Senesi

47 Neʼe alu ai ia Sosefo ʼo fakaha kia Falaone:+ “Kua haʼu taku tamai pea mo ʼoku tehina mo tanatou faga ovi mo faga pipi, pea mo ʼanatou meʼa fuli mai te fenua ʼo Kanaane. Pea kua natou nonofo nei ʼi te fenua ʼo Koseni.”+ 2 Neʼe ina toʼo leva ʼona tehina ʼe toko nima ʼo ʼave kia muʼa ʼo Falaone.+

3 Pea neʼe fehuʼi e Falaone ki ʼona tehina: “Kotea takotou gaue?” Neʼe natou tali kia Falaone: “Siʼomatou ʼaliki, ko matou ko he ʼu tagata tauhi ovi, ohage pe ko ʼamatou kui.”+ 4 Pea neʼe natou toe ui kia Falaone: “Neʼe matou ʼomai ʼo nonofo ohage ko ni matapule ʼi te fenua,+ koteʼuhi kua kovi ʼosi te hoge ʼi te fenua ʼo Kanaane+ pea ʼe mole ʼi ai he ʼu koga meʼa lunaʼia maʼa tamatou faga manu. Koia, fakalelei siʼou loto, ke ke fakagafua mai kia matou ko ʼau hahaʼi faifekau, ke matou nonofo ʼi te fenua ʼo Koseni.”+ 5 Pea neʼe ui e Falaone kia Sosefo: “Kua haʼu tau tamai mo ʼou tehina ki heni kia koe. 6 ʼE feala ke ke filifili he koga meʼa ʼi te fenua ʼo Esipito. Ke nofo tau tamai mo ʼou tehina ʼi te koga meʼa ʼae ʼe lelei ʼaupito ʼo te fenua.+ Ke natou nonofo ʼi te fenua ʼo Koseni, pea kapau ʼe ke iloʼi he ʼu tagata faʼafai ia natou, ke ke tuku ke natou tokakaga ki taku faga manu.”

7 Neʼe ʼave leva e Sosefo tana tamai ko Sakopo kia muʼa ʼo Falaone, pea neʼe tapuakiʼi e Sakopo ia Falaone. 8 Neʼe fehuʼi e Falaone kia Sakopo: “Ko tou taʼu fia ʼaeni?” 9 Neʼe tali e Sakopo kia Falaone: “Ko toku taʼu 130 ʼaeni pea neʼe au fealuʼaki ʼi toku maʼuli katoa.* Neʼe ko he ʼu taʼu faigataʼa,+ pea ʼe mole au kaku anai ki te ʼu taʼu ʼo ʼaku kui ʼae neʼe maʼuli feoloʼaki.”*+ 10 Hili ʼaia, neʼe tapuakiʼi e Sakopo ia Falaone pea neʼe mavae leva mai ia muʼa ʼo Falaone.

11 Pea neʼe fakanofo e Sosefo tana tamai mo ʼona tehina ʼi te fenua ʼo Esipito. Neʼe ina foaki kia natou honatou kele ʼi Lamisese,+ te koga meʼa ʼae ʼe lelei ʼaupito ʼo te fenua, ohage pe ko tona fakatotonu age e Falaone. 12 Pea neʼe ʼave tuʼumaʼu pe e Sosefo he meʼa kai ʼa* tana tamai, mo ʼona tehina pea mo te loto fale katoa ʼo tana tamai, ʼo mulimuli pe ki te kaugamalie ʼo ʼanatou fanau.

13 Neʼe mole kei ʼi ai he meʼa kai* ʼi te fenua, koteʼuhi neʼe kovi ʼosi te hoge. Pea neʼe gaʼegagaʼe te hahaʼi ʼo te fenua ʼo Esipito mo te hahaʼi ʼo te fenua ʼo Kanaane ʼuhi ko te hoge.+ 14 Neʼe tanaki e Sosefo te falā ʼae neʼe totogi ʼaki e te hahaʼi ʼo te fenua ʼo Esipito pea mo te fenua ʼo Kanaane tanatou meʼa kai.*+ Pea neʼe tuku e Sosefo te falā ʼaia ki te fale ʼo Falaone. 15 Ki muli age, neʼe mole kei ʼi ai he falā ʼi te fenua ʼo Esipito pea mo te fenua ʼo Kanaane. Neʼe ʼomai leva te kau Esipito fuli kia Sosefo, ʼo ui age ki ai: “Foaki mai hamatou meʼa kai! ʼE tonu koa ke matou mamate ʼi ʼou muʼa ʼi te pakupaku he ʼe mole kei ʼi ai hamatou falā?” 16 Neʼe tali age e Sosefo kia natou: “Kapau ʼe mole kei ʼi ai hakotou falā, kotou foaki mai takotou faga manu pea ʼe hoki au foaki atu anai hakotou meʼa kai.” 17 Neʼe natou ʼaumai ai tanatou faga manu kia Sosefo. Neʼe foaki ai e Sosefo hanatou meʼa kai kae neʼe natou foaki age kia ia ʼanatou hosi, mo ʼanatou ovi, mo ʼanatou tao, mo tanatou faga pipi pea mo ʼanatou asino. ʼI te taʼu katoa ʼaia, neʼe ina foaki age kia natou hanatou meʼa kai kae neʼe natou foaki age tanatou faga manu fuli.

18 ʼI te ʼosi leva ʼo te taʼu ʼaia, neʼe natou ʼomai kia ia ʼi te taʼu ʼae neʼe hoa mai ki ai, ʼo natou ui age: “Siʼomatou ʼaliki, ʼe mole matou fufu atu anai he meʼa. Neʼe kua matou foaki atu tamatou falā pea mo tamatou faga manu fuli. Koia siʼomatou ʼaliki, ʼe mole kei toe he meʼa ke matou foaki atu, gata pe ki ʼomatou kele pea mo matou totonu. 19 ʼE tonu koa ke matou mamate ʼi ʼou muʼa ʼi te pakupaku pea ke tuʼu noa ʼomatou kele? Ke ke toʼo ia matou mo ʼomatou kele kae ke ke foaki mai hamatou meʼa kai. Pea ʼe matou liliu anai ko he ʼu kaugana ʼa Falaone pea ʼe ina maʼu anai ʼomatou kele. Foaki mai hamatou pulapula ke ʼaua naʼa matou mamate pea ke mole tuʼu noa ʼomatou kele.” 20 Neʼe totogi leva e Sosefo maʼa Falaone te ʼu kele fuli ʼa te kau Esipito koteʼuhi neʼe tahi fakatau e te kau Esipito tona moʼi kele, he neʼe kovi ʼosi te hoge. Koia, neʼe maʼu leva e Falaone ia te fenua.

21 Neʼe ina ui age leva ki te kau Esipito fuli ke natou olo ʼo nonofo ʼi te ʼu kolo.+ 22 Neʼe gata pe ki te kele ʼo te kau pelepitelo ʼae neʼe mole ina totogi,+ he neʼe foaki e Falaone ki te kau pelepitelo tanatou meʼa kai pea neʼe maʼuli pe natou ki te meʼa kai ʼae neʼe foaki age e Falaone. Koia ʼae neʼe mole natou fakatau ai tonatou kele. 23 Pea neʼe ui e Sosefo ki te hahaʼi: “ ʼI te ʼaho nei, kua au totogi ia koutou mo ʼokotou kele maʼa Falaone. ʼE au foaki atu te pulapula ke kotou olo ʼo nunusi ʼi te ʼu gaueʼaga. 24 Pea ka kotou tanaki te taʼukai, ʼe kotou foaki anai te vahe tahi ki te nima kia Falaone+ kae ʼe kotou maʼu anai te ʼu vahe ʼe fa. ʼE feala anai ke kotou nunusi te pulapula ʼo te ʼu vahe ʼaia ʼi te ʼu gaueʼaga pea ke liliu ko hakotou meʼa kai, ʼo feia mo ʼokotou loto fale pea mo ʼakotou fanau.” 25 Pea neʼe natou ui: “Siʼomatou ʼaliki, neʼe ke haofaki ʼomatou maʼuli.+ Koia, ke ke toe fakaha mai tou ʼofa kia matou ʼi te ʼaho nei pea ʼe matou kaugana anai kia Falaone.”+ 26 Neʼe fakatuʼu leva e Sosefo te lao ʼaeni: ʼE tonu ke foaki kia Falaone te vahe tahi ki te nima ʼo te taʼukai. Pea ʼe kei mulimuli pe te fenua katoa ʼo Esipito ki te lao ʼaia ʼo kaku mai ki te ʼaho nei. Neʼe gata pe ki te ʼu kele ʼo te kau pelepitelo neʼe mole maʼu e Falaone.+

27 Neʼe haga nofo aipe ia Iselaele mo tona famili ʼi te fenua ʼo Esipito, ʼi Koseni.+ Neʼe natou nonofo ai, mo maʼu fanau pea neʼe natou liliu ai ʼo kaugamalie.+ 28 Neʼe maʼuli ia Sakopo ʼi te fenua ʼo Esipito lolotoga taʼu ʼe 17. Koia, neʼe maʼuli ia Sakopo ia taʼu ʼe 147.+

29 ʼI te kua vave mate ʼa Iselaele,+ neʼe ina pauʼi tona foha ko Sosefo pea neʼe ina ui age ki ai: “ ʼI te lakaga nei, kapau ʼe ke ʼofa ia au, fakalelei siʼou loto, ke ke ʼai tou nima ki toku lalo kauaga,* pea ke ke fakaha mai kia au tau agalelei* pea mo tau agatonu. Fakalelei siʼou loto, ʼaua naʼa ke ʼavaifo ia au ʼi Esipito.+ 30 Ka au mate,* ʼe tonu ke ke toʼo toku sino ʼi Esipito ʼo ʼave ʼo tuku ʼi te fale maka ʼo ʼaku kui.”+ Neʼe tali age e Sosefo: “ ʼE au fai pe anai ʼo mulimuli ki ʼau palalau.” 31 Pea neʼe ina ui age ki ai: “Fakapapau mai kia au.” Pea neʼe fakapapauʼi age e Sosefo.+ Neʼe punou leva ia Iselaele ia muʼa ʼo te ʼAtua ʼi tana nofo ʼae ʼi tona palepale.+