Taʼu Teau Mo Te Fakamafola ʼo Te Puleʼaga!
1. Kotea ʼae neʼe fakalotomalohiʼi ke fai e te hahaʼi ʼa te ʼAtua talu mai teitei taʼu ʼe teau?
1 “Kotou fakatokagaʼi, te Hau ʼe ʼafio! Ko koutou ko tana hahaʼi ʼave logo. Kotou tala, kotou tala, kotou tala te Hau pea mo tona puleʼaga.” Neʼe fai te ʼu palalau ʼaia e te tehina ko Rutherford kua hili ki ai taʼu ʼe teau. Neʼe fakalotomalohiʼi ia te hahaʼi ʼa Sehova ke natou fakamafola ia te logo ʼo te Puleʼaga ki te potu taupotu ʼo te kele. Pea neʼe natou fakahoko ia te faʼahi ʼaia. Ohage pe ko te kau ʼuluaki Kilisitiano, ʼe tou fakamafola ia te logo lelei ʼo te puleʼaga “ki te u tagata fuli i te lalo lagi.” (Kol. 1:23) Kapau ʼe tou tokagaʼi ia te ʼu taʼu ʼe teau ʼaeni kua ʼosi, kotea ʼae neʼe kua fai moʼo fakamafola te Puleʼaga ʼo te ʼAtua? ʼI te kua fakaovi mai ʼo te katoa ʼo te ʼu taʼu ʼe teau ʼo te Puleʼaga, ʼe tou lava hoko atu feafeaʼi ia te fakamafola ʼo te Puleʼaga?
2. Neʼe fakaha feafeaʼi ʼi ʼatatou nusipepa ia te Puleʼaga ʼo te ʼAtua?
2 Te ʼu Fakamanatu:Talu mai fualoa mo te fakaha ʼi ʼatatou tohi Fakatohi-tapu ia te Puleʼaga ʼo te ʼAtua. Talu mai te taʼu 1939, neʼe fakahigoaʼi ʼatatou nusipepa Ko Te Tule leʼo ʼe Ina Kalagaʼi Te Puleʼaga ʼo Sehova (Fakapilitania). Ko te nusipepa ʼaia ʼe palalau tuʼumaʼu ki te Puleʼaga pea mo te ʼu aluʼaga ʼae ka ina fakahoko anai ʼi te ka haʼu. ʼE toe talanoa ia te Réveillez-vous ! ki te Puleʼaga ʼae ko te ʼamanaki pe ʼe tahi maʼa te malamanei. Koia, ko te ʼu nusipepa ʼaia ʼe lua ʼe lahi tona fakaliliu mo tona tufaki ʼi te malamanei katoa.—Apk. 14:6.
3. Kotea ʼihi faʼahiga puleʼaki neʼe tou fakaʼaogaʼi moʼo fakamafola te Puleʼaga?
3 Neʼe fakaʼaogaʼi e te hahaʼi ʼa Sehova ia he ʼu faʼahiga puleʼaki kehekehe moʼo fakamafola te Puleʼaga. Ohage la ʼi te kamata, neʼe natou fakaʼaogaʼi ia he ʼu motoka neʼe fakapipiki ki ai te ʼu fakatagi mo ʼona mikolo, mo he ʼu polokalama latio pea mo he ʼu fakatagi feʼaveʼaki. Ko te ʼu faʼahiga puleʼaki ʼaia, neʼe tokoni age ke natou fakamafola ia te logo lelei ki te tokolahi ʼi te temi ʼae neʼe kei tokosiʼi ai te kau faifakamafola. (Pes. 19:5) ʼI te ʼu taʼu ʼaeni kua hili, neʼe tou maʼu he ʼu logo ʼi te Neti jw.org ʼe fakaha ai ia te Puleʼaga ki te toko lau ʼi miliona hahaʼi ʼo kau ai mo natou ʼae ʼe maʼuʼuli ʼi te ʼu fenua ʼae ʼe tapuʼi ai te gaue faifakamafola.
4. Kotea ia te ʼu fakatuʼutuʼu neʼe natou fai ʼo ʼuhiga mo te gaue faifakamafola?
4 ʼO toe feia pe, ko te kau fakamoʼoni ʼa Sehova neʼe natou fai he ʼu fakatuʼutuʼu makehe moʼo fakamafola ia te logo ʼo te Puleʼaga. Ohage la, talu mai te ʼu taʼu 1990, neʼe natou faiga malohi ke natou hikihiki tanatou fakamafola ʼi te ʼu ʼapi, mo te ʼu lapalasi, mo te ʼu taulaga motoka pea mo te ʼu fale koloa. Mole faʼa fualoa ki ai, neʼe natou fakatuʼutuʼu ia te faifagonogono faigamalie ʼi te ʼu kolo lalahi ʼo te malamanei. Tahi ʼae faʼahi, neʼe lahi te ʼu kokelekasio neʼe natou lagolago ki te faifakamafola ʼae ʼi te ʼu ala, ʼi te ʼu laupapa pea mo te ʼu koga meʼa ʼae ʼe lahi ai te fakalaka ʼa te hahaʼi. Kaʼe ko te fakatuʼutuʼu maʼuhiga ʼo te gaue faifakamafola, ʼe ko te faifakamafola ʼi te ʼu ʼapi.—Gaue 20:20.
5. Kotea ʼae ʼe feala ke kotou fai ʼi te taʼu gaue ʼaeni ka kamata?
5 Te Ka Haʼu: ʼI te taʼu gaue ʼae ka kamata anai ʼi te mahina ʼo Sepetepeli, ʼe tokolahi anai ia natou ʼe natou pionie katoa. ʼE kotou fia kau koa ia natou ʼaia? Kapau ʼe mole feala, ʼe feala koa ke kotou pionie vaelua ʼi temi? Tatau aipe pe kotou pionie peʼe kailoa, kaʼe ʼe tapuakinaʼi anai ʼe Sehova ia te ʼu sakilifisio ʼae ʼe kotou fai moʼo fakamafola te Puleʼaga.—Mala. 3:10.
6. He ko ʼe ʼe tonu ke makehe ia te mahina ʼo Oketopeli 2014?
6 ʼI te mahina ʼo Oketopeli 2014 ʼe fakaʼiloga ai anai ia te kua taʼu teau ʼa te ʼafio ʼo te Puleʼaga. Ko te tupuʼaga la ʼaia ʼo te fakaha tafitō ʼi Te Tule Leʼo ki te tufa ia te Puleʼaga ʼo te ʼAtua. ʼE tou faiga malohi anai ke tou kau ki te tufa ʼo te nusipepa ʼaia ki te hahaʼi fuli. ʼAki tatatou haga sisio ki muʼa, ʼe tonu ke tou “fakaha . . . te logo lelei o te puleaga o te Atua” kia natou ʼae ʼe fia logo.—Gaue 8:12.