Tali ʼAki He Agavaivai Te ʼu Meʼa ʼAe ʼe Mole Ke Iloʼi

1. Kotea te ʼu fealagia neʼe foaki mai e Sehova? Pea kotea tona tupuʼaga?

NEʼE fakatupu tatou e Sehova mo te fealagia ʼae ke tou lava fakakaukau, mo ako he ʼu meʼa foʼou pea mo mahino pe ʼe feafeaʼi hatatou maʼuliʼi te ʼu meʼa ʼae neʼe tou ako. He koʼe neʼe ina fakatupu feia tatou? ʼE ina loto ke tou maʼu te ʼatamai malama ʼo ʼuhiga mo ia, pea ke tou tauhi age kia te ia ʼaki ʼotatou fealagia fakakaukau.—Taag. 2:1-5; Loma 12:1.

2. (1) Kotea ʼae ʼe tonu ke tou mahino ki ai? (Sopo 37:23, 24) (Vakaʼi mo te pāki.) (2) He koʼe ʼe maʼuhiga ke tou mahino ʼe mole ʼaoga ke tou iloʼi ia meʼa fuli?

² Logo la ʼe tou maʼu te fealagia ʼae ke tou mahino ki he ʼu meʼa, kae ʼe lahi te ʼu fahaʼi ʼe mole tou iloʼi. (Lau ia Sopo 37:23, 24.) Tou vakaʼi te faʼifaʼitaki ʼo Sopo. Neʼe lahi te ʼu fehuʼi neʼe fai age e Sehova, neʼe tokoni ki ai ke mahino ʼe ʼi ai ʼona tuʼakoi, pea ke agavaivai mo fetogi ia tana manatu. (Sopo 42:3-6) ʼO toe feia pe, ʼe lelei ke tou agavaivai ʼo tou mahino ʼe mole tou iloʼi ia meʼa fuli he ʼe fua lelei pe anai kia tatou. Koia, tou falala ʼe fakaha mai anai e Sehova te ʼu meʼa ʼae ʼe ʼaoga moʼoni ke tou iloʼi, ke tou toʼo ai he ʼu tonu fakapotopoto.—Taag. 2:6.

3. Kotea ka tou vakaʼi ʼi te alatike ʼaeni?

³ ʼI te alatike ʼaeni, ʼe tou vakaʼi anai ʼihi aluʼaga ʼe mole tou iloʼi, pea ʼe malave feafeaʼi anai kia tatou. ʼE tou toe vakaʼi anai pe koʼe ʼe lelei ke mole tou iloʼi te ʼu aluʼaga ʼaia. Ka tou vakaʼi te ʼu manatu ʼaia, ʼe tou tui papau ko Sehova, ia “Ia ʼae ʼe ina iloʼi ia te meʼa fuli,” ʼe ina fakaha mai te ʼu meʼa ʼae ʼe ʼaoga moʼoni ke tou iloʼi.—Sopo 37:16.

ʼE MOLE TOU ILOʼI PE ʼE HOKO ANAI ʼAFEA TE FAKAʼOSI

4. Ka tou lau ia Mateo 24:36, kotea ʼae ʼe mole tou iloʼi?

⁴ Lau ia Mateo 24:36. ʼE mole tou iloʼi pe ʼe hoko anai ʼafea te fakaʼosi ʼo te malama ʼaeni. Maʼia pe la mo Sesu neʼe mole ina iloʼi “te ʼaho mo te hola”a ʼi tana ʼi te kele. Ki muli age, neʼe ina ui ki ʼana apositolo ko Sehova ʼe ina iloʼi te ʼu temi mo te ʼu fasiga taʼu. ʼE ko ia pe ʼe ina lava “fakatuʼutuʼu te ʼu faʼahi ʼaia.” (Gaue 1:6, 7) Neʼe kua fakatuʼutuʼu e Sehova te temi ʼae ka hoko ai te fakaʼosi ʼo te malama ʼaeni. Kae ʼe mole tou iloʼi lelei pe ʼe hoko anai ʼafea.

5. Kotea ʼe feala ke tou logoʼi moka ʼe mole tou iloʼi pe hoko anai ʼafea te fakaʼosi?

⁵ ʼE ha ʼi te ʼu palalau ʼa Sesu, ʼe mole tou iloʼi pe ʼe kaku ki ʼafea tatatou fakatalitali ki te hoko mai ʼo te fakaʼosi. Koia, ʼe feala pe ke mole kei tou faʼa kataki peʼe lotovaivai, tafito la moka kua fualoa hatatou fakatalitali ki ai. Peʼe feala pe ke mole kei tou ma tali te ʼu vava ʼo totatou ʼu famili peʼe ko ʼihi. (2 Pet. 3:3, 4) ʼE feala pe ke tou manatu, kapau la neʼe tou iloʼi te ʼaho tonu ʼae ʼe hoko mai ai te fakaʼosi, ʼe faigafua age anai hatatou faʼa kataki pea mo ʼutakiʼi te ʼu vava.

6. He koʼe ko he meʼa lelei tatatou mole iloʼi te ʼaho fakaʼosi?

⁶ ʼE mole fakaha mai e Sehova te ʼaho ʼae ʼe hoko ai te fakaʼosi. Koia, ʼe ina tuku mai te faigamalie ʼae ke tou tauhi kia te ia, he ʼe tou ʼoʼofa mo falala kia te ia. ʼE mole tou fia tauhi kia Sehova ʼuhi pe he ʼe tou iloʼi kua fakatuʼutuʼu te ʼaho ki te fakaʼosi. Koia, ʼe mole tonu ke tou tokakaga pe ki te temi ʼae ka hoko ai “te ʼaho ʼo Sehova.” Kae, ʼe lelei ke tou fakakaukauʼi te ʼu meʼa lelei ʼae ka hoko ʼi te ʼaho ʼaia. Ka tou fai feia, ʼe tokoni mai anai ke tou fakaovi lahi kia Sehova, mo falala kia te ia, pea mo fai ia meʼa fuli moʼo fakafiafiaʼi tona loto.—2 Pet. 3:11, 12.

7. Kotea ʼae ʼe tou iloʼi?

⁷ ʼE maʼuhiga ke tou fakakaukauʼi te meʼa ʼae ʼe tou iloʼi. ʼE tou iloʼi neʼe kamata te ʼu ʼaho fakamuli ʼi te 1914. Neʼe foaki mai e Sehova he ʼu lea fakapolofeta ʼe fakamoʼoni ai neʼe kamata te ʼu ʼaho fakamuli ʼi te taʼu ʼaia. Kae ʼe mole gata ai, ʼe toe talanoa ai foki ki te ʼu aluʼaga ʼe hoko talu mai te taʼu ʼaia. Koia, ʼe tou tui papau “kua ovi mai te ʼaho lahi ʼo Sehova!” (Sofo. 1:14) Pea ʼe tou toe iloʼi te gaue ʼae ʼe loto e Sehova ke tou fai. ʼE ina loto ke tou tala ki te tokolahi “te logo lelei ʼo te Puleʼaga.” (Mat. 24:14) ʼE fakamafola te logo ʼaia ia fenua ʼe 240 pea mo lea ʼe 1000 tupu. ʼE mole ʼaoga ke tou iloʼi “te ʼaho mo te hola” ke tou kau ʼaki he faʼafai ki te gaue maʼuhiga ʼaia.

ʼE MOLE TOU ILOʼI PE KOTEA KA FAI E SEHOVA MAʼA TATOU

8. Kotea te fakaʼuhiga ʼo te ui ʼae “te gaue ʼa te ʼAtua moʼoni?” (Ekelesiasi 11:5)

⁸ ʼE mole tou mahino tuʼumaʼu ki “te gaue ʼa te ʼAtua moʼoni.” (Lau ia Ekelesiasi 11:5.) Ka ui “te gaue ʼa te ʼAtua moʼoni,” ʼe fakaʼuhiga ki te meʼa ʼae ʼe fai e Sehova ke hoko, peʼe ina fakagafua ke hoko he aluʼaga ke fai ai tona finegalo. ʼE mole feala ke tou iloʼi papau pe koʼe ʼe fakagafua e Sehova he aluʼaga ke hoko, peʼe kotea ka ina fai moʼo tokoni kia tatou. (Pes. 37:5) ʼE fakatatau ʼi te Tohi-Tapu tatatou mole iloʼi te ʼu gaue ʼa te ʼAtua ki tatatou mole iloʼi ia te faʼahiga tuputupu ʼo he kiʼi toe ʼi te fatu ʼo tana faʼe. ʼE mole mahino katoa pe la ia te kau poto ki te faʼahiga tuputupu ʼaia ʼo te kiʼi toe. ʼO toe feia pe, ʼe mole tou mahino katoa anai pe ʼe fakahoko feafeaʼi e Sehova ia te ʼu aluʼaga.

9. Kotea ʼe feala ke tou kamata logoʼi moka ʼe mole tou iloʼi lelei pe ʼe tokoni feafeaʼi mai anai ia Sehova?

⁹ Ka mole tou iloʼi lelei pe ʼe tokoni feafeaʼi mai anai ia Sehova, ʼe feala ke tou lotolotolua ai. Ohage la, ʼe feala ke mole tou fai ni sakilifisio moʼo fakalahi ai tatatou minisitelio. ʼE feala ke faigataʼa hatatou maʼuli fakafeʼauga, peʼe ke tou olo ki he fenua ʼe ʼaoga lahi ai he kau faifakamafola. Peʼe feala ke tou manatu ʼe mole fiafia ia Sehova kia tatou mo kapau ʼe mole tou lava fakahoko ʼatatou fakatuʼutuʼu fakalaumalie, peʼe mole tou sisio ki te ʼu fua lelei ʼo tatatou faifakamafola. Peʼe tou gaue kinakina ki he gaue ʼa te kautahi, kae ʼe lahi te ʼu faigataʼaʼia ʼe tou tau mo ia.

10. Kotea te ʼu kalitate maʼuhiga ʼe tokoni mai ke tou maʼu moka ʼe mole tou iloʼi lelei te meʼa ʼae ka fai e Sehova?

¹⁰ Ka mole tou iloʼi lelei te meʼa ʼae ka fai e Sehova, ʼe tokoni mai anai ke tou maʼu he ʼu kalitate maʼuhiga, ohage ko te agavaivai mo te fiamalalo. Pea ʼe feala ke tou mahino ai, ʼe maʼoluga age te ʼu manatu mo te ʼu ala ʼo Sehova ʼi ʼae ʼa tatou. (Esa. 55:8, 9) ʼE tou toe ako ai foki ke tou tuku tatatou falala katoa kia Sehova, he ʼe fua lelei pe anai kia tatou. Ka tou maʼu he ʼu fua lelei ʼi te minisitelio, peʼe ko he gaue pe ʼi te kautahi ʼa Sehova, ʼe tou vikiʼi pe ia Sehova. (Pes. 127:1; 1 Ko. 3:7) Kapau ʼe mole hoko te ʼu aluʼaga ʼae neʼe tou fai ohage ko tatatou fakatuʼutuʼu ki ai, ʼe tonu ke tou manatuʼi tuʼumaʼu ʼe iloʼi e Sehova ia meʼa fuli. (Esa. 26:12) ʼE tou fai te meʼa ʼae ʼe tou fealagia, pea ʼe tou falala ʼe tokoni tuʼumaʼu mai anai ia Sehova. ʼE tou tui papau ʼe ina takitaki anai tatou, tatau aipe pe mole ina fai fakamilakulo ohage ko tana fai ʼi te temi muʼa.—Gaue 16:6-10.

11. Kotea te ʼu aluʼaga ʼae ʼe tou iloʼi?

¹¹ ʼE tou iloʼi ko Sehova ʼe ina fai tuʼumaʼu ia meʼa fuli ʼaki te ʼofa, mo te faitotonu, pea mo te poto. ʼE maʼuhiga ʼaupito kia te ia te ʼu meʼa ʼae ʼe tou fai maʼa ia, pea ki ʼotatou ʼu tehina mo tuagaʼane. Pea ʼe fakapale tuʼumaʼu e Sehova ia natou ʼae ʼe agatonu kia te ia.—Hep. 11:6.

ʼE MOLE TOU ILOʼI TE APOGIPOGI

12. Ka tou lau ia Sakopo 4:13, 14, kotea te aluʼaga ʼae ʼe mole tou iloʼi papau?

¹² Lau ia Sakopo 4:13, 14. ʼE mole tou iloʼi pe kotea ʼae ka hoko kia tatou apogipogi. ʼI te malama ʼaeni ʼe hoko kia tatou he ʼu “temi faigataʼa mo ni aluʼaga fakapunamaʼuli.” (Ekl. 9:11) Koia, ʼe mole feala ke tou iloʼi pe ʼe iku lelei anai ʼatatou fakatuʼutuʼu, peʼe kei tou maʼuʼuli anai ki tona fakahoko.

13. Kotea ʼe tou logoʼi moka ʼe mole tou iloʼi te ʼu meʼa ka hoko ʼi te ka haʼu?

¹³ ʼE feala ke faigataʼa hatatou katakiʼi te ʼu aluʼaga ʼaia he ʼe mole tou iloʼi lelei te meʼa ka hoko ʼi te ka haʼu. Kotea tona tupuʼaga? Kapau ʼe tou tuʼania fau te ʼu aluʼaga ʼae ʼe hoko ʼi te ka haʼu, ʼe feala ke mole kei tou fiafia. ʼE feala ke tou lotomamahi mo iita ʼuhi ko he ʼu malaʼia pea mo he ʼu aluʼaga ʼe hoko fakapunamaʼuli. Pea ka mole hoko te ʼu meʼa ʼae neʼe tou ʼamanaki ki ai, ʼe feala ke tou lotovaivai ai.—Taag. 13:12.

14. Kotea ʼae ʼe fakalogo ki ai totatou fiafia moʼoni? (Vakaʼi mo te ʼu pāki.)

¹⁴ Ka tou tau mo he ʼu faigataʼaʼia, ʼe tou fakaha ʼe tou tauhi kia Sehova ʼuhi he ʼe tou ʼofa ia te ia. ʼE ha ʼi te ʼu hisitolia Fakatohi-tapu ʼe mole tonu ke tou ʼamanaki ʼe puipui anai tatou e Sehova mai te ʼu faigataʼaʼia fuli pe, pea ʼe ina tala fakatomuʼa te ʼu aluʼaga ʼae ʼe hoko ʼi totatou maʼuli. ʼE ina iloʼi ʼe mole fakalogo totatou fiafia ki tatatou iloʼi ia meʼa fuli ʼe hoko kia tatou. Kae ʼe fakalogo ia ki tatatou kumi tana takitaki pea mo fakalogo kia te ia. (Sel. 10:23) Ka tou kumi te manatu ʼa Sehova ʼi muʼa ʼo te toʼo he tonu, ʼe hage pe ʼe tou ui fenei: “Kapau ʼe loto ki ai ia Sehova, ʼe tou maʼuʼuli anai pea ʼe tou fai anai te meʼa ʼaeni peʼe ko te meʼa ʼae.”—Sakp. 4:15.

15. Kotea ʼae ʼe tou iloʼi ʼo ʼuhiga mo te ka haʼu?

¹⁵ ʼE mole tou iloʼi te ʼu aluʼaga ʼe hoko kia tatou ʼi te ʼu ʼaho takitahi. Kae ʼe tou iloʼi neʼe fakapapauʼi mai e Sehova te maʼuli he ʼe gata, pe ʼi selo peʼe ʼi te kele. ʼE tou iloʼi ʼe mole loi ia Sehova pea ʼe ina fakahoko tuʼumaʼu pe ʼana fakapapau. (Tito 1:2) ʼE ko ia tokotahi pe ʼe feala ke ‘ina fakakikite te fakaʼosi, pea mai te ʼu temi ʼafeā ʼe ina tala te ʼu meʼa ʼae ʼe mole heʼeki hoko.’ Neʼe hoko moʼoni te ʼu aluʼaga ʼae neʼe ina fakakikite ʼi te temi muʼa. Pea ʼe toe hoko moʼoni pe anai mo te ʼu aluʼaga fuli ʼe ina fakakikite ki te ka haʼu. (Esa. 46:10) ʼE tou iloʼi papau ʼe mole he meʼa ʼe ina taʼofi te ʼofa ʼo Sehova kia tatou. (Loma 8:35-39) ʼE ina foaki mai anai te poto, mo te fakalotofimalie pea mo te malohi ke tou lava katakiʼi ia aluʼaga fuli pe. Koia, ʼe tou tui papau ʼe tokoni mai anai ia Sehova pea mo ina tapuakinaʼi tatou.—Sel. 17:7, 8.

ʼE MOLE FEALA KE TOU MAHINO KATOA KI TOTATOU ILOʼI LELEI E SEHOVA

16. Kotea te ʼatamai malama ʼae ʼe talanoa ki ai ia Pesalemo 139:1-6? Pea he koʼe ʼe mole tou mahino katoa ki ai?

¹⁶ Lau ia Pesalemo 139:1-6. ʼE iloʼi e Sehova pe neʼe faʼu tatou ʼaki tea. ʼE ina iloʼi pe neʼe faʼu feafeaʼi totatou sino, mo te ʼu meʼa ʼae ʼe tou logoʼi mo ʼae ʼe tou fakakaukau ki ai. ʼE ina iloʼi ʼatatou palalau, mo te ʼu meʼa ʼae ʼe tou fia ui, mo te ʼu meʼa ʼae ʼe tou fai pea he koʼe ʼe tou fai ia te faʼahi ʼaia. Neʼe ui e te Hau ko Tavite ʼe fia tokoni tuʼumaʼu mai pe ia Sehova, pea ʼe ina lava fai te faʼahi ʼaia. ʼE malave ʼaupito kia tatou ia te lototokaga feia ʼa te Tuʼi ʼAliki ʼo te ʼAtulaulau, ia te Tupuʼaga mafimafi ʼo te lagi mo te kele. Koia, ʼe tou manatu tahi mo Tavite, ʼae neʼe ina ui fenei: “ ʼE mole kakusia taku mahino ki te taʼi ʼatamai malama ʼaia, he ʼe maʼoluga ʼosi ia ke au kakusia ki ai.”—Pes. 139:6.

17. He koʼe ʼe faigataʼa kia tatou hatatou tui ʼe iloʼi lelei tatou e Sehova?

¹⁷ ʼE lagi faigataʼa kia tatou hatatou tui ko Sehova ʼe ko he Tamai ʼofa ʼe tokaga kia tatou. ʼE feala ke tou manatu feia ʼuhi ko he aluʼaga neʼe hoko ʼi totatou famili, peʼe ko totatou agaʼi fenua peʼe ko te lotu ʼae neʼe tou ʼuluaki kau ai. Peʼe lagi tou manatu ʼe mole fia iloʼi tatou e Sehova ʼuhi neʼe tou fai ni lakahala ʼi muʼa atu, pea ʼe mole fia fakaovi mai kia tatou. Neʼe toe maʼu pe la mo Tavite ia te ʼu manatu ʼaia. (Pes. 38:18, 21) Pea ʼe feala ke feuiʼaki fenei e he tahi ʼe ina fai he ʼu fetogi ʼi tona maʼuli, pea mo mulimuli ki te ʼu lekula faitotonu ʼa te ʼAtua: ‘Kapau la ʼe mahino te ʼAtua kia au, he koʼe ʼe ina loto ke au liʼaki he faʼahiga maʼuli ʼe faigataʼa kia au haku tuku?’

18. He koʼe ʼe lelei ke tou tui ʼe iloʼi lelei age tatou e Sehova ia tatou totonu? (Vakaʼi mo te ʼu pāki.)

¹⁸ ʼE mole tou iloʼi lelei ia tatou, kae ʼe feala ke tou tui ʼe iloʼi lelei age tatou e Sehova. Pea ʼe sio ki te meʼa ʼae ʼe lelei ia tatou, ʼae ʼe mole tou tokagaʼi. Logo la ʼe sio ki ʼotatou vaivaiʼaga, pea mo mahino pe koʼe ʼe tou logoʼi he ʼu manatu fakalotovaivai, pea mo fai he ʼu aluʼaga, kae ʼe ʼofa pe ia tatou. (Loma 7:15) Ka tou mahino lelei ki te sio ʼa Sehova ki ʼotatou fealagia, ʼe tou maʼu feʼauga anai te malohi ke tou tauhi agatonu kia te ia ʼaki te fiafia.

19. Kotea ʼae ʼe tou iloʼi papau ʼo ʼuhiga mo Sehova?

¹⁹ ʼE tou iloʼi ko Sehova ʼe ko te ʼofa. Pea ʼe tou tui papau ki te fahaʼi ʼaia. (1 Soa. 4:8) ʼE tou iloʼi ʼe ha tona ʼofa kia tatou ʼi ʼana pelesepeto faitotonu, pea ʼe ina loto ke tou maʼuli fiafia. ʼE tou iloʼi e loto e Sehova ke tou maʼu te maʼuli heʼe gata. Koia ʼae neʼe ina foaki mai ai te totogi. Neʼe mate Sesu maʼa tatou, koia ʼe tou tui papau ʼe feala tatatou tauhi kia Sehova, pea mo fakafiafiaʼi tona loto logo la totatou ʼuhiga agahala. (Loma 7:24, 25) ʼE tou iloʼi “ ʼe maʼoluga age te ʼAtua ʼi ʼotatou loto pea ʼe ina iloʼi ia meʼa fuli.” (1 Soa. 3:19, 20) ʼE sio ia Sehova kia meʼa fuli, pea ʼe falala ʼe tou lava fakahoko anai tona finegalo.

20. Kotea ka tokoni mai ke mole tou tuʼania fau ki te ʼu meʼa ʼae ʼe mole tou iloʼi?

²⁰ ʼE fakaha fuli mai pe e Sehova te ʼu meʼa ʼae ʼe ʼaoga moʼoni ke tou iloʼi. Koia, ʼe mole tou tuʼania fau anai te ʼu meʼa ʼae ʼe mole tou iloʼi. Kae ʼe tou tokaga tafito pe anai ki te ʼu meʼa ʼae ʼe maʼuhiga. Ka tou fai feia, ʼe tou fakaha ai ʼe tou falala katoa kia Sehova, “Ia ʼae ʼe ina iloʼi ia meʼa fuli.” (Sopo 36:4) ʼE moʼoni, ʼi te temi nei, ʼe ʼi ai ʼihi aluʼaga ʼe mole tou mahino katoa ki ai. Kae ʼe tou fiafia he ʼe hoko atu pe anai tatatou ako he ʼu manatu foʼou ʼo ʼuhiga mo totatou ʼAtua Lahi ko Sehova ʼi te ka haʼu.—Ekl. 3:11.