Neʼe Lahi Te ʼu Ako Neʼe Mā Maʼu Mai Totatou Faiako Ako Lahi

TE FAʼIFAʼITAKI ʼO TAKU ʼU MATUʼĀ

ʼI te fakaʼosi ʼo te ʼu taʼu 1950, neʼe mavae ʼaku matuʼā mai Italia ki Kindersley, ʼi Saskatchewan, ʼi Kanata. Mole fualoa ki ai, neʼe nā ako leva te moʼoni pea neʼe liliu ko he faʼahi maʼuhiga ʼaupito ʼi tomatou maʼuli. Neʼe au manatuʼi ʼi taku kei veliveli neʼe lahi ʼosi te temi ʼae neʼe au faifakamafola ai mo toku famili. Koia, neʼe au tau ui ʼi ʼihi temi moʼo fakakata pe “neʼe au pionie vaeluaʼi temi ʼi toku taʼu valu.”

Neʼe masiva ʼaku matuʼā kae neʼe nā tuku mai he faʼifaʼitaki lelei he neʼe nā fai he ʼu sakilifisio maʼa Sehova. Ohage la, ʼi te 1963, neʼe lahi tona ʼu koloa neʼe nā fakatau ke feala hanā maʼu feʼauga he foʼi falā ke nā kau ki te fakatahi fakafenua, ʼi Pasadena, ʼi Californie, ʼi Amelika. ʼI te 1972, neʼe matou hiki ʼo maʼuʼuli ʼi Trail, ʼi Colombie-Britannique, ʼi Kanata ʼo tokoni ki te faifakamafola ki te kau Italia ʼo te kolo ʼaia. ʼE fakafuafua neʼe vaha ia kilometa ʼe 1000. Neʼe tokaga taku tamai ki te leʼo mo te taupau ʼo he ʼu fua fale. Neʼe mole ina tali ke hiki tana tuʼulaga, ke lahi ai tana foʼi falā, he neʼe fia tokaga tafito ki te ʼu gaue fakalaumalie.

ʼE au lotofakafetaʼi lahi ki te faʼifaʼitaki neʼe tuku mai e taku ʼu matuʼā kia au, mo toku taʼokete lahi, ʼo feia mo ʼoku kiʼi tokolua ʼe lua. Neʼe ko tanā faʼifaʼitaki ʼae neʼe ʼuluaki tokoni mai ki taku akoako ki taku tauhi kia Sehova. Neʼe nā akoʼi mai he aluʼaga ʼe mole feala ke au galoʼi ʼi toku maʼuli. Neʼe nā akoʼi mai kapau ʼe au fakamuʼamuʼa te Puleʼaga, pea ʼe tokaga anai ia Sehova kia au.—Mat. 6:33.

TE KAMATA ʼO TAKU SELEVISI TEMI KATOA

ʼI te 1980, neʼe au ʼohoana mo Debbie. Ko he tuagaʼane finemui neʼe ʼi ai tana ʼu fakatuʼutuʼu fakalaumalie. Neʼe mā fia toʼo toko lua ia te selevisi temi katoa. Koia neʼe pionie ia Debbie hili ki ai mahina ʼe tolu ki tomā ʼohoana. Hili te taʼu katoa ki tomā ʼohoana, neʼe mā olo leva ki he kiʼi kokelekasio neʼe ʼaoga ki ai he tokoni. Pea neʼe au toʼo fakatahi leva mo ia taku selevisi pionie.

ʼAki te temi, neʼe mā lotovaivai mo fakatotonu ke mā fakamamaʼo mai te kokelekasio. Kae neʼe mā faipalalau muʼa mo te taupau ʼo te siliko. Neʼe palalau fakahagatonu mai ʼaki ai pe te ʼofa. Neʼe ina ui fenei mai: “Kapau ʼe hoko he ʼu fihifihia he ʼe kolua toe kau pe mo koulua ki tona fakatupu. ʼE kolua tokakaga tafito ki te ʼu meʼa ʼae ʼe mole lelei ʼo ʼuhiga mo tokolua aluʼaga. Kae kapau ʼe kolua sioʼi te ʼu meʼa ʼae ʼe lelei, pea ʼe kolua maʼu anai.” Neʼe ko te tokoni ʼaia neʼe ʼaoga ʼosi kia maua. (Pes. 141:5) Neʼe mā foimo maʼuliʼi atu aipe te tokoni ʼaia, pea neʼe mā tokagaʼi ʼe moʼoni ʼe lahi ʼosi te ʼu meʼa lelei ʼe mā sio ki ai. Tokolahi natou ʼi te kokelekasio neʼe natou fia gaue lahi maʼa Sehova, tafito te kau tupulaga ʼo feia mo ʼihi tuagaʼane ʼae ʼe mole tauhi ʼonatou hoa kia Sehova. Neʼe ko he ako maʼuhiga ia kia maua. Neʼe mā ako ke mā kumi te meʼa ʼae ʼe lelei pea mo atali ke fakatonutonuʼi e Sehova he aluʼaga ʼe faigataʼa kia maua. (Mik. 7:7) Neʼe mā toe logoʼi tomā fiafia pea neʼe fetogi mamalie tomā aluʼaga.

Ko natou ʼae neʼe natou fai tamatou ʼuluaki ako pionie neʼe natou misionea ʼi te tahi ʼu fenua. Neʼe natou fakahaha he ʼu pāki pea mo fakamatala te ʼu faigataʼaʼia mo te ʼu tapuakina ʼae neʼe natou maʼu. ʼI tanatou fakahoko te faʼahi ʼaia, neʼe natou fakatuputupu ia maua tamā fia misionea. Koia, neʼe mā mahino ai ʼe mā fia fakahoko ia te gaue ʼaia.

ʼI te 1984, neʼe mā hiki ʼo nonofo ʼi Québec Francophone, ʼae neʼe vaha mamaʼo mo Colombie-Britannique ia teitei kilometa ʼe 4000 ke feala hamā fakahoko te fakatuʼutuʼu ʼaia. Koia, neʼe tonu ai ke mā ako he agaʼi fenua mo he lea foʼou. Ko te tahi faigataʼaʼia neʼe mā tau mo ia neʼe mole lahi ke feafeaʼi tamā foʼi falā. ʼI te tahi ʼaho, neʼe mā maʼuʼuli ʼuhi pe ko tamā olo ʼo tae te ʼu toega putete ʼi te gaueʼaga ʼo he tagata gaue kele. Neʼe lahi te ʼu kiʼi kuka kehekehe mo kano lelei neʼe fai e Debbie ʼaki te ʼu putete. Logo la te ʼu faigataʼaʼia kae neʼe mā faiga tuʼumaʼu pe ke mā taupau tomā fiafia. Pea neʼe mā tui papau ʼe tokaga ia Sehova kia maua.—Pes. 64:10.

ʼI te tahi ʼaho, neʼe telefoni mai he tahi neʼe mole mā ʼamanaki ki ai. Neʼe fakaafe maua ke mā olo ʼo gaue ʼi te Petele ʼo Kanata. Kae neʼe kua mā kole ke mā kau ki te Ako ʼo Kileate. Neʼe mā fiafia ʼi tomā fakaafe, kae neʼe mole koia ʼaia. Kae neʼe mā tali tomā fakaafe ʼaia. ʼI tamā tau atu neʼe mā fehuʼi kia Kenneth Little, ʼae kau ʼi te Komite ʼo Te Filiale: “Kua feafeaʼi tamā kole ʼae ki Kileate?” Neʼe ina tali fenei mai: “Ko te koga leva ʼaia hoki vakaʼi moka fakaafe koulua.”

Hili ki ai he vahaʼa katoa, neʼe fakaafe leva maua ke mā kau ki te Ako ʼo Kileate. Koia, neʼe tonu ke mā toʼo he tonu. Neʼe ui fenei mai e te tehina ko Little: Kotea pe te tonu ka kolua fai, kae ʼe lagi ʼi ai anai ʼihi ʼaho ʼe kolua fakahemala anai ʼi takolua mole filifili te aluʼaga ʼae. ʼE mole faigafua te toʼo ʼo he tonu. Kotea pe te tonu ka kolua fai kae ʼe tapuakinaʼi pe anai e Sehova te tonu ʼae ka kolua fai. Neʼe mā tali tomā fakaafe ʼae ki Kileate. Pea ʼaki te temi, neʼe mā sisio ai ki te moʼoni ʼo te ʼu tokoni ʼae neʼe fai mai e te tehina ko Little. Neʼe mā toe fakaʼaogaʼi pe te ʼu tokoni ʼaia moʼo vaevae mo ʼihi neʼe tonu ke natou fai he tonu o ʼuhiga mo gaue ʼe lua.

TE MAʼULI MISIONEA

Neʼe mā fiafia ʼi tamā kau ʼi te toko 24 kau ako ʼae neʼe tohi ki te kalasi 83 ʼo Kileate. Neʼe fai ʼi te kolo ko Brooklyn, ʼi New York, ʼi Apelili 1987. Neʼe ko te ʼu tehina Ulysse Glass mo Jack Redford ʼamatou faiako. ʼOsi ki ai mahina ʼe nima, pea foaki mai leva ʼoma pepa ʼi te ʼaho 6 o Sepetepeli 1987. Neʼe hinoʼi maua ke mā olo ʼo gaue ʼi Haïti mo John mo Marie Goode.

Neʼe mole he misionea neʼe kau ʼi te ako ʼo Kileate neʼe hinoʼi ki Haïti, talu mai te 1962. Neʼe ko te taʼu ʼaia neʼe kole ki te ʼu misionea fakamuli ke mavae mai te fenua. Hili ki ai vahaʼa ʼe tolu ki tamā maʼu pepa, neʼe mā kamata gaue leva ʼi Haïti mo he kiʼi kokelekasio ko kau faifakamafola ʼe 35, pea ʼe tuʼu mamaʼo. Neʼe kei mā tupulaga, mo lahi te ʼu faʼahi ke mā ako pea neʼe mā maʼuʼuli toko lua pe ʼi te ʼapi ʼo te kau misionea. Neʼe kovi ʼosi te masisiva ʼa te hahaʼi ʼo te fenua pea tokolahi neʼe mole popoto ʼi te lautohi. ʼI tamā maʼuʼuli ai, neʼe hoko ai te ʼu maveuveu ʼi te fenua, mo te u tau ʼuhi ko te politike pea mo te ʼu punu ala ʼe tafu ai ni afi pea mo te ʼu afā.

Kae neʼe lahi te ʼu ako neʼe mā maʼu mai te faʼa kataki mo te fiafia ʼa te tehina mo tuagaʼane ʼo Haïti. Tokolahi ia natou neʼe tau mo he ʼu faigataʼaʼia, kae neʼe ʼoʼofa ia Sehova mo leleiʼia te minisitelio. Neʼe ʼi ai te tuagaʼane kua vaivai neʼe mole poto ʼi te lautohi, kae neʼe ina maʼu loto te ʼu vaega Tohi-Tapu ʼe 150. ʼI te hoko ʼo te ʼu fihifihia ʼo te fenua, neʼe toe ʼasili malohi age tamā fia tala te logo ʼo te Puleʼaga ki te hahaʼi ʼ o fakaha kia natou ʼe ko te Puleʼaga pe ʼaia ka ina fakatokatoka te ʼu fihifihia ʼo te tagata. Neʼe malave ʼosi kia maua tamā sisio ʼae neʼe liliu leva tamā ʼu ʼuluaki ako ko he ʼu pionie katoa, pionie makehe pea mo tagata ʼafeā.

ʼI taku nofo ʼi Haïti, neʼe au felaveʼi mo Trevor ko he tupulaga misionea mormon. Neʼe tuʼa lahi tamā faipalalau ki te Tohi-Tapu. Hili ki ai ni taʼu, neʼe au maʼu he tohi mai ia ia neʼe mole pe au ʼamanaki ki ai. Neʼe ina tohi fenei: “ ʼE au papitema anai ʼi te fakatahi lahi ka hoko mai. ʼE au toe fia liliu ki Haïti ʼo pionie makehe ʼi te fenua ʼae neʼe au misionea ai kae kei au Mormon.” Pea ko te aluʼaga ʼaia neʼe hoko, neʼe gaue ai mo tona hoa lolotoga ni taʼu.

NEʼE MĀ ʼI EULOPA PEA ʼOSI LEVA KO AFELIKA

Neʼe ava leva te faifakamafola ʼi te potu esite ʼo Eulopa pea neʼe hinoʼi maua ki ai. ʼI te 1992, neʼe mā tau ki Ljubljana, ʼi Slovénie, ovi ki te koga meʼa neʼe lahilahi ake ai ʼaku matuʼa ʼi muʼa ʼo tamatou hiki ki Italia. ʼI te temi ʼaia, neʼe kei hoko pe te tau ʼi ʼihi potu fenua ʼo te Yougoslavie afeā. Neʼe tokaga te filiale ʼo Vienne (Autriche) pea mo te ʼu filiale ʼo Zagreb (Croatie) pea mo Belgrade (Serbie) ki te gaue faifakamafola ʼi te potu fenua ʼaia. Kae neʼe tonu leva ke tahi maʼu e te ʼu fenua ʼaia hana Petele.

Neʼe tonu leva ke mā ako he tahi lea mo agaʼi fenua. Neʼe ui fenei e te hahaʼi ʼo te fenua: “Jezik je težek,” ko tona fakaʼuhiga “ ʼE faigataʼa te leʼa.” Pea neʼe faigataʼa moʼoni ʼosi pe ia. Neʼe malave kia maua te nofo agatonu ʼa te ʼu tehina mo tuagaʼane ʼae neʼe natou tali lelei te ʼu fetogi ʼa te kautahi, pea mo tanatou tokagaʼi tonatou tapuakinaʼi e Sehova. Neʼe mā toe tokagaʼi aipe te fakatokatoka e Sehova te ʼu aluʼaga ʼaki te ʼofa, pea ʼi tona temi totonu. ʼI te ʼu taʼu ʼae neʼe mā nonofo ai ʼi Slovénie, neʼe lahi te ʼu ako neʼe mā maʼu ai. Pea ko te ʼu ako ʼae neʼe mā maʼu ʼi muʼa atu neʼe tokoni lahi mai kia maua ke mā tauʼi ʼomā fihifihia ʼi Slovénie.

Kae neʼe toe hoko te tahi ʼu fetogi ʼi tomā maʼuli. ʼI te 2000, neʼe hinoʼi maua ki Côte d’Ivoire, ʼi te potu uesite ʼo Afelika. Pea ʼi Novepeli 2002, neʼe ʼave maua ki Sierra Leone, ʼuhi ko te tau ʼae neʼe hoko ʼi te fenua. Neʼe hoko te tau ʼaia lolotoga taʼu ʼe 11. Pea neʼe faigataʼa te foimo mavae ʼi te fenua ʼaia. Kae neʼe tokoni mai kia maua te ʼu ako ʼae neʼe mā maʼu mai ai ke mā taupau tuʼumaʼu tomā fiafia.

Neʼe mā tokakaga tafito ki te hahaʼi ʼae neʼe natou fia iloʼi te moʼoni ʼi ai, ʼo feia mo ʼomā tehina mo tuagaʼane ʼae neʼe natou ʼutakiʼi te tau lolotoga ni taʼu. Neʼe natou masisiva ʼosi kae neʼe natou lotofoaki. Neʼe foaki e he tuagaʼane he ʼu mutuʼi meʼa kia Debbie. ʼI tona mole fia toʼo e Debbie, neʼe ui fenei age e te tuagaʼane: “Lolotoga te tau neʼe tokoni mai te ʼu tehina ʼo te tahi ʼu fenua kia matou. Kae ʼi te temi nei, ʼa matou leva te tokoni atu.” Neʼe mā fakatuʼutuʼu leva ke mā muliʼi tanatou faʼifaʼitaki.

Neʼe mā toe liliu leva ki Côte d’Ivoire. Kae neʼe toe hoko ʼi ai te ʼu maveuveu ʼuhi ko te ʼu fihi fakapolitike. Koia ʼi Novepeli 2004, neʼe ʼave leva maua ʼi he pūpū, ʼo mā olo pe mo tamā ʼu kato takitahi. Neʼe mā momoe ʼi te poʼuli ʼi lalo ʼi he nofoʼaga solia Falani. Pea ʼi te ʼala uhu ake, neʼe ʼave leva maua ki Suisse. ʼI tamā tau atu ki te ki te filiale ʼo Suisse ʼi te maʼupo, neʼe fakatalitali leleiʼi maua e te Komite ʼo Te Filiale mo te kau faiako ʼo te Ako ʼa Te Kau Faifekau Fakaminisitelio pea mo ʼonatou ʼohoana. Neʼe natou faʼofua mai pea mo foaki mai tamā meʼa kai neʼe kei vela pea mo te ʼu foʼi sokola. Neʼe malave ʼaupito kia maua.

Neʼe hinoʼi fakatemi maua ki Ghana. Pea ʼi te ʼosi leva ʼo te ʼu maveuveu ʼi Côte d’Ivoire, neʼe mā toe liliu leva ki ai. Neʼe tokoni lahi mai kia maua ia te agalelei mo te ʼofa ʼo te ʼu tehina mo tuagaʼane, ke mā lava tauʼi te feʼaveʼaki feia ʼo maua lolotoga te ʼu temi maveuveu, pea ke mā lava katakiʼi te hinoʼi fakatemi ʼo maua ki ʼihi fenua. Neʼe mā mahino mo Debbie, logo la ʼe maʼu tuʼumaʼu te ʼofa fakatautehina ʼi te kautahi ʼa Sehova, kae ʼe mole mā meʼa noaʼi anai ʼi he temi. Logo la neʼe mā fakalaka ʼi he ʼu temi faigataʼa ʼi te ʼu temi ʼaia, kae neʼe liliu ko he koga maʼuhiga ʼo tomā akoʼi.

NEʼE HINOʼI MAUA KI HE ʼU FENUA ALAPE

ʼI te 2006, neʼe mā maʼu he tohi mai te ʼu pilo lalahi ʼe fakaha mai ai ʼe hinoʼi maua ki he ʼu fenua Alape. Ko tona fakaʼuhiga, neʼe tonu leva ke mā ako he tahi lea mo agaʼi fenua pea mo toe tau anai mo te tahi ʼu faigataʼaʼia. Neʼe lahi te ʼu ako neʼe mā maʼu ʼi te ʼu fenua ʼaia neʼe lahi ai te ʼu fihifihia ʼuhi ko te politike pea mo te lotu. Neʼe mā leleiʼia ia te ʼu lea kehekehe neʼe maʼu ʼi te ʼu kokelekasio. Pea neʼe mā sisio ki tanatou logo tahi ʼi tanatou fakalogo ki te takitaki ʼa Sehova. Neʼe malave kia maua te faʼifaʼitaki ʼo te ʼu tehina mo tuagaʼane ʼi tanatou lototoʼa ʼo tauʼi te fakafeagai ʼo te famili, mo te ʼu kauga ako mo kauga gaue pea mo ʼonatou vahaʼa fale.

Neʼe mā kau ki he fakatahi makehe ʼi te 2012 ʼi Tel Aviv, ʼi Iselaele. Neʼe ko te hoki fakatahitahi feia e ʼa te hahaʼi ʼa Sehova talu mai te Penikosite ʼo te taʼu 33 H.T.S. Neʼe ko he aluʼaga fakagalo gataʼa ia!

ʼI te ʼu taʼu ʼaia, neʼe hinoʼi maua ki he fenua ʼe tapuʼi ai tatatou gaue. Neʼe mā ʼave he ʼu koga ʼo ʼatatou tohi, mo faifakamafola pea mo kau ki he ʼu fakatahi lalahi ʼe mole faʼa hahaʼi. Neʼe ʼi ai he kau solia neʼe tutuʼu mo ʼanatou mahafu ʼi he potu pe ʼo te fenua. Kae neʼe mā logoʼi tomā puipui ʼi tamā feoloʼaki tokakaga mo ʼihi tehina.

NEʼE MĀ TOE LILIU KI AFELIKA

ʼI te 2013, neʼe hinoʼi leva maua ki te Petele ʼo Kinshasa, ʼi Congo. Neʼe ko he fenua lahi mo matalelei ʼaupito. Kae ʼe lahi ai te kau masisiva pea mo te ʼu tau. ʼI te kamata neʼe mā ui fenei: “ ʼE mā iloʼi ia Afelika pea kua mā tokalelei.” Kae neʼe kei lahi te ʼu faʼahi neʼe tonu ke mā ako, tafito la moka mā olo ʼi he ʼu koga meʼa ʼe mole ʼi ai he ʼu ala pea mo he ʼu ʼaleso. Kae neʼe lahi te ʼu faʼahi ʼe lelei neʼe mā sisio tafito ki ai. Ohage la, ko te faʼa kataki mo te fiafia ʼa te ʼu tehina logo la te ʼu faigataʼa fakaekonomika mo tanatou faʼafai ʼi te minisitelio pea mo ʼanatou faiga ke natou kau ki te ʼu fono mo te ʼu fakatahi lalahi. Neʼe mā sisio mata ki te tuputupu ʼo te gaue faifakamafola, ʼuhi pe ko te tokoni mo te tapuakina ʼa Sehova. Ko tomā ʼu taʼu gaue temi katoa ʼi Congo, neʼe mā maʼu lahi ai he ʼu ako maʼuhiga, pea mo homā ʼu kaumeʼa neʼe liliu ko homā famili.

ʼI te ʼosi ʼo te taʼu 2017, neʼe hinoʼi maua ki Afelika Saute. Neʼe ko tamā hoki gaue e ʼi he filiale lahi feia. Pea neʼe mata foʼou kia maua te ʼu gaue ʼi te Petele. Koia, neʼe toe lahi te ʼu faʼahi neʼe mā ako. Kae neʼe toe tokoni mai kia maua te ʼu ako neʼe mā maʼu ʼi muʼa atu. Neʼe lahi te ʼu tehina mo tuagaʼane neʼe mā ʼoʼofa mamahi ai. Neʼe kua fualoa tanatou nonofo agatonu kia Sehova. Pea ʼe ko he meʼa fakaofoofo tamā sisio ki te gaue fakatahi ʼo te famili ʼo te Petele, logo la te kehekehe ʼo tonatou lanu mo ʼanatou agaʼi fenua. ʼE iloga lelei te tapuakina ʼa Sehova, moka kofuʼi e tana hahaʼi te uluagaaga foʼou pea mo maʼuliʼi te ʼu pelesepeto Fakatohi-tapu.

ʼI te ʼu taʼu ʼaia, neʼe mā fiafia mo Debbie ʼi te ʼu gaue neʼe mā fakahoko ʼi te ʼu fenua ʼae neʼe hinoʼi maua ki ai. Neʼe mā fakamamahani mo agaʼi fenua kehekehe mo ako ʼihi lea. Neʼe mole faigafua tuʼumaʼu. Kae neʼe mā logoʼi te ʼofa agatonu ʼo Sehova ʼaki tana kautahi pea te ʼu tehina mo tuagaʼane. (Pes. 144:2) ʼE mā tui papau neʼe lahi te ʼu faʼahi neʼe mā ako ʼi tamā gaue temi katoa maʼa Sehova, pea neʼe tokoni mai ke mā liliu ko he ʼu kaugana faʼafai ʼa Sehova.

ʼE au fakafetaʼi lahi ʼaupito ki te ako ʼae neʼe tuku mai e ʼaku matuʼā, mo te lagolago mai ʼo siʼoku ʼohoana ko Debbie, pea mo te ʼu faʼifaʼitaki lelei ʼo totatou famili fakalaumalie ʼi te kele katoa. Tatau aipe pe kotea te ʼu fetogi ʼe ʼamanaki hoko kia maua, kae ʼe mā fakatotonu ke hoko atu pe tamā tali te ʼu ako ʼae ʼe foaki mai e te tomā Faiako Lahi.