolia. ʼE mole koia koa la? [Tuku ke fai mai hana tali.] ʼE talanoa ʼi te vaega ʼaeni ki te tagata lahi neʼe haʼele mo te ʼAtua. [Lau ia Senesi 6:9.] ʼE fakamahino mai ʼi te nusipepa ʼaeni pe ko ʼe neʼe ui e te ʼAtua ko Noe neʼe ko he tagata agatonu pea mo fakaha mai he ʼu ako ʼe feala ke tou taʼofi mai tona faʼifaʼitaki.” Fakaha age te alatike ʼae ʼe kamata ʼi te pasina 12.

Réveillez-vous! ʼo ʼAukusito

“Tokolahi ia tatou ʼe tou fia maʼuʼuli ʼo heʼe gata. ʼI tau manatu la, ʼe feala anai koa ki te tagata, ʼaki ʼana fekumi, ke ina fakafealagia te maʼuli heʼe gata? [Tuku ke fai mai hana tali.] Kotou tokagaʼi te fakapapau taulekaleka ʼaeni. [Lau ia 1 Kolinito 15:26.] Kaʼe ʼe fakahoko feafeaʼi anai e te ʼAtua ia te faʼahi ʼaia? ʼAki te ʼu puleʼaki fakatoketa peʼe ʼaki he tahi age ʼu puleʼaki? Pea he ko ʼe koa ʼe tou liliu ʼo matutuʼa pea mo mamate? ʼE fakaha ʼi te nusipepa ʼaeni te ʼu tali Fakatohi-tapu ki te ʼu fehuʼi ʼaia.”