Senesi
43 Neʼe kovi ʼosi te hoge ʼi te fenua.+ 2 ʼI tanatou ʼosi kai te meʼa kai* ʼae neʼe natou ʼaumai mai Esipito,+ neʼe ui e tanatou tamai kia natou: “Kotou toe liliu ʼo totogi mai hatatou meʼa kai.” 3 Kae neʼe tali age e Suta ki ai: “Neʼe fakatokaga lelei mai e te tagata kia matou ke ʼaua naʼa matou toe ha age kia ia mo kapau ʼe mole matou olo age mo tomatou tehina.+ 4 Kapau ʼe ke tuku tomatou tehina ke haʼu mo matou, ʼe matou olo anai ʼo totogi mai hau meʼa kai. 5 Kae kapau ʼe mole ke tuku ke haʼu mo matou, ʼe mole matou olo anai. ʼEi, neʼe ui mai e te tagata kia matou ke ʼaua naʼa matou toe ha age kia ia mo kapau ʼe mole matou olo age mo tomatou tehina.”+ 6 Neʼe ui e Iselaele:+ “He koʼe koa ʼe kotou fakamamahiʼi feiaʼi ia au? He koʼe koa neʼe kotou fakaha age ki te tagata ʼe ʼi ai tokotou tahi tehina?” 7 Neʼe natou tali age: “Neʼe fai mai e te tagata he ʼu fehuʼi fakahagatonu ʼo ʼuhiga mo matou pea mo ʼomatou kaiga, ʼo ina ui mai: ‘ ʼE kei maʼuli koa takotou tamai? ʼE ʼi ai koa hokotou tahi tehina?’ pea neʼe matou tali ki ʼana fehuʼi.+ Neʼe feala koa ke matou iloʼi ʼe ina ui mai anai: ‘Kotou ʼaumai tokotou tehina’?”+
8 Pea neʼe uga leva e Suta tana tamai ko Iselaele ʼo ina ui age: “Tuku ke haʼu tomatou tehina muli mo au+ pea ke matou olo, ke ʼaua naʼa tou mamate ʼi te pakupaku+ ʼo feia mo ʼatatou fanau.+ 9 ʼE au tokaga anai ki ai.+ Pea kapau ʼe hoko he meʼa ki ai, ʼe feala anai ke ke tauteaʼi au. Kapau ʼe mole au toe liliu mai mo ia pea mo ʼaumai ia ia ki ʼou muʼa, ʼe au agahala anai kia koe ʼo talu ai. 10 Pea ka na pau la neʼe mole matou tuai, kua tuʼa lua nei hamatou toe liliu mai.”
11 Pea neʼe ui e tanatou tamai ko Iselaele kia natou: “Kapau koia, pea kotou fai te meʼa ʼaeni: Kotou fafaʼo ki ʼakotou taga te ʼu meʼa ʼae ʼe lelei ʼaupito ʼo te fenua pea kotou foaki ki te tagata ohage ko hana meʼa ʼofa:+ he moʼi lolo magoni,+ mo he moʼi meli, mo te puluʼi ʼakau magoni ʼae ko te latanume, mo he ʼu kiliʼi ʼakau,+ mo ni fuaʼi pinati pea mo ni fuaʼi amatie. 12 Kotou liufaki te falā ʼae neʼe kotou maʼu ʼi ʼakotou taga,+ neʼe lagi ko he faihala. Pea ke toe liuga lua age te falā ʼae ʼe kotou ʼave. 13 Kotou ʼave tokotou tehina pea kotou olo, kotou toe liliu ki te tagata. 14 ʼOfa pe ke uga e te ʼAtua Mafimafi ia te tagata ʼaia ke ʼofa kia koutou, pea ke ina tuku atu tokotou tahi tehina pea mo Pesamino. Kae kapau ʼe tonu ke toʼo ʼaku fanau, pea ke au tali te aluʼaga ʼaia!”+
15 Neʼe toʼo ai e te ʼu tagata te meʼa ʼofa ʼaia, mo te falā pea mo Pesamino. Neʼe natou olo ai leva ki Esipito pea neʼe natou toe tutuʼu ia muʼa ʼo Sosefo.+ 16 ʼI te sio ʼa Sosefo neʼe haʼu ia Pesamino mo natou, neʼe ina foimo ui ki te tagata ʼae neʼe tokaga ki tona loto fale: “ ʼAve te ʼu tagata ʼaeni ki fale, pea ke matehi he ʼu manu mo ke teuteuʼi he meʼa kai, he ʼe kakai anai te ʼu tagata ʼaeni mo au ʼi te fetapa.” 17 Neʼe fai atu aipe e te tagata te ʼu meʼa ʼae neʼe fakatotonu age e Sosefo,+ pea neʼe ina ʼave natou ki te fale ʼo Sosefo. 18 Kae neʼe matataku te ʼu tagata ʼi tonatou ʼave ʼaia ki te fale ʼo Sosefo, pea neʼe natou ui: “ ʼE ʼave tatou ki ai ʼuhi ko te falā ʼae neʼe toe ʼai ki ʼatatou taga ʼi muʼa atu. ʼE natou puke mo fakakauganaʼi anai tatou pea mo toʼo ʼatatou asino!”+
19 Neʼe natou fakaovi ai ki te tagata ʼae neʼe tokaga ki te loto fale ʼo Sosefo, ʼo natou palalau age ki ai ʼi te huʼaga ʼo te fale. 20 Neʼe natou ui age: “Siʼomatou ʼaliki, ke ke fakalelei mai. Neʼe matou ʼomai ʼi te tahi ʼaho ʼo totogi hamatou meʼa kai.+ 21 Kae ʼi tamatou toe liliu, neʼe matou tutuʼu leva ʼi he koga meʼa ke matou momoe ai pea neʼe matou avahi leva ʼamatou taga. Pea koʼeni, neʼe matou tahi maʼu tana falā ʼi tana taga, ʼei, te falā katoa.+ Koia, ʼe matou loto ai ke matou toe liufaki atu te falā ʼaia. 22 ʼE mole matou iloʼi pe ko ai ʼae neʼe ina toe ʼai tamatou falā ki ʼamatou taga. Pea ʼe lahi te falā ʼae neʼe matou toe ʼomai mo ia ke totogi ʼaki hamatou meʼa kai.”+ 23 Neʼe ina tali age kia natou: “ ʼE lelei pe ia. ʼAua naʼa kotou matataku. Neʼe ko tokotou ʼAtua, te ʼAtua ʼo takotou tamai ʼae neʼe ina ʼai te koloa ʼaia ki ʼakotou taga. Neʼe kua fakatoʼo mai pe takotou falā.” Hili ʼaia, neʼe ina ʼaumai ia Simeone kia natou.+
24 Neʼe fakahu ia natou e te tagata ki te loto fale ʼo Sosefo, pea neʼe ina foaki age he moʼi vai ke fufulu ai ʼonatou vaʼe mo he meʼa kai ki ʼanatou asino. 25 Neʼe natou teuteuʼi leva te meʼa ʼofa+ ʼo fakatalitali ke alu age ia Sosefo ʼi te fetapa, he neʼe natou logo ʼe natou kakai anai ʼi tona fale.+ 26 ʼI te hu ʼa Sosefo ki tona ʼapi, neʼe natou ʼaumai tonatou meʼa ʼofa kia ia pea neʼe natou tulolo ki te kele ʼi ʼona muʼa.+ 27 Hili ʼaia, neʼe ina fehuʼi age pe ʼe natou lelei pe pea neʼe ina ui age: “ ʼE feafeaʼi takotou tamai ʼae kua matuʼa neʼe kotou palalau mai ki ai? ʼE kei maʼuli koa?”+ 28 Neʼe natou tali age: “Siʼomatou ʼaliki, ʼe lelei pe tamatou tamai. ʼE kei maʼuli.” Pea neʼe natou punou mo tulolo ai.+
29 ʼI tana sio ki tona tehina ko Pesamino, te tama ʼa tana faʼe,+ neʼe ina ui: “Ko tokotou tehina muli koa ʼaeni, ʼae neʼe kotou palalau mai ki ai?”+ Neʼe ina toe ui: “Siʼoku foha, ke tapuakiʼi koe e te ʼAtua.” 30 Neʼe alu fakavilivili leva ia Sosefo ki tuʼa he neʼe lahi ʼaupito te ʼu meʼa ʼae neʼe ina logoʼi ʼi tona loto ʼi tana sio ki tona tehina. Neʼe ina kumi he koga meʼa ke alu ʼo tagi ai, pea neʼe hu ki he koga fale ʼo tagi ai.+ 31 Hili ʼaia, neʼe ina fufulu leva ʼona mata pea neʼe toe liliu mai. Neʼe ina lolomi te ʼu meʼa ʼae ʼi tona loto pea neʼe ina fakatotonu ke ʼaumai te meʼa kai. 32 Neʼe kai kehe pe ia ia, pea neʼe kakai kehe pe ʼona tehina, pea neʼe toe kakai kehe mo te kau Esipito. ʼEi, neʼe mole feala ke kakai fakatahi te kau Esipito mo te kau Hepeleo he neʼe ko he meʼa fakalialia ki te kau Esipito.+
33 Neʼe heheka ʼona tehina* ʼi ʼona muʼa, mai ʼae ʼe lahi ʼo mulimuli ki tona ʼuhiga ʼuluaki tupu+ ki ʼae ʼe veliveli, pea neʼe natou fesioʼaki mo punamaʼuli. 34 Neʼe fakatotonu e Sosefo ke ʼave he meʼa kai ʼi tona laupapa ki tonatou laupapa, kae neʼe lahi pe te vahe ʼo Pesamino ʼo tuʼa nima age ʼi te vahe ʼo ʼona tehina.+ Neʼe natou kakai ai mo iinu fakatahi mo ia ʼo kaku ki tanatou makokona.