Tou Faʼifaʼitakiʼi Te Kau Polofeta—Sofoni
1. Neʼe feafeaʼi te aluʼaga ʼo Suta ʼi te temi ʼae neʼe polofeta ai ia Sofoni? He ko ʼe ʼe ko he faʼifaʼitaki lelei ʼaia kia tatou?
1 ʼI te ʼu taʼu 600 tupu, ʼI Muʼa ʼo te Temi ʼo Sesu, neʼe mafola ia te tauhi ʼae kia Paale ʼi te fenua ko Suta. Neʼe hoki matehi age pe te hau agakovi ʼae ko Amone, pea neʼe fakanofo hau leva ia te tupulaga ko Sosiasi. (2 Klk. 33:21–34:1) Lolotoga te temi ʼaia, neʼe fekauʼi e Sehova ia Sofoni ke ina fakaha Tana fakamau. Ne’e lagi kau ia Sofoni ki te famili ʼo te hau ʼo Suta, kaʼe logo la te faʼahi ʼaia neʼe mole ina ʼave keheʼi te fakamau ʼa Sehova ʼo ʼuhiga mo te hau ʼaia. (Sofo. 1:1; 3:1-4) ʼO toe feia pe mo tatou, ʼe tou faigaʼi ke tou faʼifaʼitakiʼi ia te lototoʼa ʼa Sofoni pea ʼe mole tou tuku ke fakaneke tatou e totatou famili ke ʼaua naʼa tou fakahoko fakalelei tatatou tauhi ʼae kia Sehova. (Mat. 10:34-37) Kotea ia te logo ʼae neʼe tala e Sofoni pea neʼe kotea ʼona fua lelei?
2. Kotea ʼae ʼe tonu ke tou fai ke feala ai hatatou hao ʼi te ʼaho ʼo te hauhau ʼa Sehova?
2 Kotou Kumi Ia Sehova: ʼE gata pe kia Sehova ʼe ina lava haofaki te hahaʼi ʼi te ʼaho ʼo tona hauhau. Koia neʼe uga ai e Sofoni ia te hahaʼi ʼo Suta ke natou kumi ia sehova, mo tana faitotonu, mo te fiamalalo, heʼe kei maʼu pe te temi. (Sofo. 2:2, 3) ʼO toe feia pe mo tatou, ʼe tou faʼifaʼitakiʼi ia Sofoni, ʼo tou uga te hahaʼi ke natou kumi ia Sehova. Kaʼe ʼe tonu foki mo tatou ke ʼaua naʼa tou “maliu kehe” mai ia Sehova. (Sofo. 1:6) ʼE tou kumi ia Sehova ʼaki tatatou ako fakalelei ia tana Folafola pea mo tou kole tana takitaki. ʼE tou kumi tana faitotonu mo kapau ʼe lelei ia tatatou aga. ʼE tou kumi ia te fiamalalo mo kapau ʼe tou fia fakalogo pea mo tali gafua ia te takitaki ʼa te kautahi ʼa Sehova.
3. He ko ʼe ʼe mole tonu ke tou lotovaivai ʼi te minisitelio?
3 Te ’u Fua Lelei: Ko ʼihi ʼi Suta neʼe natou tali ia te fakamau ʼae neʼe tala e Sofoni, tafitō ia te tupulaga ʼae ko Sosiasi, ʼae neʼe ina kumi ia Sehova talu mai tana kei tamasiʼi. Ki muli age leva, neʼe fakamaʼa e Sosiasi ia te fenua mai te ʼu tauhi taulaʼatuā. (2 Klk. 34:2-5) Ia ʼaho nei, logo la ʼe ʼi ai ʼihi pulapula ʼo te Puleʼaga ʼe to ʼi te ʼu ala, peʼe ʼi te kele ʼae ʼe makamaka, peʼe ʼi te vao talatala, kaʼe ʼe ʼi ai pe ʼihi pulapula ʼe to ʼi te kele lelei pea fua. (Mat. 13:18-23) ʼE tou tui papau ʼe haga tapuakiʼi anai tatou e Sehova mo kapau ʼe tou haga maʼumaʼua ʼi te nunusi ʼo te pulapula ʼo te Puleʼaga.—Pes. 126:6.
4. He ko ʼe ʼe tonu ke tou haga atalitali kia Sehova?
4 Ko ʼihi ʼi Suta neʼe natou manatu ʼe mole fakahoko anai e Sehova tana fakatuʼutuʼu. Kaʼe neʼe fakamoʼoni e Sehova kua vave hoko mai tona ʼaho. (Sofo. 1:12, 14) ʼE haofaki pe anai ia natou ʼae neʼe natou kumi te puipui ia te ia. (Sofo. 3:12, 17) Koia tou haga atalitali kia Sehova pea mo tou fiafia ʼi te tauhi ʼi te logotahi mo natou ʼae ʼe tauhi ki totatou ʼAtua lahi.—Sofo. 3:8, 9.