Senesi

50 Neʼe punou leva ia Sosefo ki tana tamai+ ʼo ʼuma ki ai mo tagi. 2 Hili ʼaia, neʼe fakatotonu e Sosefo ki ʼana hahaʼi faifekau, ia te kau toketa, ke natou teuteuʼi* te sino+ ʼo tana tamai. Neʼe teuteuʼi ai e te kau toketa te sino ʼo Iselaele. 3 Neʼe natou fai te faʼahi ʼaia lolotoga ʼaho ʼe 40, he neʼe ko te temi ʼaia neʼe ʼaoga moʼo teuteuʼi ai te sino ʼo he mate. Pea neʼe faifetagihi te kau Esipito ʼo ʼuhiga mo ia lolotoga ʼaho ʼe 70.

4 Hili te temi putu, neʼe ui e Sosefo ki te hahaʼi gaue ʼa* Falaone: “Kapau ʼe kotou ʼoʼofa ia au, kotou fakaha age te logo ʼaeni kia Falaone: 5 ‘Neʼe ui mai e taku tamai: “Koʼeni, kua au vave mate.+ Ke ke fakapapau mai+ ʼe ke ʼavaifo anai au ʼi toku fale maka,+ ʼae neʼe au teuteuʼi ʼi he ʼana ʼi te fenua ʼo Kanaane.”+ Koia, fakalelei siʼou loto, tuku ke au alu ʼo ʼavaifo taku tamai pea hoki au toe liliu mai anai.’ ” 6 Neʼe tali age e Falaone: “Ke ke fakahoko tau fakapapau, alu ʼo ʼavaifo tau tamai.”+

7 Neʼe alu ai leva ia Sosefo ʼo ʼavaifo tana tamai. Pea neʼe alu mo ia te hahaʼi faifekau fuli ʼa Falaone, ia te kau takitaki+ ʼo tona fale hau pea mo te kau takitaki fuli ʼo te fenua ʼo Esipito. 8 Neʼe toe olo mo ia tona loto fale katoa, mo ʼona tehina pea mo te loto fale ʼo tana tamai.+ Neʼe ko ʼanatou fanau liliki pe, mo tanatou faga ovi mo tanatou faga pipi ʼae neʼe natou tuku ʼi te fenua ʼo Koseni. 9 Neʼe toe alu mo ia he ʼu tagata taki saliote+ mo he ʼu tagata heka hosi. Neʼe kaugamalie ʼosi tonatou fagona. 10 Neʼe natou tau leva ki te hahaʼaga ʼo Ateate, ʼi te potu fenua ʼo te Solotane, pea neʼe natou fai ai he toe putu lahi mo natou lauga. Pea neʼe putu ia Sosefo ki tana tamai lolotoga ʼaho ʼe fitu. 11 Neʼe sisio te kau Kanaane, te hahaʼi ʼo te fenua ki te putu ʼae neʼe fai ʼi te hahaʼaga ʼo Ateate, pea neʼe natou ui: “ ʼE ko he toe putu lahi ʼaeni ʼe fai e te kau Esipito!” Koia ʼae neʼe fakahigoaʼi ai te koga meʼa ʼaia ko Apele-misilaimi,* ʼae ʼe tuʼu ʼi te potu fenua ʼo te Solotane.

12 Neʼe mulimuli lelei pe ʼona foha ki te ʼu meʼa ʼae neʼe ina fakatotonu age.+ 13 Neʼe ʼave ia ia e ʼona foha ki te fenua ʼo Kanaane pea neʼe natou ʼavaifo ia ia ʼi te ʼana ʼae ʼe tuʼu ʼi te moʼi kele ʼo Makepela, ʼae ʼe haga ki Mamele. Neʼe totogi e Apalahamo te moʼi kele ʼaia kia Efelone, te tagata Heti ke tuʼu ai hona fale maka.+ 14 ʼI te ʼosi ʼavaifo e Sosefo tana tamai, neʼe toe liliu leva ki Esipito mo ʼona tehina pea mo natou fuli ʼae neʼe olo mo ia ʼo ʼavaifo tana tamai.

15 ʼI te kua mate leva ʼo tanatou tamai, neʼe feuiʼaki e te ʼu tehina ʼo Sosefo: “ ʼE lagi kei ita ia Sosefo kia tatou pea ʼe ina toe liufaki mai anai te ʼu meʼa kovi fuli ʼae neʼe tou fai kia ia.”+ 16 Koia, neʼe natou fekauʼi ai he tahi ke alu ʼo ui kia Sosefo: “Neʼe fai mai e tau tamai te fakatotonu ʼaeni ʼi muʼa ʼo tana mate: 17 ‘ ʼE tonu ke kotou ui kia Sosefo: “Fakalelei siʼou loto, ʼe au kole mamahi atu ke ke fakamolemole te hala ʼae neʼe fai e ʼou tehina mo te agahala ʼae neʼe natou fai ʼi tanatou gaohi koviʼi koe.” ’ Koia, fakalelei siʼou loto, ʼi te lakaga nei, ke ke fakamolemole mai kia matou ʼaeni ko te ʼu hahaʼi faifekau ʼo te ʼAtua ʼo tau tamai.” Pea neʼe tagi ia Sosefo ʼi tana logo ki te ʼu palalau ʼaia. 18 Neʼe ʼomai leva ʼona tehina ʼo tulolo ʼi ʼona muʼa pea neʼe natou ui ki ai: “Ko matou ko ʼau tagata kaugana!”+ 19 Neʼe ui e Sosefo kia natou: “ ʼAua naʼa kotou matataku. ʼE ko au koa te ʼAtua? 20 Logo la neʼe kotou fia fai he meʼa ʼe kovi kia au,+ kae neʼe fakaliliu e te ʼAtua te aluʼaga ʼaia ko he meʼa ʼe lelei, ke haofaki ai te hahaʼi tokolahi ohage ko tana fai ia ʼaho nei.+ 21 Koia, ʼaua naʼa kotou matataku. ʼE au haga foaki atu pe anai hakotou meʼa kai ʼo feia mo ʼakotou fanau liliki.”+ Neʼe ina fakafimalieʼi leva mo fakalotomalohiʼi ia natou.

22 Pea neʼe haga nofo ia Sosefo ʼi Esipito, ʼo feia mo te loto fale ʼo tana tamai. Neʼe maʼuli ia Sosefo ia taʼu ʼe 110. 23 Neʼe sio ia Sosefo ki te ʼu mokopuna ʼo Efalaimi,+ ʼo feia mo te ʼu foha ʼo Makile,+ te foha ʼo Manase. Neʼe kua natou hage pe ko he ʼu fanau totonu ʼa Sosefo.* 24 Neʼe ui leva e Sosefo ki ʼona tehina: “Kua au vave mate, kae ʼe tokoni moʼoni anai te ʼAtua kia koutou.+ Pea ʼe ina fakamavae moʼoni anai ia koutou mai te fenua ʼaeni ke kotou olo ki te fenua ʼae neʼe ina fakapapau ʼe ina foaki anai kia Apalahamo, mo Isaake pea mo Sakopo.”+ 25 Pea neʼe toe ui e Sosefo ki te ʼu foha ʼo Iselaele: “ ʼE tokoni moʼoni anai te ʼAtua kia koutou. Koia, kotou fakapapauʼi mai ʼe kotou toʼo anai ʼoku hui ʼi te fenua ʼaeni.”+ 26 Neʼe mate leva ia Sosefo ʼi tona taʼu 110. Neʼe teuteuʼi ai tona sino+ pea neʼe tuku leva ki he puha ʼi Esipito.