Fakaʼaogaʼi Tatatou Tuʼasila ʼi Te Neti jw.org ʼi Tatatou Minisitelio—“Kotou Kaumeʼa Mo Sehova”

ʼI tatatou tuʼasila jw.org, ʼi te faʼahi ʼae “LA BIBLE ET VOUS” ʼe maʼu ai he pasina maʼa te ʼu tamaliki ko tona kupu tafitō ʼaeni “Kotou Kaumeʼa mo Sehova.” ʼE maʼu ai he ʼu hiva, mo he ʼu ʼata viteo pea mo he ʼu gaoʼi. Neʼe kua kotou fakaʼaogaʼi koa ia te pasina ʼaia ʼi te faifakamafola? Kapau ʼe kotou ako mo he tahi ʼe ʼi ai hana fanau, kotou fakaha age ia te pasina ʼaia ʼae ʼi te Neti, ke feala ai hana fia sioʼi fuli.

Neʼe tufa e te tehina ia te kiʼi pepa lotu Te ʼu Logo ʼo Te Puleʼaga N° 38, ki he fafine neʼe fia logo pea neʼe ina fia lau atu aipe. ʼE ʼi ai tana kiʼi fanau ʼe natou fia iloʼi meʼa fuli ʼo natou fia sioʼi ai te kiʼi pepa lotu. Neʼe fakaha fakavilivili e te tehina te kiʼi pepa lotu pea mo ina fakaha age tatatou tuʼasila ʼae ʼi te Neti. ʼI tana sio ki te fia mahino ʼa te fafine neʼe fakaha age ai e te tehina ʼi tana kiʼi masini te viteo ʼo Kalepe ki te fafine mo tana kiʼi fanau.

Ko he tuagaʼane ʼe fai palalau mo hona kaugā gaue ʼe ʼi ai ʼana kiʼi fanau. ʼE ina fakaha age tatatou tuʼasila ʼi te Neti, ʼe ina maʼu ai ia he ʼu tokoni ʼo ʼuhiga mo te maʼuli fakafamili. Neʼe kumi e te fafine mo ʼana kiʼi fanau ia tatatou tuʼasila jw.org. Ki muli age, neʼe fakamatala e te fafine ki te tuagaʼane ia te feleleʼaki ʼi tuʼa ʼo ʼana kiʼi fanau pea mo natou hiva “Fakamafola Te Folafola,” ko he hiva neʼe natou maʼu ʼi te pasina “Kotou Kaumeʼa mo Sehova.”

Tou fakamamahani mo tatatou tuʼasila jw.org pea mo toʼo mai ai te ʼu ʼata viteo, mo te ʼu hiva pea mo te ʼu kiʼi gaoʼi. Kapau ʼe tou fai ia te faʼahi ʼaia, pea ʼe feala ai leva ke tou fakaʼaogaʼi ʼi tatatou minisitelio. ʼE ko he meʼa gaue ʼaia ʼe tokoni mai ki tatatou tauhi ʼae ki te ʼAliki.—Gaue 20:19, MN.