Neʼe Au Akoʼi Te Moʼoni Ki Te Hahaʼi Logo La ʼe Au Tuli

ʼI TE teitei taʼu 1910, neʼe mavae ʼaku matuʼā mai Tbilissi, ʼi Géorgie ʼo olo ki Canada. Neʼe nā maʼuʼuli ʼi te kiʼi fale gaue kele ʼe tuʼu ovi ki Pelly, ʼi Saskatchewan, ʼi te potu Uesite ʼo Canada. Neʼe au tupu ʼi te 1928. Neʼe matou toko ono pea neʼe ko au ia te muli. Neʼe mate taku tamai ia mahina ʼe ono ʼi muʼa ʼo taku tupu ake. Pea neʼe mate taku faʼe kaʼe neʼe kei au tamasiʼi. Mole faʼa fualoa ki ai, neʼe mate mo toku tokolua ʼae neʼe muʼa ko Lucy ʼi tona taʼu 17. Koia ʼae neʼe tokaga ai leva ia taku faʼe tagata ia Nick kia matou fuli.

ʼI taku kei veliveli, neʼe au tohoʼi te hiku ʼo te tahi hosi ʼo ʼamatou hosi. Neʼe matataku ai toku famili naʼa ʼakahi au e te hosi. ʼO natou kalaga mai ai ke tuku taku gaohi te hosi. Kaʼe neʼe au situʼa kia natou pea neʼe mole au logo ki ʼanatou kalaga. ʼE lelei pe, he neʼe mole ʼakahi au e te hosi. Kaʼe ʼi te ʼaho ʼaia, neʼe natou mahino ai leva ʼe au tuli.

ʼI te manatu ʼa te kaumeʼa ʼo toku famili, ʼe lelei age ke au alu ʼo ako ʼi te fale ako ʼo te ʼu fanau ʼae ʼe tuli. Koia, neʼe ʼave ai au e taku faʼe tagata ko Nick ki te fale ako ʼo te kau tuli ʼi Saskatoon, ʼi Saskatchewan. Neʼe mamaʼo ʼosi te fale ako ʼaia. Pea neʼe au mataku he neʼe ko toku taʼu nima pe ʼaia. Neʼe hoki feala pe taku alu ki fale moka hoko te ʼu temi malolo pea mo te ʼu temi vevela. Neʼe au ako ia te lea fakatuli pea neʼe au leleiʼia taku gaoʼi ʼae mo ʼihi fanau ʼae ʼe tuli.

ʼE AU AKO IA TE ʼU MOʼONI FAKATOHI-TAPU

ʼI te 1939, neʼe ʼohoana ia toku tokolua lahi ko Marion mo Bill Danylchuck. Neʼe nā tokakaga leva kia au mo toku tokolua ʼae ko Frances. Pea neʼe ko naua ʼae neʼe nā ʼuluaki ako mo te kau Fakamoʼoni ʼa Sehova. Lolotoga toku temi malolo, neʼe nā faiga malohi ke nā vaevae mai kia au te ʼu faʼahi ʼae neʼe nā ako ʼi te Tohi-Tapu. Neʼe mole faigafua tamatou felogoʼi koteʼuhi neʼe mole nā popoto ʼi te lea fakatuli. Kaʼe neʼe nā iloʼi, ʼe au leleiʼia te ʼu faʼahi ʼae ʼe au ako ʼo ʼuhiga mo Sehova. Neʼe au mahino ai, neʼe nā fai te ʼu meʼa ʼae ʼe ui ʼi te Tohi-Tapu. Koia neʼe au alu ai mo naua ki te faifakamafola. Mole faʼa fualoa ki ai, neʼe au fia papitema. Pea ʼi te ʼaho 5 ʼo Sepetepeli 1941, neʼe papitemaʼi au e Bill ʼi te foʼi poe neʼe ohu ki ai te vai mai te vai keli. Kaʼe neʼe momoko kovi ʼosi te vai.

ʼI te 1946, ʼi taku toe liliu ʼae ki fale ʼi te temi vevela, neʼe matou kau ki te fakatahi lahi ʼi Cleveland, ʼi Ohio, ʼi Amelika. ʼI te ʼuluaki ʼaho, neʼe tohi e toku tokolua te ʼu nota ke feala ai haku mulimuli ki te polokalama. Kaʼe ʼi te lua ʼaho leva, neʼe au fiafia he neʼe au logo neʼe ʼi ai te kiʼi kutuga ʼe lea fakatuli ʼi te fakatahi. Pea neʼe ʼi ai foki mo te tahi ʼe ina fakaliliu te fakatahi ki te lea fakatuli. Neʼe au mulimuli lelei ai leva ki te polokalama ʼo te fakatahi. Pea neʼe au fiafia he neʼe hoki au mahino lelei ai, pe ʼe kotea ʼae ʼe akoʼi mai ʼi te Tohi-Tapu.

ʼE AU AKOʼI TE MOʼONI KI TE HAHAʼI

ʼI te temi ʼaia, neʼe hoki ʼosi pe ia te Lua Tau Fakamalamanei. Pea neʼe fia fakaha e te hahaʼi tanatou fiameʼameʼa ʼo ʼuhiga mo tonatou fenua. Kaʼe ʼi taku toe liliu ki te fale ako, neʼe au fakatotonu ai ke au nofo agatonu kia Sehova. Koia, neʼe mole kei au kau ai ki te ʼu toʼotoʼoga fakapuleʼaga, ohage ko te toho ʼo te fuka, te hiva fakapuleʼaga pea mo te ʼu ʼaho lalahi. Neʼe mole kei au alu ʼo misa. Pea neʼe mole fiafia te kau faiako, ʼo natou fakamatakuʼi au mo natou fai he ʼu loi ke au fetogi taku manatu. Kaʼe neʼe tokagaʼi e ʼoku kaugā ako te aluʼaga ʼaia. Koia neʼe au maʼu ai he faigamalie ke au fakaha age te moʼoni kia natou. Ko ʼihi ʼi ʼoku kaugā ako neʼe natou tali ia te moʼoni pea ʼe kei natou tauhi pe nei kia Sehova. ʼE kau ai ia Larry Androsoff, mo Norman Dittrick pea mo Emil Schneider.

Ka au alu ki he tahi ʼu kolo, neʼe au faiga tuʼumaʼu pe ke au faifakamafola ki te kau tuli. Ohage la, ʼi te kolo ko Montréal, neʼe au alu ki te koga meʼa ʼae ʼe fakatahitahi ai te hahaʼi tuli. Neʼe au faifakamafola ai ki te tupulaga ko Eddie Tager, kaʼe neʼe kau ia ki he kutuga ʼe agamalohi. ʼO kaku ki tona mate ʼi te taʼu ʼaeni kua ʼosi, neʼe kau ʼi te kokelekasio lea fakatuli ʼi Laval, ʼi Québec. Neʼe au felaveʼi mo te tahi tupulaga ʼe higoa ko Juan Ardanez. Pea neʼe hage ia ko te kau Pelea. Koteʼuhi neʼe ina fai he ʼu fekumi moʼo vakaʼi pe ʼe ko te ʼu faʼahi ʼae ʼe ina lolotoga ako ʼe fakatafito ki te Tohi-Tapu. (Gaue 17:​10, 11) Neʼe ina tali ia te moʼoni pea neʼe liliu leva ʼo tagata ʼafeā ʼi Ottawa, ʼi Ontario ʼo kaku ki tona mate.

ʼI te 1950, neʼe au alu leva ki Vancouver. ʼE moʼoni, ʼe au leleiʼia taku faifakamafola ki te kau tuli, kaʼe ʼe mole au galoʼi anai ia taku faifakamafola ʼae ki te fafine ʼe mole tuli. ʼE higoa ko Chris Spicer pea neʼe au faifakamafola ki ai ʼi te ala. Neʼe ina tali ke momoli age ʼatatou nusipepa ʼi te mahina fuli. Pea neʼe loto ia ke au felaveʼi mo tona ʼohoana ko Gary. Neʼe au alu ai ki tonā ʼapi pea neʼe loaloaga tamatou felogoʼi ʼaki tamatou tohi ʼamatou palalau. Kaʼe neʼe hoki matou toe fesioʼaki pe hili ki ai he ʼu taʼu ʼi te fakatahi lahi ʼi Toronto, ʼi Ontario. Neʼe au punamaʼuli ʼi tanā ʼomai ʼo fakafelaveʼi mai. Pea neʼe ko te ʼaho pe ʼaia, neʼe papitema ai ia Gary. Ko te ako neʼe au taʼofi ʼi te aluʼaga ʼaia, ko te maʼuhiga ʼae ke tou faifakamafola tuʼumaʼu. Koteʼuhi ʼe mole feala ke tou iloʼi pe ʼe haʼu anai ia ia ʼae ʼe tou faifakamafola ki ai ki te moʼoni peʼe kailoa.

Ki muli age neʼe au toe liliu leva ki Saskatoon. Pea neʼe au felaveʼi mo te fafine neʼe ina kole mai ke au fai he ako te Tohi-Tapu ʼo tana mahaga fafine, ia Jean pea mo Joan Rothenberger. Neʼe nā ako pe ʼi te fale ako ʼo te kau tuli ʼae neʼe au ako ai. Mole faʼa fualoa ki ai, neʼe faifakamafola te ʼu mahaga ki ʼonā kaugā ako. Pea neʼe ko te toko nima ia natou ʼaia neʼe liliu leva ko te kau Fakamoʼoni ʼa Sehova. Ko te tahi neʼe higoa ko Eunice Colin. Neʼe ko te taʼahine neʼe au felaveʼi mo ia ʼi toku taʼu fakaʼosi ʼi te fale ako ʼo te kau tuli. ʼI te tahi ʼaho neʼe ina foaki mai taku foʼi lole pea neʼe ina kole mai pe ʼe feala la ke ma kaumeʼa. Ki muli age, neʼe ko he tahi neʼe maʼuhiga ʼaupito ʼi toku maʼuli. Koteʼuhi neʼe liliu ia ko toku ʼohoana.

ʼI te iloʼi leva e te faʼe ʼa Eunice ia tana ako te Tohi-Tapu, neʼe ina kole ki te pule ʼo te fale ako ke ina fakagata te ako Tohi-Tapu ʼa Eunice. Logo la neʼe toʼo e te pule ʼo te fale ako ʼana tohi fakatohi-tapu, kaʼe neʼe nofo agatonu aipe ia Eunice kia Sehova. ʼI te temi ʼae neʼe fia papitema ai, neʼe ui fenei age e ʼana matuʼā: “Kapau ʼe ke liliu ko he Fakamoʼoni ʼa Sehova, ʼe ke mavae anai ʼi fale.” Koia ʼi tona taʼu 17, neʼe alu ai ia Eunice ʼo maʼuli mo te famili ʼe tauhi kia Sehova. Neʼe hoko atu pe tana ako ia te Tohi-Tapu pea neʼe papitema leva ki muli age. Pea ʼi tama ʼohoana ʼi te taʼu 1960, neʼe mole ʼomai ʼana matuʼā ki toma ʼohoana. Kaʼe, ʼaki te temi, neʼe nā fakaʼapaʼapa leva kia maua, ʼuhi ko tama tui pea mo tama faʼahiga akoʼi ʼo ʼama fanau.

NEʼE TOKAGA IA SEHOVA KIA AU

Neʼe mole faigafua tamā taupau ʼama tamaliki tagata ʼe toko fitu, ʼuhi ko tamā tuli tokolua. Kaʼe neʼe ma faigaʼi pe ke natou popoto ʼi te lea fakatuli ke feala hamatou felogoʼi pea ke ma akoʼi age kia natou ia te moʼoni. Neʼe tokoni lahi mai te ʼu tehina mo tuagaʼane ʼi te kokelekasio. Ohage la, ʼi te kiʼi tohi, neʼe fakaha mai e he tahi ʼo te kokelekasio neʼe tauvele tamā tama ʼi te Fale Fono. Neʼe feala ke ma fakatokatoka atu aipe te faʼahi ʼaia. Ko te toko fa ʼi ʼama tama ʼe natou tagata ʼafeā pea ʼe natou tauhi agatonu mo ʼonatou ʼohoana kia Sehova. Ko James, mo Jerry, mo Nicholas, pea mo Steven. Ko Nicholas mo tona ʼohoana, ia Deborah ʼe nā gaue ʼi te filiale ʼo Pilitania ʼi te kutuga faifakaliliu ʼi te lea fakatuli. Pea ko Steven mo tona ʼohoana, ia Shan­nan ʼe nā gaue ʼi te filiale ʼo Amelika ʼi te kutuga faifakaliliu ʼi te lea fakatuli.

Kaʼe, neʼe maʼu leva e Eunice ia te kosea. Pea neʼe mate kaʼe neʼe kei toe pe te mahina ki te fakamanatu ʼo te ʼu taʼu 40 ʼo toma ʼohoana. Lolotoga te temi ʼae neʼe tau ai mo te mamahi, neʼe malohi aipe ia tana tui ki te ʼamanaki ʼo te fakatuʼuake. Pea ʼe au fakaʼamu mo fakatalitali ki te ʼaho ʼae ka ma toe felaveʼi ai.

ʼI te mahina ʼo Fepualio 2012, neʼe au toka pea fasi toku alaga. Neʼe au iloʼi ai ʼe mole kei feala haku nofo tokotahi. Koia ʼae neʼe au alu ai ʼo maʼuli mo te tahi ʼi ʼoku foha mo tona ʼohoana. ʼE matou kau ʼi te kokelekasio lea fakatuli ʼo Calgary pea ʼe kei au tagata ʼafeā pe. Pea ko taku hoki kau ʼae ki he kokelekasio lea fakatuli. Kaʼe neʼe feafeaʼi taku taupau ke malohi ʼaku felogoʼi mo Sehova lolotoga te ʼu taʼu ʼae neʼe au kau ai ʼi te kokelekasio lea Fakapilitania? Neʼe tokoni mai ia Sehova. Pea neʼe ina fakahoko tana fakapapau ʼae ke tokoni ki te ʼu fanau hala mo tamai. (Pesalemo 10:14) ʼE au lotofakafetaʼi kia natou fuli ʼae neʼe natou lotolelei ke tohi ʼanatou palalau. ʼO feia pe kia natou ʼae neʼe natou ako ia te lea fakatuli pea mo natou faiga ke natou fakahoko lea mai ʼi te lea fakatuli.

ʼI ʼihi temi neʼe faigataʼa, he ʼe mole matou femahinoʼaki mo te hahaʼi ʼae ʼe mole tuli. Moka au lotovaivai ʼi te ʼu lakaga ʼaia, neʼe au manatuʼi te ʼu palalau ʼae neʼe fai e Petelo kia Sesu: “ ʼAliki, ke matou olo la kia ai? ʼE ke maʼu te ʼu folafola ʼo te maʼuli heʼe gata.” (Soane 6:​66-68) Neʼe au ako ke au maʼu te faʼa kataki, ohage pe ko te ʼu tehina mo tuagaʼane tuli ʼae kua fualoa tanatou nonofo ʼi te moʼoni. Neʼe au ako ke au tuku taku falala kia Sehova mo tana kautahi. Pea neʼe tapuakinaʼi au e Sehova ʼi te ʼu aluʼaga kehekehe. ʼI te temi nei, kua lahi te ʼu tohi kua fakaliliu ki te lea fakatuli. Pea ʼe au fiafia he ʼe kua feala taku kau ki te ʼu fakatahi lalahi ʼe fai ʼi te Lea Fakatuli ʼo Amelika. ʼEi, neʼe foaki mai e Sehova ia te maʼuli fiafia mo te ʼu tapuakina ʼi taku tauhi ʼae kia te ia, ia totatou ʼAtua lahi.