He Koʼe ʼe Mole Ke Kau Ki Te Ako ʼo Te Kau Faifakamafola ʼo Te Puleʼaga?

ʼE ke kau koa ʼi te kau pionie katoa ʼae ʼe taʼu 23 ki te taʼu 65? ʼE lelei koa tou maʼuli malolo? ʼE feala koa ke ke alu ʼo tauhi kia Sehova ʼi te ʼu koga meʼa ʼae ʼe ʼaoga lahi ai he kau faifakamafola? Kapau ʼe ke ʼio ki te ʼu fehuʼi ʼaia, neʼe kua ke fakakaukauʼi koa ke ke kau ki te Ako ʼo Te Kau Faifakamafola ʼo Te Puleʼaga? Talu mai te ʼuluaki ako, neʼe kau ki ai te ʼu lauʼi afe taumatuʼa, pea mo te ʼu tehina mo tuagaʼane selipatea. Kae, kei ʼaoga lahi pe he ʼu tehina selipatea ke kau ki te ako ʼaia. Koia, kole kia Sehova ke ina fakatuputupu tau fia fakafiafiaʼi tona loto pea mo faʼifaʼitakiʼi tona ʼAlo. (Pes 40:9; Mat 20:28; Hep 10:7) Kapau ʼe ʼi ai hou ʼu maʼua fakafamili, peʼe ko hau gaue, peʼe ke tuʼu maʼua, fakakaukau pe ʼe feala ke ke fai he ʼu fetogi ke feala hau kau ki te ako ʼaia.

ʼI te ʼosi ʼo te ako fakateokalatike ʼaia, kotea te ʼu faʼahiga selevisi ʼe hinoʼi ki ai te kau maʼu pepa? Neʼe hinoʼi ʼihi ki he ʼu koga meʼa ʼe palalauʼi ai he tahi ʼu lea, peʼe ke natou fakaʼaogaʼi lahi tonatou temi moʼo fai laupapa ʼi te ʼu koga meʼa ʼae ʼe lahi ai te hahaʼi. Pea ko ʼihi tehina ʼe natou fetogi te ʼu taupau ʼo te siliko, peʼe liliu ʼo taupau fakasiliko, peʼe misionea. ʼI tau fakakaukauʼi te ʼu faʼahiga selevisi ʼae ʼe feala ke ke fai, ke ke maʼu te manatu ʼaeni ʼa te polofeta ko Esaia: “Koeni au, ke ke fekau au.”—Esa 6:8.

VAKAʼI TE ʼATA VITEO TE KAU MISIONEA: KO HE KAU GAUE ʼI TE TAʼUKAI, PEA MO TALI KI TE ʼU FEHUʼI ʼAENI:

• 

  ʼE filifili feafeaʼi te kau misionea?

• 

  Kotea te gaue lelei ʼae ʼe fai e te kau misionea?

• 

  Fakaha he ʼu tapuakina ʼe maʼu ʼi te selevisi misionea?