Senesi

25 Neʼe toe ʼohoana leva ia Apalahamo mo he fafine neʼe higoa ko Ketula. 2 Ki muli age, neʼe ina fanauʼi ia Similane, mo Sokesane, mo Metane, mo Matiane,+ mo Sisepake pea mo Suake.+

3 Ko Sokesane ko te tamai ʼa Sepa pea mo Tetane.

Ko te ʼu foha ʼo Tetane neʼe ko Asulimi, mo Letusimi pea mo Leumime.

4 Ko te ʼu foha ʼo Matiane neʼe ko Efa, mo Efele, mo Anoke, mo Apita pea mo Eletaa.

Neʼe hifo mai ia natou fuli ʼaia mai ia Ketula.

5 Ki muli age, neʼe foaki e Apalahamo ʼana meʼa fuli kia Isaake,+ 6 kae neʼe ina foaki he ʼu meʼa ʼofa ki ʼona foha ʼae neʼe ina maʼu mo ʼana fafine. Pea ʼi tana kei maʼuli, neʼe ina fekauʼi ke natou olo ki te ʼu fenua ʼae ʼi te potu esite, ke natou mamaʼo ai mai tona foha ko Isaake.+ 7 Neʼe maʼuli ia Apalahamo ia taʼu ʼe 175. 8 Neʼe mate ia Apalahamo ʼi tona temi matuʼa, pea neʼe fiafia ʼi tona maʼuli, pea neʼe tuku fakatahi ia ia mo ʼana kui.* 9 Neʼe ʼavaifo ia ia e ʼona foha ko Isaake mo Isemaele ʼi te ʼana ʼo Makepela, ʼae ʼi te moʼi kele ʼo Efelone te foha ʼo Tesokale, te tagata Heti. Ko te moʼi kele ʼaia neʼe haga ki Mamele,+ 10 pea neʼe totogi e Apalahamo ki te ʼu foha ʼo Heti. Neʼe tuku ki ai te sino ʼo Apalahamo. Neʼe kua tuku ai te sino ʼo tona ʼohoana ko Sala.+ 11 ʼI te ʼosi mate ʼo Apalahamo, neʼe haga tapuakiʼi aipe e te ʼAtua tona foha ko Isaake,+ pea neʼe nofo ia Isaake ʼo ovi ki Peele-lasai-loi.+

12 Ko te hisitolia ʼaeni ʼo Isemaele,+ te foha ʼo Apalahamo ʼae neʼe ina maʼu mo Akale,+ te fafine faifekau Esipito ʼa Sala.

13 Koʼeni te ʼu higoa ʼo te ʼu foha ʼo Isemaele, ia tona hologa: Ko Nepasote+ tona ʼuluaki foha, mo Keta,+ mo Atepeele, mo Mipesame,+ 14 mo Misima, mo Tuma, mo Masa, 15 mo Atati, mo Tema, mo Setule, mo Nafise pea mo Ketema. 16 Neʼe ko te ʼu foha ʼaia ʼo Isemaele pea ko ʼonatou higoa ʼaia ʼo mulimuli ki ʼonatou kiʼi kolo pea mo ʼonatou nofoʼaga fale la,* neʼe ko pule ʼe toko 12 ʼo mulimuli ki ʼonatou famili.+ 17 Neʼe maʼuli ia Isemaele ia taʼu ʼe 137. Neʼe mate leva pea neʼe tuku fakatahi ia ia mo ʼana kui.* 18 Pea neʼe natou fakatuʼu tonatou nofoʼaga mai Avila,+ ʼae ʼe ovi ki Sule,+ ʼo mole faʼa mamaʼo mo Esipito ʼo kaku ki Asilia. Neʼe natou nonofo ovi ai ki ʼonatou tehina fuli.*+

19 Ko te hisitolia ʼaeni ʼo Isaake, te foha ʼo Apalahamo.+

Ko Apalahamo ko te tamai ʼa Isaake. 20 Neʼe taʼu 40 ia Isaake ʼi te temi ʼae neʼe ʼohoana ai mo Lepeka, te ʼofafine ʼo Petuele+ te tagata Alamea mai Patane-alame, pea ko te tokolua ʼo Lapane, te tagata Alamea. 21 Neʼe faikole mamahi ia Isaake kia Sehova ʼo ʼuhiga mo tona ʼohoana, he neʼe paʼa. Neʼe tali ai e Sehova tana kole, pea neʼe faitama leva tona ʼohoana ko Lepeka. 22 Pea neʼe ina logoʼi te fuhu ʼa te ʼu kiʼi toe ʼi tona fatu.+ Koia, neʼe ina ui ai: “Kapau koia, ʼe lelei age pe ke au mate.” Koia, neʼe ina fakafehuʼi ai ia Sehova ʼo ʼuhiga mo te faʼahi ʼaia. 23 Pea neʼe tali age e Sehova: “ ʼE ko toe ʼe lua ʼae ʼi tou fatu+ pea ʼe tupu anai mai ia koe he ʼu puleʼaga ʼe lua.+ ʼE malohi age anai he puleʼaga ʼi te tahi puleʼaga+ pea ko ʼae ʼe lahi ʼe tauhi anai ki ʼae ʼe veliveli.”+

24 Neʼe hoko mai leva te temi ʼae ke fanau ai, pea koʼeni, neʼe ko te mahagā ʼae ʼi tona fatu. 25 Pea neʼe haʼu te ʼuluaki ki tuʼa, neʼe ʼulu kena pea neʼe fulufulu tona sino,+ koia neʼe fakahigoaʼi ai ko Esau.*+ 26 Hili ʼaia, neʼe haʼu tona tehina ki tuʼa, pea neʼe ina puke te mulivaʼe ʼo Esau,+ koia neʼe fakahigoaʼi ai ko Sakopo.*+ Neʼe taʼu 60 ia Isaake ʼi te ʼaho ʼae neʼe nā tutupu ai.

27 Neʼe kua lalahi leva te ʼu tama. Neʼe liliu ia Esau ko he tagata kapu manu faiva+ pea neʼe tau alu ʼo kapu manu. Kae ko Sakopo neʼe ko he tagata neʼe mole ina fai he meʼa ʼe kovi pea neʼe nofo pe ia ʼi te ʼu fale la.+ 28 Neʼe ʼofa ia Isaake ia Esau he neʼe ina ʼaumai he kanoʼi manu ke ina kai, kae neʼe ʼofa ia Lepeka ia Sakopo.+ 29 ʼI te tahi ʼaho, neʼe lolotoga fakamoho e Sakopo tana meʼa kai, kae neʼe toe liliu mai ia Esau mai tana kapu manu pea neʼe kua gaʼegaʼe. 30 Neʼe ui e Esau kia Sakopo: “Fakalelei siʼou loto, foimo foaki mai haku meʼa kai mai te meʼa kai kula ʼaena, he ʼe kua au gaʼegaʼe ʼosi.”* Koia ʼae neʼe fakahigoa ai ko Etome.*+ 31 Neʼe tali age e Sakopo: “Fakatau mai muʼa kia au tou ʼuhiga ʼuluaki tupu!”+ 32 Pea neʼe ui age e Esau: “Koʼeni, kua au vave mate! Kotea te ʼaoga mai kia au toku ʼuhiga ʼuluaki tupu?” 33 Neʼe ui e Sakopo: “Fakapapau mai muʼa!” Neʼe ina fakapapauʼi age pea mo fakatau leva kia Sakopo tona ʼuhiga ʼuluaki tupu.+ 34 Neʼe foaki age leva e Sakopo he moʼi pane mo he lenitili kia Esau, pea neʼe kai ai mo inu. Hili ʼaia, neʼe tuʼu ake leva ʼo alu. Koia, neʼe meʼa noaʼi e Esau tona ʼuhiga ʼuluaki tupu.