Tou Faʼifaʼitakiʼi Te Kau Polofeta—Amosi
1. He ko ʼe ʼe feala ke fakalotomalohiʼi tatou e te faʼifaʼitaki ʼo Amosi?
1 Neʼe kua kotou manatu koa ʼe mole feala hakotou faifakamafola koteʼuhi neʼe mole lelei takotou ako? Kapau koia, pea ʼe feala ke kotou maʼu he lotomalohi mai te faʼifaʼitaki ʼo Amosi. Neʼe ko he tagata tauhi ovi pea mo toli taʼukai, kaʼe neʼe foaki e Sehova kia ia te malohi ke ina tala ia he logo maʼuhiga. (Amo. 1:1; 7:14, 15) ʼE toe feia ia ʼaho nei, ʼe fakaʼaogaʼi e Sehova ia natou ʼae ʼe agavaivai. (1 Ko. 1:27-29) Kotea koa he tahi ʼu tokoni ka ʼaoga kia tatou ʼi tatatou faifakamafola ʼe tou lava maʼu mai te faʼifaʼitaki ʼo te polofeta ko Amosi?
2. He ko ʼe ʼe feala ke tou nonofo malolohi moka fakafeagai mai ʼihi ʼi tatatou faifakamafola?
2 Tou Nonofo Malolohi ʼi Te ʼu Temi Fakafeagai: Ko Amatesia, te pelepitelo neʼe tauhi ki te pipi ʼi te ʼu telepi ʼe hogofulu ʼo te puleʼaga noleto ʼo Iselaele, ʼi tana logo ki te faifakakikite ʼa Amosi, neʼe hage pe neʼe ina ui fenei kia Amosi: “Alu! Toe liliu ki ʼo koe! Kua ʼi ai tamatou lotu!” (Amo. 7:12, 13) ʼI tana kole ʼae ki te Hau ko Selopoamo ke ina tapuʼi te gaue ʼa Amosi, neʼe ʼave keheʼi e Amatesia te ʼu palalau ʼae neʼe fai age e te polofeta. (Amo. 7:7-11) Kaʼe neʼe mole mataku ia Amosi. Ia ʼaho nei, ko ʼihi takitaki lotu ʼe natou kole te tokoni ʼa te kau politike ʼi tanatou faiga ʼae ke fakatagaʼi te hahaʼi ʼa Sehova. Kaʼe ʼe fakapapau mai e Sehova ʼe to noa anai he mahafu neʼe faʼu moʼo fakafeagai mai kia tatou.—Esa. 54:17.
3. Kotea te ʼu faʼahi ʼe lua ʼo te logo ʼae ʼe tou tala ia ʼaho nei?
3 Tou Tala Te Fakamau ʼa Te ʼAtua Pea Mo Te ʼu Tapuakina ʼi Te Ka Haʼu: Logola neʼe fakakikite e Amosi te fakamau ka hoko ki te ʼu telepi ʼe hogofulu ʼo te puleʼaga ʼo Iselaele, kaʼe neʼe ina fakaʼosi tana tohi ʼae ʼi te Tohi-Tapu ʼaki te fakapapau ʼa Sehova ʼe toe liliu anai ʼihi ki te fenua pea mo natou maʼu ni tapuakina lahi. (Amo. 9:13-15) Mo tatou ʼe tou tala te hoko mai ʼo “te aho o te fakamaau” ʼa te ʼAtua, kaʼe ʼe ko he koga pe ia ʼo “te logo lelei . . . o te puleaga” ʼae ʼe tonu ke tou tala. (2 Pet. 3:7; Mat. 24:14) Hili te fakaʼauha e Sehova ia te kau agakovi ʼi Halamaketone, ʼe fakatuʼu anai te palatiso ʼi te kele.—Pes. 37:34.
4. He ko ʼe ʼe feala ke tou tui papau ʼe feala pe hatatou fai te finegalo ʼo Sehova?
4 Ka tou fakamafola te logo ʼo te Puleʼaga ʼi he malama ʼe lahi ai te kau fakafeagai, ʼe ʼahiʼahiʼi ai tatatou foaki ʼae ʼo totatou maʼuli kia Sehova pea mo tatatou fakatotonu ʼae ke tou fai tona finegalo. (Soa. 15:19) Kaʼe ʼe tou tui papau ʼe hoko atu pe anai e Sehova tana akoʼi tatou ke tou fai tona finegalo, ohage pe ko tana fai kia Amosi.—2 Ko. 3:5.