ʼE Fakamataku Te Tau
ʼE hoko ni aluʼaga fakamataku ki te hahaʼi ʼae ʼe maʼuʼuli ʼi ni fenua ʼe hoko ai te tau. ʼE iloʼi e te kau solia pea mo te hahaʼi ʼo te fenua te ʼu fua kovi ʼo te tau.
TE KAU SOLIA
“ ʼE ke sio tuʼumaʼu ki ni aluʼaga fakamataku, ohage la ko ni lavevea peʼe ko ni mate ʼi ʼou tafaʼaki. Kua ke mataku tuʼumaʼu pe.”—Gary, mai Pilitania.
“Neʼe au lavea ʼi toku fofoga mo toku tuʼa ʼi te ʼu foʼi pulu. Pea neʼe au sio ki te hahaʼi tokolahi neʼe mamate ʼo kau ai te tamaliki mo te hahaʼi matutuʼa. ʼE fakaliliu koe e te tau ʼo agamalohi.”—Wilmar, mai Colombie.
“Ka ke sio ki he fanahi ʼo he tahi ʼi ʼou muʼa, ʼe mole faigafua tona galoʼi. ʼE ke logo tuʼumaʼu pe ki tana kalaga mo tana tagi. ʼE mole feala ke galoʼi ʼi he temi.”—Zafirah, mai Amelika.
TE HAHAʼI ʼO TE FENUA
“Neʼe au ui au neʼe mole feala ke au toe fiafia. ʼE ke tuʼania ʼo ʼuhiga mo koe totonu, kae lahi age tau tuʼania ʼo ʼuhiga mo tou famili mo ʼou kaumeʼa.”—Oleksandra, mai Ukraine.
“ ʼE fakamataku tau fakaʼatu ke maʼu hau meʼa kai ʼi te hola lua mafoata ki te matahi poʼuli heʼe feala pe ke fanahi koe.”—Daler, mai Tadjikistan.
“Neʼe mamate ʼaku matuʼā ʼi te tau. Pea neʼe mole kei ʼi ai he tahi ke ina fakapelepeleʼi mo tokaga kia au.”—Marie, mai Rwanda.
ʼE moʼoni foki neʼe natou mamahi ʼuhi ko te tau kae kua natou fimalie. ʼE natou tui papau ʼe fakagata fuli anai te tau mo te agamalohi. Pea ʼi Te Tule Leʼo ʼaeni ʼe fakamahino ai peʼe hoko feafeaʼi anai te faʼahi ʼaia ʼaki te Tohi-Tapu.