Te ʼu Fehuʼi ʼa Te Kau Lautohi

Ko te ʼu palalau ia Pesalemo 12:7 “ ʼe ke tokaga anai kia natou” ʼe fakaʼuhiga koa ki “te kau fakaʼofaʼofa” (ʼi te vaega 5) peʼe ki “te ʼu folafola ʼa Sehova” (ʼi te vaega 6)?

ʼAki te ʼu vaega ʼi muʼa atu ʼo te vaega 7 ʼe tou mahino ai ʼe fakaʼuhiga ki te hahaʼi.

Ia Pesalemo 12:​1-4 ʼe ui ai “kua pupuli te kau agatonu ʼi te lotolotoiga ʼo te hahaʼi.” Pea ia Pesalemo 12:​5-7 ʼe hoko atu leva fenei:

ʼE palalau ʼi te vaega 5 ki te ʼu meʼa ʼae ka fai e te ʼAtua maʼa te kau fakaʼofaʼofa. ʼE ina haofaki anai natou.

ʼE hoko atu ʼi te vaega 6: “Ko te ʼu folafola ʼa Sehova ʼe maʼa . . . hage ia ko he siliva.” ʼE ko te manatu ʼaia ʼa te kau Kilisitiano fuli ʼae ʼe natou tauhi kia Sehova.—Pes. 18:30; 119:140.

Tou vakaʼi leva te vaega 7, ʼae ʼe hoa mai ki ai. ʼE ui ai: “Sehova e, ʼe ke tokaga anai kia natou. ʼE ke puipui anai ia natou fuli mai te taʼiake ʼaia ʼo talu ai.” ʼE fakaʼuhiga kia ai te kupu “natou”?

ʼUhi ʼae ʼe hoa ia te vaega 7 ki te 6 ʼae ʼe talanoa ai ki “te ʼu folafola ʼa Sehova” koia ʼe manatu ai ʼihi ko te kupu “natou” ʼe fakaʼuhiga ki te ʼu folafola ʼa te ʼAtua. Pea ʼe tou iloʼi neʼe puipui e te ʼAtua ia te Tohi-Tapu mai te ʼu faiga ʼa te kau fakafeagai ke natou tapuʼi pea mo pulihi.—Esa. 40:8; 1 Pet. 1:25.

Kae ʼe toe moʼoni foki te puipui ʼa Sehova ia te hahaʼi ʼae ʼe palalau ki ai ʼi te vaega 5. ʼE tokoni pea mo ina haofaki “te kau fakaʼofaʼofa” pea mo natou “ ʼe gaohi koviʼi.” Pea ʼe hoko atu pe anai tana fai ia te faʼahi ʼaia.—Sopo 36:15; Pes. 6:4; 31:​1, 2; 54:7; 145:20.

Koia, ʼe fakahagahaga kia ai te kupu “natou” ʼi te vaega 7?

Ka tou vakaʼi fakalelei ia te Pesalemo katoa ʼaia, ʼe tou mahino ai ʼe fakahagahaga te kupu “natou” ki te hahaʼi.

ʼE talanoa ʼi te kamata ʼo te Pesalemo 12 ʼo ʼuhiga mo “te kau agatonu” ʼae neʼe loiʼi e te kau agakovi. Pea hili ʼaia ʼe ui ai ʼe pulihi anai e Sehova ia natou ʼae ʼe gutukaka. ʼE fakaha lelei mai ʼi te pesalemo ʼaia ʼe feala ke tou falala ʼe puipui e te ʼAtua tana hahaʼi he ʼe ko tana ʼu folafola ʼe maʼa.

Koia ʼe ui mai leva ʼi te vaega 7, ʼe tokaga mo puipui anai e Sehova ia “natou” ʼae ʼe gaohi koviʼi e te kau agakovi.

Ko te kupu “natou” neʼe fakaliliu mai te ʼu tohi ʼe tuha mo te falala pea neʼe hiki ʼo te Koga Tohi-Tapu Fakahepeleo. Ko te Septante, te fakaliliu ʼo te Koga Tohi-Tapu Fakahepeleo ki te Fakakeleka, ʼe fakaliliu ai ʼaki te kupu “tatou” tuʼa lua ʼi te vaega ʼaia. Koia ʼe fakaʼuhiga pe ia te kupu ʼaia ki te ʼu hahaʼi agatonu ʼae ʼe “fakaʼofaʼofa” pea mo “gaohi koviʼi.” Pea ʼo mulimuli ki te vaega ʼaia, ko “natou fuli” ʼaia ʼe puipui anai “mai te taʼiake ʼaia” ʼae ko te hahaʼi ʼae ʼe natou “mafola te aga fakalialia.” (Pes. 12:​7, 8) Tahi ʼae, ʼe fakaliliu fenei ʼi te tahi fakaliliu ʼo te ʼu Koga Tohi-Tapu Fakahepeleo ʼi te Fakaalamea te vaega 7, ʼi te kamata: “Ko koe, ʼALIKI e, ʼe ke tokaga anai ki te kau faitotonu, ʼe ke puipui anai natou ʼo talu ai mai te taʼiake agakovi ʼaeni.” ʼE toe fakamoʼoni ai ʼe mole fakahagahaga ki te ʼu folafola ʼa te ʼAtua.

Koia, ʼe foaki e te vaega ʼaia he ʼamanaki ki “te kau agatonu” ʼe fai anai e te ʼAtua he meʼa maʼa natou.