Tou Faʼifaʼitakiʼi Te Kau Polofeta—Hapakuke
1. He koʼe ʼe feala ke tou faʼifaʼitakiʼi ia te polofeta ko Hapakuke?
1 ʼI te kua lahi ʼo te agakovi ʼi te malama ʼaeni, ʼe lagi tou hage anai ko Hapakuke ʼae neʼe ina fehuʼi fenei kia Sehova: “Kotea e ke fakasio ai au ki te agakovi, pea e ke sio ai ki te hee faitotonu?” (Hap. 1:3; 2 Tim. 3:1, 13) Kapau ʼe tou metitasio ki te logo ʼa Hapakuke pea mo tana faʼifaʼitaki agatonu, ʼe tokoni mai anai ke tou faʼa kataki ʼo fakatalitali ki te ʼaho fakamau ʼa Sehova.—2 Pet. 3:7.
2. ʼE tou lava fakaha feafeaʼi ʼe tou maʼuʼuli ia ʼaho nei ʼuhi ko tatatou tui?
2 Maʼuli ʼUhi Ko Te Tui: Neʼe nofo tokaga ia Hapakuke pea mo faʼafai ʼi te faʼahi fakalaumalie kaʼe neʼe mole ina tuku ʼona fihifihia ke ina fakalotomamahiʼi ia ia. (Hap. 2:1) Neʼe fakapapauʼi e Sehova ki te polofeta ʼe hoko moʼoni anai Tana folafola ʼi tona temi totonu. Pea “e mauli anai te tagata agatonu i tana tui.” (Hap. 2:2-4) Kotea tona fakaʼuhiga ki te kau Kilisitiano ʼae ʼe maʼuʼuli ʼi te ʼu temi fakaʼosi ʼaeni? ʼE mole ʼaoga ke tou iloʼi te temi ʼae ʼe hoko mai ai te fakaʼosi kaʼe ke tou tui papau ʼe hoko mai anai. Ko te tui ʼe ina ʼekenaki tatou ke tou nonofo tokakaga pea mo faʼafai ʼi te faifakamafola.—Hep. 10:38, 39.
3. He koʼe ʼe tonu ke tou taupau totatou fiafia ʼi te tauhi kia Sehova?
3 Fakafiafia Ia Sehova: Ka ʼohofi anai e Koke ʼo Makoke ia te hahaʼi ʼa Sehova, ʼe ʼahiʼahiʼi anai tatatou tui. (Esk. 38:2, 10-12) Pea ʼe ʼi ai anai he ʼu ʼahiʼahi ʼuhi ko te fakafeagai ʼo feala pe ke natou malo ai. ʼE hoge anai te meʼa kai, mo puli ʼotatou koloa pea mo faigataʼa anai te maʼuli. Kotea ʼae ka tou fai anai moka hoko mai te ʼu fihifihia ʼaia? Neʼe iloʼi e Hapakuke ʼe felaveʼi anai mo he ʼu ʼahiʼahi, koia ʼae neʼe ina fakatotonu ai ke ina taupau tana fiafia ʼi te tauhi kia Sehova. (Hap. 3:16-19) “Ko te fiafia o [Sehova]” ʼe toe tokoni mai anai ke tou katakiʼi te ʼu ʼahiʼahi ʼae ʼi te ka haʼu.—Nee. 8:10; Hep. 12:2.
4. Kotea ia te fiafia ʼe feala ke tou maʼu ia ʼaho nei pea mo te ka haʼu?
4 Ko natou ʼae ka haofaki anai e Sehova ʼi tona ʼaho fakamau, ʼe haga akoʼi anai natou ki te faʼahiga maʼuli ʼae ʼe leleiʼia e te ʼAtua. (Hap. 2:14) Pea ko natou ʼae ka fakatuʼuake ʼe natou toe ako anai ʼo ʼuhiga mo Sehova. Ia ʼaho nei, ʼe feala ke tou toʼo ia te ʼu faigamalie fuli moʼo palalau ʼo ʼuhiga mo Sehova pea mo ʼana gaue taulekaleka.—Pes. 34:2; 71:17.