Tufa Makehe ʼi Sepetepeli Moʼo Kamata He ʼu Ako Tohi-Tapu

ʼI te mahina ’o Sepetepeli, ’e tou faiga anai ke tou kamata he ’u ako Tohi-Tapu ʼaki te kaupepa Ke Ke Fiafia ʼo Heʼe Gata. ʼE feala ke kotou pionie vaeluaʼi temi ʼo kotou fai ni hola ʼe 30. Kotea ʼae ka tou fai anai ʼi te tufa makehe ʼaia?

• ʼUluaki Faipalalau: Kotou fakaʼaogaʼi ia te pasina fakaʼosi moʼo kamata ʼaki he faipalalau pea mo faʼifaʼitakiʼi te agaaga fai ʼo he ako Tohi-Tapu. Kotou manatuʼi ia natou ʼae neʼe kotou ʼaʼahi. Logo la neʼe mole natou tali ke fai hanatou ako ʼi muʼa atu, kae ʼe feala ke natou fia fai ki tatatou faʼahiga fai ako foʼou mo tatatou kaupepa. ʼE mole tonu ke tou tuku te kaupepa ʼi te ʼu ʼapi peʼe tou momoli ʼi ʼatatou tohi kia natou ʼae neʼe mole natou tali ʼi muʼa atu. ʼE feala ke fai e te Komite Gaue ʼo Te Kokelekasio he ʼu fakatuʼutuʼu ke ʼi ai ʼihi vahe gaue ʼe fai lolotoga te mahina.

• Te Tahi ʼu Faigamalie: Kapau ʼe fakaʼaogaʼi e tokotou kokelekasio te ʼu laupapa, kotou fakaha ai te kaupepa Ke Ke Fiafia ʼo Heʼe Gata. Kotou fakaha kia natou ʼae ʼe fia logo ʼe feala ke fai hana ako Tohi-Tapu ʼe mole totogi ʼaki te kaupepa ʼaia. Kotou fakaha fakavilivili age pe tona faʼahiga fai peʼe kotou fakatuʼutuʼu ke kotou fai ʼi he tahi age temi. ʼE feala ke fai e te taupau gaue he ʼu fakatuʼutuʼu ke olo he kau faifakamafola faiva ki te ʼu matani gaue pea mo kamata he ʼu ako Tohi-Tapu. ʼE toe feala pe hakotou kole ki hokotou kaugā gaue ke fai hana ako peʼe ko he tahi pe ʼe kotou felaveʼi mo ia.

Neʼe fakatotonu mai e Sesu ke tou “fai ni tisipulo,” pea mo “akoʼi natou.” (Mat 28:19, 20) ʼOfa pe ke tou lava fakahoko te fakatuʼutuʼu ʼaia lolotoga tatatou tufa makehe ʼaki te kaupepa ʼaeni Ke Ke Fiafia ʼo Heʼe Gata.