Ke Lelei Age Tatatou Faifakamafola​—Tou Foaki He Tokoni ʼe ʼAoga

HE KOʼE ʼE MAʼUHIGA? ʼE fakaafe e te ʼu tehina fakanofo mo te tahi ʼu ovi te ʼu hahaʼi kehekehe ke natou “toʼo noa te vai ʼo te maʼuli.” (Fkh 22:17) Ko te vai ʼaia ʼe ina fakata te ʼu fakatuʼutuʼu fuli ʼa Sehova moʼo haofaki te hahaʼi fakalogo mai te agahala pea mo te mate. Moʼo tokoni ki te hahaʼi ʼae ʼe agaʼi fenua mo lotu kehekehe, ʼe tonu ke tou fakaha kia natou te “logo lelei ʼae ʼe heʼe gata” ke feala ai ke malave ki ʼonatou loto.—Fkh 14:6.

TE ʼU MEʼA ʼAE ʼE TONU KE KOTOU FAI:

• Filifili he manatu mo he vaega ʼe malave anai ki te loto ʼo te hahaʼi ʼo tokotou telituale. ʼE feala hakotou fakaʼaogaʼi he faipalalau peʼe ko he manatu neʼe fua lelei ki te hahaʼi. Ko te ʼu manatu mo te ʼu vaega fea ʼe tali leleiʼi e te hahaʼi? ʼE ʼi ai koa he aluʼaga neʼe hoko ʼe natou faipalalau ki ai? Kotea he manatu ʼe leleiʼia e he tagata peʼe ko he fafine?

• Fakaʼaogaʼi te ʼu fakamalo ʼae ʼe fai mahani ʼi tokotou telituale.—2Ko 6:3, 4

• Vakavakaʼi te ʼu tohi mo te ʼu ʼata viteo ki te ako moʼo fakaha ki he tahi ʼe lotolelei ki ai

• Toʼo ʼi tatatou tuʼasila ʼi te Neti ni tohi mo ni ʼata viteo ʼi te ʼu lea ʼa te hahaʼi ʼi tokotou telituale

• Fakaalu tahi ʼakotou palalau mo te meʼa ʼae ʼe ʼaoga ki te kilisitiano. (1Ko 9:19-23) Ohage la, kotea ʼe kotou ui anai mo kapau neʼe mate he tahi neʼe ʼofa mamahi ai?

VAKAʼI TE ʼATA VITEO PEA MO TALI KI TE ʼU FEHUʼI ʼAENI:

• Kotea te manatu neʼe fakaʼaogaʼi e te tehina moʼo kamata te faipalalau?

• Kotea te aluʼaga neʼe hoko ʼi te maʼuli ʼo te tagata?

• Ko te vaega fea neʼe alu tahi mo te aluʼaga ʼaia? Kotea tona tupuʼaga?

• ʼE feafeaʼi hakotou fetogi ʼakotou faʼahiga faipalalau ke malave ki te loto ʼo te hahaʼi ʼi tokotou telituale?