’E Tali Koa e Te Kau Fakamo’oni ’a Sehova Ke Fai Kia Natou He ’u Faito’o?

’Ei, ’e tali e te kau Fakamo’oni ’a Sehova ia te ’u faito’o fakatoketa. Logo la ’e matou faiga ke matou taupau lelei tomatou ma’uli fakasino pea mo matou haohaoa mai te ’u mahaki, ka’e ’i ’ihi temi, ’e ’aoga mai he toketa. (Luka 5:31) ’I tona fakahagatonu, ohage ko Luka, ko ’ihi kau Fakamo’oni ’a Sehova ’e ko he kau toketa.—Kolose 4:14.

Ko ’ihi faito’o ’e fakafeagai ki te ’u pelesepeto Fakatohi-tapu, koia ’e matou fakafisi ai ki te ’u faito’o ’aia. Ohage la, ’e mole matou tali ia te faka’aoga’i ’o te ’u fo’i huki toto kote’uhi ’e tapu’i ’i te Tohi-Tapu ia te faka’aoga’i ’o te toto mo’o taupau ia te sino. (Gaue 15:20) ’O toe feia aipe, ’e tapu’i ’i te Tohi-Tapu ia te ’u fa’ahiga faito’o pea mo te ’u fa’ahiga fai ’e pipiki ki te “fakalauakau.”—Kalate 5:19-21.

Ka’e ’e lahi te ’u faito’o ’e mole fakafeagai ki te ’u pelesepeto Fakatohi-tapu. Koia la ’ae ’e ko he tonu ’a te tagata takitokotahi. ’E lagi fakatu’utu’u anai e he Fakamo’oni ke ina tali he fa’ahiga faito’o, ka’e ki he tahi age Fakamo’oni, ’e lagi fakafisi anai ia ki te faito’o pe ’aia.—Kalate 6:5.