Ke Ke Maʼu Te Faʼahiga Manatu ʼa Sehova Pea Mo Sesu

1-2. (1) Kotea te ʼu aluʼaga ʼe ʼi ai tonatou pikipikiga mo totatou ʼofa ʼae kia Sehova? (2) Neʼe fakaha feafeaʼi e Sesu neʼe ʼofa ia Sehova mo tona ʼatamai katoa?

“ ʼE TONU ke ke ʼofa kia Sehova tou ʼAtua ʼaki tou loto katoa, mo tou maʼuli katoa, mo tou malohi katoa pea mo tou ʼatamai katoa.” (Luka 10:27) Neʼe fakamahino lelei e Sesu ʼe maʼuhiga lahi age te fakatotonu ʼaia, ʼi te Lao ʼa Moisese. Kotou tokagaʼi, ʼe ʼi ai te pikipikiga ʼo totatou ʼofa ʼae kia Sehova mo totatou loto, ʼae ʼe fakaʼuhiga ki ʼotatou holi mo te ʼu meʼa ʼae ʼe tou logoʼi. ʼE ʼi ai mo tona tahi pikipikiga mo te foaki ʼo totatou maʼuli katoa kia te ia, ʼo feia mo totatou malohi. Kae, ʼe toe ʼi ai foki mo tona tahi pikipikiga mo tatatou faʼahiga manatu. ʼE moʼoni, ʼe mole tou mahino katoa anai ki te manatu ʼa Sehova. Kae ʼe feala pe ke tou mahino lelei ki ai, ʼaki tatatou ako “te manatu ʼa Kilisito.” Kotea tona tupuʼaga? Koteʼuhi ʼe ina iloʼi lelei te manatu ʼa tana Tamai, pea ʼe ina maʼu tana faʼahiga manatu.​—1 Ko. 2:​16.

² Neʼe ʼofa Sesu ia Sehova mo tona ʼatamai katoa. Neʼe ina iloʼi te meʼa ʼae neʼe loto e Sehova ke ina fai. Pea neʼe ina fakatotonu ke ina fakahoko tona finegalo, maʼia pe neʼe tonu ke mamahi. Neʼe takimuʼa kia ia te fai ʼo te finegalo ʼo tana Tamai. Pea neʼe mole ina tuku he meʼa ke fakaleluʼi tana fai te fakatuʼutuʼu ʼaia.

3. Kotea ʼae neʼe ako e Petelo ʼo ʼuhiga mo Sesu? Pea kotea ʼae neʼe fakalotomalohiʼi te kau Kilisitiano ke natou fai? (1 Petelo 4:1)

³ Neʼe maʼu e Petelo pea mo ʼihi apositolo ia te faigamalie ʼae ke natou fakatahi mo Sesu, pea mo iloʼi tana faʼahiga manatu. Neʼe takitaki e te ʼAtua ia Petelo ʼi tana fai ia tana ʼuluaki tohi. Neʼe fakalotomalohiʼi e Petelo te kau Kilisitiano ke natou maʼu te faʼahiga manatu ʼa Kilisito. (Lau ia 1 Petelo 4:1.) Neʼe tohi e Petelo te ʼu palalau ʼaeni: “Kotou fakamalohiʼi ia koutou ʼaki takotou maʼu te faʼahiga manatu ʼa Kilisito.” ʼI te Fakakeleka, ʼe fakaʼuhiga ki he kau solia neʼe ʼi ai hanatou ʼu mahafu ke natou teuteu olo ki te tau. Koia ʼe maʼuhiga ke maʼu e te kau Kilisitiano ia te faʼahiga manatu ʼa Sesu. Kotea tona tupuʼaga? Koteʼuhi ʼe natou maʼu anai he mahafu malohi moʼo tauʼi ʼonatou ʼu holi ʼae ʼe kovi pea mo te malama ʼae ʼe puleʼi e Satana.​—2 Ko. 10:​3-5; Efe. 6:​12.

4. ʼE tokoni feafeaʼi mai anai te alatike ʼaeni ke tou fakalogo ki te tokoni ʼa Petelo?

⁴ ʼI te alatike ʼaeni, ʼe tou vakaʼi anai te faʼahiga manatu ʼa Sesu, pea mo feafeaʼi hatatou maʼu tana faʼahiga manatu. Koia, ʼe tou talanoa anai pe kotea ʼae ʼe tonu ke tou fai (1) ke tou ako ke tou maʼu te faʼahiga manatu ʼa Sehova, ʼae ʼe tokoni mai anai ke tou manatu tahi fuli ai, (2) ke tou agavaivai, pea (3) ke tou liliu ko ni hahaʼi fakapotopoto, ʼe tou fakaha ai tatatou falala ʼae kia Sehova ʼaki te faikole.

AKO KE KE MAʼU TE FAʼAHIGA MANATU ʼA SEHOVA

5. Kotea te aluʼaga ʼae neʼe mole maʼu ai e Petelo ia te faʼahiga manatu ʼa Sehova?

⁵ Neʼe mole maʼu tuʼumaʼu e Petelo te faʼahiga manatu ʼa Sehova. Neʼe fakamahino e Sesu ki ʼana apositolo ʼe tonu ke alu ki Selusalemi, ke puke ia ia e te kau takitaki lotu mo gaohi koviʼi pea ke matehi. (Mat. 16:21) Neʼe lagi faigataʼa kia Petelo tana tali te manatu ʼae, ʼe fakagafua e Sehova ke matehi ia Sesu. Kotea tona tupuʼaga? Koteʼuhi neʼe ina iloʼi ko Sesu neʼe ko te Mesia ʼae neʼe fakapapauʼi pea ka ina haofaki te hahaʼi ʼa te ʼAtua. (Mat. 16:16) Koia, neʼe toʼo leva e Petelo ia Sesu, ʼo ina ui fenei age: “ ʼAliki, tuku tau palalau feia, ʼe mole hoko anai kia koe te ʼu faʼahi ʼaia.” (Mat. 16:22) Neʼe mole maʼu e Petelo te faʼahiga manatu ʼa Sehova ʼo ʼuhiga mo te aluʼaga ʼaia, koia neʼe mole manatu tahi ai mo Sesu.

6. Neʼe fakaha feafeaʼi e Sesu neʼe tatau tana manatu mo ʼae ʼa Sehova?

⁶ Neʼe tatau te manatu ʼa Sesu mo tana Tamai ʼae ʼe ʼi selo. Neʼe ina tali fenei age kia Petelo: “Fakalaka ʼi ʼoku tuʼa, Satana! Ko koe ko he maka fakatupu tukia kia au, koteʼuhi ʼe mole ke maʼu te ʼu manatu ʼa te ʼAtua, kae ko te ʼu manatu ʼa te tagata.” (Mat. 16:23) ʼE mahino ia, neʼe nofo Petelo mo he ʼu fakatuʼutuʼu lelei, kae neʼe liʼaki e Sesu tana tokoni. ʼE ko he ako lelei ia maʼa tatou. Koia, neʼe iloʼi e Sesu neʼe loto e Sehova ke ina fakaʼaogaʼi tona malohi katoa ki tana tauhi ʼae kia te ia. ʼI te lakaga ʼaia, neʼe ako ai e Petelo te maʼuhiga ʼae ke ina maʼu te faʼahiga manatu ʼa te ʼAtua.

7. Kotea ʼae ʼe ha ai neʼe faiga ia Petelo ke alu tahi tana faʼahiga manatu mo ʼae ʼa Sehova? (Vakaʼi mo te ʼo te takafi.)

⁷ Ki muli age, neʼe faiga leva ia Petelo ke alu tahi tana faʼahiga manatu mo ʼae ʼa Sehova. Neʼe foaki leva kia natou ʼae neʼe mole Sutea te fealagia ʼae ke natou kau ki te hahaʼi ʼa te ʼAtua. Koia, neʼe fekauʼi ai ia Petelo ke alu ʼo faifakamafola kia Kolonelio. Neʼe kau leva te tagata ʼaia ki te ʼu ʼuluaki hahaʼi mole Sutea ʼae neʼe liliu ko he ʼu tisipulo ʼa Sesu. Kae neʼe mole fia felogoi te kau Sutea mo natou ʼae neʼe mole Sutea. Koia, neʼe ʼaoga ai he tokoni kia Petelo ke nofo teuteu ki te gaue ʼaia. Kae, ʼi tana mahino leva ki te finegalo ʼo te ʼAtua ʼo ʼuhiga mo te aluʼaga ʼaia, neʼe fetogi leva tana faʼahiga manatu. Pea ʼi tanatou olo leva ʼo kumi ia ia, neʼe ‘mole fakafisi’ ia, kae neʼe alu. (Gaue 10:​28, 29) Pea neʼe faifakamafola leva kia Kolonelio pea mo tona kiʼi famili, pea neʼe natou papitema leva.​—Gaue 10:​21-​23, 34, 35, 44-​48.

8. ʼE ha feafeaʼi ʼe tou maʼu ia te manatu ʼa Sehova? (1 Petelo 3:8)

⁸ Ki muli age, neʼe fakalotomalohiʼi e Sesu ʼona tehina ke natou “manatu tahi fuli.” (Lau ia 1 Petelo 3:8) ʼE feala mo tatou ʼaeni ʼe tauhi kia Sehova ke tou manatu tahi fuli. ʼO feafeaʼi? ʼAki hatatou maʼu ia te manatu ʼa Sehova, ʼae ʼe ina fakaha mai ʼi tana Folafola. Tou toʼo he faʼifaʼitaki. Neʼe fakalotomalohiʼi e Sesu ʼana tisipulo ke natou fakamuʼamuʼa ia te Puleʼaga. (Mat. 6:​33) Kapau ʼe fia muliʼi e he tehina ia te tokoni ʼaia, ʼe feala pe hana fakatuʼutuʼu ke ina fakahoko he gaue temi katoa ʼi tana tauhi ʼae kia Sehova. ʼE mole tonu ke tou ui age ke ina filifili he faʼahiga maʼuli ʼe fimalie ai, kae ʼe tonu ke tou fai age he ʼu palalau fakalotomalohi ʼo ʼuhiga mo tana fakatuʼutuʼu ʼaia, pea mo ui age ʼe feala hatatou tokoni ki ai.

KE KE AGAVAIVAI

9-10. He koʼe neʼe fakaofoofo te agavaivai ʼa Sesu?

⁹ ʼI te po ʼi muʼa ʼo tona matehi, neʼe akoʼi e Sesu kia Petelo pea mo ʼihi apositolo ia te maʼuhiga ʼae ke natou agavaivai. Neʼe ina fekauʼi ia Petelo mo Soane ke nā olo uhuuhu ʼi te ʼaho ʼaia, ʼo teuteuʼi te ʼu meʼa ʼae ʼe ʼaoga ki tana Taumafa fakaʼosi mo ʼana tisipulo ʼi muʼa ʼo tana mate. ʼE mahino ia, neʼe teuteuʼi e Petelo mo Soane ia he pesini pea mo he ʼu tauveli maʼa te kau fakaafe ke fufulu ʼonatou vaʼe ʼi muʼa ʼo tanatou kakai. Kae, ko ai anai ʼe agavaivai ke ina fakahoko te gaue ʼaia?

¹⁰ Neʼe mole toe fakameʼameʼa ia Sesu. Neʼe fakaofoofo ʼosi ia tana fakaha ia te agavaivai. Neʼe punamaʼuli ʼosi tana ʼu apositolo, koteʼuhi neʼe ina fakahoko ia he gaue neʼe tonu ke fai e he tagata kaugana. Neʼe ina huʼi ʼona kofu tuʼa mo toʼo he tauveli ʼo hulu, pea mo ina huaʼi he moʼi vai ki te pesini. Pea neʼe ina kamata fufulu leva ʼonatou vaʼe. (Soa. 13:​4, 5) Neʼe ʼaoga he temi ki ai koteʼuhi neʼe natou toko 12. Pea neʼe kau ia natou ʼaia, ia Sutasi ʼae neʼe ina ʼamanaki kakaʼi ia ia. Kae ʼaki he agavaivai, neʼe fakahoko pe e Sesu te gaue ʼaia ki te fakaʼosi. Pea ʼaki he kataki fualoa, neʼe ina ui fenei: “ ʼE kotou mahino koa ki te meʼa ʼae neʼe au fai kia koutou? ʼE kotou ui ko au ko he tagata faiako pea mo kotou fakahigoaʼi au ‘ ʼAliki,’ pea ʼe kotou moʼoni. Koia, kapau ko au, ʼae ko te ʼAliki pea mo te tagata faiako, neʼe au fufulu ʼokotou vaʼe, pea ʼe tonu foki mo koutou ke kotou fefufuluʼaki ʼokotou vaʼe.”​—Soa. 13:​12-​14.

11. Kotea ʼae ʼe ha ai neʼe ako e Petelo ke agavaivai? (1 Petelo 5:5) (Vakaʼi mo te pāki.)

¹¹ Neʼe malave ʼosi kia Petelo ia te agavaivai ʼa Sesu. Hili pe ʼo te toe liliu ʼa Sesu ki selo, neʼe fakamalolo fakamilakulo e Petelo te tagata neʼe maʼimoa talu mai tana tupu. (Gaue 1:​8, 9; 3:​2, 6-8) ʼE mahino ia, neʼe fia iloʼi meʼa fuli te hahaʼi ki te milakulo ʼaia. (Gaue 3:​11) ʼE tou iloʼi neʼe haʼu ia Petelo mai he agaʼi fenua ʼe fakamaʼuhigaʼi lahi ai ia he tahi ʼe maʼu tuʼulaga. Koia, ʼi tau manatu la, neʼe loto koa e Petelo ke fakakololiaʼi ia ia ʼi te lakaga ʼaia? Kailoa ia. Neʼe agavaivai ʼo mole ina loto ke fakakololiaʼi ia ia. Kae, neʼe ina foaki te kololia kia Sehova pea mo Sesu ʼo ʼuhiga mo te milakulo ʼaia. Neʼe ina ui fenei: “ ʼAki te huafa ʼo Sesu pea mo tamā tui ki tona huafa, kua fakamalohiʼi te tagata ʼaeni ʼe kotou sisio ki ai pea mo iloʼi.” (Gaue 3:​12-​16) Ki muli age, neʼe fakaʼaogaʼi e Petelo ʼi tana tohi te kupusiga palalau ʼaeni ‘kotou kofuʼi ia te agavaivai.’ Neʼe ina fia fakaha ia te maʼuhiga ʼae ke tou maʼu te kalitate ʼaia, pea ke tou manatuʼi ai te aluʼaga ʼae neʼe fai e Sesu ʼi tana hulu te tauveli, pea mo fufulu te ʼu vaʼe ʼo ʼana apositolo.​—Lau ia 1 Petelo 5:5.

12. ʼE feafeaʼi hatatou muliʼi te faʼifaʼitaki ʼo Petelo pea mo agavaivai tuʼumaʼu?

¹² Kapau ʼe tou agavaivai pea ʼe tou muliʼi anai te faʼifaʼitaki ʼo Petelo. Tou manatuʼi ʼe mole ha ia te agavaivai moʼoni ʼaki hatatou fai he ʼu palalau malie. Ko te ʼu kupu ʼae neʼe fakaʼaogaʼi e Petelo, pea mo te kupu ʼae neʼe fakaliliu ʼaki te kupu agavaivai, ʼe fakaʼuhiga ʼe ha te agavaivai ʼi ʼatatou manatu loloto mo tatatou faʼahiga aga ki te hahaʼi. ʼE tou fai ia meʼa fuli ki ʼihi he ʼe tou ʼoʼofa ia natou ʼo feia pe mo Sehova, kae mole ʼuhi ʼe tou loto ke vikiʼi tatou. ʼE tou fakaha ʼe tou agavaivai moʼoni mo kapau ʼe tou tauhi kia Sehova mo ʼotatou tehina ʼi te fiafia, tatau aipe pe ʼe mole tokagaʼi e ʼihi te ʼu gaue ʼe tou fai.​—Mat. 6:​1-4.

KE KE “FAKAPOTOPOTO”

13. Kotea te fakaʼuhiga ʼae ke ke “fakapotopoto”?

¹³ Kotea te fakaʼuhiga ʼae ke ke “fakapotopoto”? (1 Pet. 4:7) ʼE faiga he tehina fakapotopoto ke ina toʼo he ʼu tonu ʼe alu tahi mo te manatu ʼa Sehova. ʼE ina iloʼi ʼe maʼuhiga ʼaupito age tana ʼu felogoi lelei mo tana Tamai. ʼE ina iloʼi ʼona tuʼakoi pea ʼe mahino kia ia, ʼe mole ina iloʼi te ʼu tali kia meʼa fuli. Pea ʼe ina fakaha tana falala kia Sehova ʼaki tana faikole tuʼumaʼu kia te ia, pea mo agavaivai.a

14. Kotea te aluʼaga ʼae neʼe mole falala ai Petelo kia Sehova?

¹⁴ ʼI te po ʼi muʼa ʼo tona matehi, neʼe ui fenei e Sesu ki ʼana tisipulo: “ ʼI te po ʼaeni, ʼe kotou liʼaki fuli anai ia au.” Kae neʼe falala fau pe ia Petelo kia ia ʼo ina ui fenei: “ ʼE mole au liʼaki anai ia koe, tatau aipe pe ʼe natou liʼaki fuli anai ia koe!” Kae ʼi te po pe ʼaia, neʼe fakalotomalohiʼi fenei e Sesu ʼihi ʼo tana ʼu tisipulo: “Kotou nonofo ʼalaʼala pea mo faikole tuʼumaʼu.” (Mat. 26:​31, 33, 41) Kapau la neʼe fakalogo ia Petelo ki tana tokoni, neʼe feala pe ke lototoʼa ʼo fakaha ko ia ko te tisipulo ʼa Sesu. Kae fakaʼofaʼofa foki, he neʼe fakafisi ki tona Pule pea neʼe fakahemala lahi ʼosi.​—Mat. 26:​69-​75.

15. Neʼe fakaha feafeaʼi e Sesu tana fakapotopoto ʼi tona po fakaʼosi ʼi te kele?

¹⁵ Neʼe tuku katoa e Sesu tana falala kia Sehova. Logo pe la neʼe haohaoa, kae neʼe faikole tuʼumaʼu pe. Koia ʼae neʼe lototoʼa ai ʼo fai tuʼumaʼu te meʼa ʼae neʼe loto ki ai Sehova. (Mat. 26:​39, 42, 44; Soa. 18:​4, 5) ʼE mahino ia, neʼe mole feala ke galoʼi e Petelo ia te faikole tuʼumaʼu ʼa Sesu ʼi tona po fakaʼosi.

16. Kotea ʼae ʼe ha ai neʼe liliu ia Petelo ko he tahi neʼe fakapotopoto? (1 Petelo 4:7)

¹⁶ ʼAki te temi, neʼe ako ia Petelo ke falala kia Sehova pea mo faikole tuʼumaʼu. Hili tana fakatuʼuake, neʼe fakapapauʼi e Sesu kia Petelo pea mo ʼihi apositolo ʼe natou maʼu anai te laumalie maʼoniʼoni. Kotea tona tupuʼaga? Koteʼuhi ke tokoni age kia natou ke natou fakahoko te gaue ʼae neʼe ina tuku age, ʼae ke natou tala te logo lelei. Kae neʼe ina kole age ke natou nonofo ʼi Selusalemi ʼo fakatalitali ki tana foaki age te laumalie maʼoniʼoni. (Luka 24:49; Gaue 1:​4, 5) Kotea ʼae neʼe fai e Petelo ʼo fakatalitali ki te faʼahi ʼaia? Ko ia mo ʼona tehina neʼe natou “kataki ʼi te faikole.” (Gaue 1:​13, 14) Ki muli age, ʼi tana ʼuluaki tohi, neʼe ina fakalotomalohiʼi ai te ʼu tehina mo tuagaʼane ke natou fakapotopoto, pea mo faikole kia Sehova mo he lotofalala. (Lau ia 1 Petelo 4:7.) Koia, neʼe ako ai e Petelo ke falala kia Sehova, pea neʼe liliu ai ko he pou tafito ʼo te kokelekasio.​—Kal. 2:9.

17. Kotea ʼe tonu ke tou fai maʼia pe ʼe tou manatu ʼe tou faiva ʼi ʼihi aluʼaga? (Vakaʼi mo te pāki.)

¹⁷ Kapau ʼe tou fia liliu ko he tahi ʼe fakapotopoto, ʼe tonu ke tou faikole tuʼumaʼu kia Sehova. ʼE tonu ke tou mahino te maʼuhiga ʼae ke tou faikole kia te ia ke tokoni mai, maʼia pe ʼe tou manatu ʼe tou faiva ʼi ʼihi aluʼaga. Koia, tou kole kia Sehova ke ina takitaki tatou, tafito la moka tou toʼo he ʼu tonu maʼuhiga. Kotea tona tupuʼaga? Koteʼuhi ʼe tou falala ʼe ina iloʼi te meʼa ʼae ʼe lelei maʼa tatou.

18. Kotea ʼae ʼe tonu ke tou fai tuʼumaʼu?

¹⁸ ʼE tou lotofakafetaʼi lahi kia Sehova ʼi tana fakatupu tatou ke feala hatatou faʼifaʼitakiʼi ʼona kalitate. (Sen. 1:​26) ʼE mahino ia, ʼe mole feala ke tou faʼifaʼitakiʼi lelei ia ia. (Esa. 55:9) Kae, ohage ko Petelo ʼe feala hatatou mahino lelei age ki tana faʼahiga manatu. Koia, tou haga ako ke tou maʼu te faʼahiga manatu ʼa Sehova, mo tou agavaivai tuʼumaʼu, pea mo faiga tuʼumaʼu ke tou liliu ko ni hahaʼi ʼe fakapotopoto.