Senesi

38 ʼI te temi ʼaia, neʼe mavae leva ia Suta ʼi ʼona tehina ʼo alu ʼo fakatuʼu tona fale la ʼi te koga meʼa ʼae neʼe maʼuli ai te tagata Atulami neʼe higoa ko Hila. 2 ʼI te koga meʼa ʼaia, neʼe sio ia Suta ki te ʼofafine ʼo he tagata Kanaane+ neʼe higoa ko Sua. Neʼe ʼohoana mo ia pea neʼe nā momoe leva. 3 Neʼe faitama leva te fafine pea ki muli age, neʼe ina fanauʼi he tamasiʼi tagata, pea neʼe fakahigoaʼi e Suta ko Ele.+ 4 Neʼe toe faitama pea neʼe ina fanauʼi he tamasiʼi tagata ʼo ina fakahigoaʼi ko Onane. 5 Pea neʼe ina toe fanauʼi he tamasiʼi tagata ʼo ina fakahigoaʼi ko Sila. Neʼe nofo ia* ʼi Akesipe+ ʼi te temi ʼae neʼe ina fanauʼi ai tana tamasiʼi.

6 Ki muli age, neʼe filifili e Suta he ʼohoana ʼo tona foha lahi ko Ele neʼe higoa ko Tamale.+ 7 Kae neʼe mole leleiʼia e Sehova te aga ʼo te foha lahi ʼo Suta ko Ele. Koia neʼe matehi ai ia ia e Sehova. 8 Pea neʼe ui leva e Suta kia Onane: “Ke ke ʼohoana mo te ʼohoana ʼo tou tehina ʼae kua mate, ke fakatupu ai he hako ki tou tehina.”+ 9 Kae neʼe iloʼi e Onane ʼe mole ko tona hakoga anai ʼaia.+ Koia ʼi te temi ʼae neʼe momoe ai mo te ʼohoana ʼo tona tehina, neʼe ina tuku ke hali tona huʼa vai ki te kele, ke mole maʼu ai e tona tehina hona hakoga.+ 10 Neʼe kovi kia mata ʼo Sehova te meʼa ʼaia neʼe ina fai, koia neʼe ina toe matehi ai mo ia.+ 11 Pea neʼe ui leva e Suta kia Tamale, te ʼohoana ʼo tona foha: “Ke ke nofo ʼi te ʼapi ʼo tau tamai pea ʼaua naʼa ke toe ʼohoana, ʼo kaku ki te kua lahi ʼo toku foha ko Sila.” Neʼe palalau feia ia Suta he neʼe mataku naʼa toe mate tona foha ko Sila ohage ko ʼona taʼokete.+ Koia neʼe alu ai ia Tamale ʼo nofo ʼi te ʼapi ʼo tana tamai.

12 Hili ki ai he temi, neʼe mate leva te ʼohoana ʼo Suta, ia te ʼofafine ʼo Sua.+ ʼI te ʼosi ʼo te temi putu ʼo Suta, neʼe alu mo tona kaumeʼa ko Hila, te tagata Atulami+ ki ʼana tagata ʼae neʼe natou tele te faga ovi ʼi Timenea.+ 13 Neʼe fakaha leva kia Tamale: “Koʼeni ʼe alu te tamai ʼo tou ʼohoana ki Timenea ʼo tele tana faga ovi.” 14 Neʼe ina huʼi ai tona teu vitua kae ina ʼai tona pulupulu pea mo pulouʼi tona fofoga. Pea neʼe alu ʼo nofo ʼi te huʼaga ʼo te kolo ko Enaimi, ʼae ʼe tuʼu ʼi te ala ʼae ʼe alu ki Timenea, he neʼe sio kua lahi ia Sila kae neʼe heʼeki foaki e Suta ia ia ke nā ʼohoana.+

15 ʼI te sio ʼa Suta kia ia, neʼe manatu atu aipe ko he fafine paomutu he neʼe ina pulouʼi tona fofoga. 16 Koia neʼe afe age ki ai pea neʼe ina ui age: “Fakalelei siʼou loto, tuku muʼa ke au momoe mo koe,” he neʼe mole ina iloʼi neʼe ko te ʼohoana ʼo tona foha.+ Kae neʼe ina tali age: “Kotea ʼae ka ke foaki mai ke ta momoe?” 17 Neʼe ina tali age: “ ʼE au fekauʼi anai he tahi ke haʼu mo he tao kei mui ʼo taku faga manu.” Kae neʼe ina ui age ki ai: “ ʼE ke foaki mai anai koa he meʼa moʼo fakamoʼoni ʼaki tau fakapapau ʼo kaku ki taku hoki maʼu te manu ʼaia?” 18 Pea neʼe ina fehuʼi age: “Kotea ʼae ʼe tonu ke au foaki atu?” Neʼe ina tali: “Tou mama fakailoga,+ mo tona kavei pea mo te toko ʼae ʼi tou nima.” Neʼe ina foaki age te ʼu meʼa ʼaia, pea neʼe momoe mo ia. Neʼe faitama leva ki ai. 19 Hili ʼaia, neʼe alu pea neʼe ina toʼo leva tona pulupulu kae ina tui tona teu vitua.

20 Pea neʼe fekauʼi e Suta tona kaumeʼa, ia te tagata Atulami+ ke alu ʼo ʼave te tao ʼae kei mui pea ke ina toe toʼo te ʼu meʼa ʼae neʼe ina foaki ki te fafine ʼaia. Kae neʼe mole ina maʼu ia ia. 21 Neʼe ina fehuʼi ki te ʼu tagata ʼo te kolo: “ ʼE ʼifea te fafine paomutu ʼo te fale lotu* ʼo te kolo ʼaeni ko Enaimi, ʼae neʼe nofo mahani ʼi te vaʼe ala?” Kae neʼe natou tali age: “ ʼE mole ʼi heni he fafine paomutu ʼo te fale lotu.” 22 Neʼe toe liliu leva kia Suta pea neʼe ina ui age ki ai: “Neʼe mole au maʼu ia ia, pea tahi ʼae meʼa, neʼe ui mai e te ʼu tagata ʼo te kolo ʼaia: ‘ ʼE mole ʼi heni he fafine paomutu ʼo te fale lotu.’ ” 23 Pea neʼe ui e Suta: “Ke ina toʼo te ʼu meʼa ʼaia maʼa ia, ke mole fehiʼaʼinaʼi ai taua. Neʼe kua au ʼosi fekauʼi koe ke ke alu ʼo ʼave te tao ʼaeni kei mui, kae neʼe mole ke maʼu koe.”

24 Kae hili ki ai mahina ʼe tolu, neʼe fakaha kia Suta: “Ko Tamale, te ʼohoana ʼo tou foha, neʼe liliu ko he fafine paomutu pea kua faitama.” Neʼe ui e Suta: “Kotou ʼave ia ia ki tuʼa pea kotou tutu.”+ 25 ʼI tona lolotoga ʼave ʼaia ki tuʼa, neʼe ina fekauʼi he tahi ke alu ʼo ui ki te tamai ʼo tona ʼohoana: “ ʼE au faitama ki te tagata ʼae ʼaʼana te ʼu meʼa ʼaeni.” Pea neʼe ina toe ui: “Fakalelei siʼou loto, ke ke vakavakaʼi pe ʼa ai te mama fakailoga, mo te kavei pea mo te toko.”+ 26 Neʼe vakavakaʼi ai e Suta pea neʼe ina ui: “ ʼE faitotonu age ia ia au, he neʼe mole au foaki ia ia ki toku foha ko Sila.”+ Pea hili ʼaia, neʼe mole toe momoe leva mo ia.

27 ʼI te temi ʼae neʼe tonu ke fanau ai, neʼe ko te mahagā ʼae neʼe ʼi tona fatu. 28 ʼI tana lolotoga fanau, neʼe haʼu ki tuʼa te nima ʼo he tahi ʼo te mahagā. Pea neʼe foimo toʼo e te fafine faifanau he filo kula ʼo ina haʼi ʼaki tona nima pea neʼe ina ui: “Ko ia ʼaeni neʼe ʼuluaki haʼu ki tuʼa.” 29 Kae ʼi te temi pe ʼae neʼe ina toe fakaulu ai tona nima, neʼe haʼu ki tuʼa tona tehina. Neʼe ui e te fafine faifanau: “Kua ke faiga malohi ke ke haʼu ki tuʼa!” Koia neʼe fakahigoaʼi ai ko Pelesi.*+ 30 Hili ʼaia, neʼe haʼu leva ki tuʼa tona tehina ʼae neʼe haʼi tona nima ʼaki te filo kula, pea neʼe fakahigoaʼi ko Sela.+