Neʼe maʼu ʼi te kolo ko Ninive ni fale lalahi
Kua Kotou Ilo’i Koa?
Kotea ʼae neʼe hoko ki Ninive hili te temi ʼo Sonasi?
ʼI TE fitu sekulo I.M.T.S.,a neʼe liliu ia Asilia ko te puleʼaga ʼae neʼe malohi ʼaupito ʼi te malamanei. Neʼe fakamahino ʼi te pasina neti ʼa te British Museum, neʼe puleʼi e Asilia te potu uesite ʼo Chypre ʼo kaku ki te potu esite ʼo Iran. Neʼe ina toe puleʼi foki ia Esipito lolotoga ni taʼu. Ko tona kolo muʼa neʼe ko Ninive pea neʼe ko te kolo lahi ʼaia ʼi te malamanei. Neʼe maʼu ai ni maka fakamanatu lalahi, mo ni ʼoloto taulekaleka, mo ni fale hau matalelei pea mo ni fale tohi lalahi. ʼE ha ʼi te ʼu meʼa ʼae neʼe togi ʼi te ʼu kaupa ʼi Ninive neʼe fakaʼuhiga e te Hau ko Osenapale ia ia ko te “hau ʼo te malamanei” ohage ko tona fai e ʼihi hau ʼo Asilia. ʼI te temi ʼaia, neʼe mole feala ke tauʼi ia Asilia mo Ninive.
ʼI te temi ʼaia ko Asilia neʼe ko he Puleʼaga Malohi ʼi te Malamanei
Kae ʼi te liliu ʼa Asilia ʼo malohi ʼaupito, neʼe fakakikite e te polofeta ʼa Sehova ko Sofoni: “E . . . maumaui anai [“e Sehova”, NWT] ia Asilia, pea e ina fakaliliu anai ia Ninive ko he kele lavaki, ko he kele magemage o hage ko te toafa.” Pea neʼe toe fakakikite fenei e te polofeta ʼa Sehova ko Naume: “Kotou kaihaʼa te siliva! Kotou kaihaʼa te aulo!” . . . “ʼE mole kei nofoʼi te kolo, kua tuʼu lavaki pea kua maumauʼi!” . . . “Ko natou fuli ae e sisio anai kia koe e feholaki anai o mamao ia koe. Pea e ui anai: Kua maumau ia Ninive!” (Sofo. 2:13; Nau. 2:9, 10, NWT; 3:7) ʼI te logo ʼa te hahaʼi ki te ʼu lea fakapolofeta ʼaia, neʼe natou feuiʼaki fenei: ‘ʼE hoko moʼoni anai koa? ʼE feala koa ʼi he aho ke tauʼi ia te puleʼaga malohi ko Asilia?’ Neʼe natou manatu ʼe mole feafeala anai ia.
Kua pulinoa ʼosi ia te kolo ko Ninive
Kae neʼe ko te aluʼaga ʼaia neʼe hoko. ʼI te fakaʼosi ʼo te fitu sekulo I.M.T.S., neʼe ʼohofi e te kau Papiloni mo te kau Meti ia Asilia. Pea neʼe mole kei nofo he tahi ʼi Ninive, neʼe kua galoʼi e te hahaʼi te kolo ʼaia. Neʼe ui ʼi te tohi The Metropolitan Museum of Art, New York “kua ʼosi te temi palalau ki te kolo ʼaia pea ʼe iloʼi e te hahaʼi ia Ninive ʼuhi pe ko te Tohi-Tapu.” ʼE ui ʼi te The Biblical Archaeology Society “neʼe mole iloʼi e he tahi pe neʼe tuʼu moʼoni te kolo muʼa ʼo Asilia.” Kae ʼi te 1845, neʼe fai leva e te tagata alekeolosia ko Austen Henry Layard ni fekumi ʼi te kolo ko Ninive. ʼE ha ʼi te ʼu fekumi neʼe ina maʼu ko Ninive neʼe ko he kolo matalelei.
Koia, neʼe hoko moʼoni te ʼu lea fakapolofeta ʼo ʼuhiga mo Ninive. Pea ʼe tou tui papau ʼe toe hoko moʼoni anai mo te ʼu lea fakapolofeta ʼo ʼuhiga mo te fakagata ʼo te ʼu malohi fakapolitike ia ʼaho nei.—Tan. 2:44; Fkha. 19:15, 19-21.
a Ko te ’u mata’i tohi ’aeni I.M.T.S. ko tona faka’uhiga: ’I Mu’a ’o te Temi ’o Sesu.