Senesi
7 Hili ʼaia, neʼe ui leva e Sehova kia Noe: “Ulu ki te aleka, ia koe pea mo tou loto fale katoa, he neʼe au tokagaʼi ko koe tokotahi pe ʼi te taʼiake ʼaeni ʼe faitotonu ʼi ʼoku muʼa.+ 2 Pea ke toʼo mo koe he ʼu manu ʼe fitu ʼi te ʼu faʼahiga manu maʼa* fuli,+ he manu tagata mo he manu fafine. Pea ke toe toʼo pe he ʼu manu ʼe lua ʼi te ʼu faʼahiga manu heʼe maʼa fuli, he manu tagata mo he manu fafine. 3 Pea ke toe toʼo foki mo he ʼu manulele* ʼe fitu, he manu tagata mo he manu fafine, ke hoko atu pe te maʼuli ʼo te ʼu manu ʼaia ʼi te kele katoa.+ 4 ʼE kei toe pe ʼaho ʼe fitu, pea ʼe au fakato anai te ʼua+ ki te kele ia ʼaho ʼe 40 mo po ʼe 40,+ pea ʼe au pulihi anai ʼi te fuga kele te ʼu meʼa maʼuli fuli pe ʼae neʼe au fakatupu.”+ 5 Pea neʼe fai e Noe te ʼu meʼa fuli ʼae neʼe fakatotonu age e Sehova.
6 Neʼe taʼu 600 ia Noe ʼi te temi ʼae neʼe to ai te tulivio ki te kele.+ 7 Koia neʼe ulu ai ia Noe mo ʼona foha, mo tona ʼohoana, pea mo te ʼu ʼohoana ʼo ʼona foha ki te aleka, ʼi muʼa ʼo te to ʼo te tulivio.+ 8 Neʼe toe ulu ki te aleka te ʼu faʼahiga manu maʼa, mo te ʼu faʼahiga manu heʼe maʼa, mo te ʼu faʼahiga manulele pea mo te ʼu manu fuli ʼae ʼe maʼuʼuli ʼi te kele.+ 9 Pea neʼe natou ulu taki toko lua ki te loto aleka kia Noe, te manu tagata mo te manu fafine, ohage pe ko tona fakatotonu age e te ʼAtua kia Noe. 10 Pea ʼosi pe ʼaho ʼe fitu pea to leva te tulivio ki te kele.
11 ʼI te taʼu 600 ʼo Noe, ʼi te 17 ʼaho ʼo te lua mahina, ʼi te ʼaho ʼaia neʼe ava te ʼu matapa ʼo te lagi pea neʼe to ifo ai te ʼu vai fuli ʼo te lagi.+ 12 Pea neʼe to te ʼua ki te kele lolotoga ʼaho ʼe 40 mo po ʼe 40. 13 ʼI te ʼaho pe ʼaia, neʼe ulu ia Noe ki te aleka, ʼo feia mo tona ʼohoana, mo Semi, mo Kami, mo Safeti,+ pea mo te ʼu ʼohoana ʼe tolu ʼo ʼona foha.+ 14 Neʼe natou feulufi mo te ʼu manu fuli ʼo te vao ʼo mulimuli pe ki ʼonatou faʼahiga, mo te ʼu manu lalata fuli ʼo mulimuli pe ki ʼonatou faʼahiga, mo te ʼu manu totolo fuli ʼo te kele ʼo mulimuli pe ki ʼonatou faʼahiga, mo te ʼu manulele fuli ʼo mulimuli pe ki ʼonatou faʼahiga, pea mo te ʼu manu fuli ʼae ʼe ʼi ai ʼonatou pakakau ʼo mulimuli pe ki ʼonatou faʼahiga. 15 Neʼe olo taki toko lua te ʼu faʼahiga meʼa maʼuli fuli* kia Noe ʼi te loto aleka. 16 Koia neʼe natou ulu ai, ia te ʼu faʼahiga manu kehekehe tagata mo fafine, ohage pe ko tona fakatotonu age e te ʼAtua. ʼOsi ʼaia pea neʼe pupunu leva e Sehova te matapa.
17 Neʼe hoko atu pe te to ʼo te tulivio ki te kele ia ʼaho ʼe 40. Neʼe hake leva te vai ʼae neʼe ina ʼaofi te kele pea neʼe kamata maʼanu ai te aleka. 18 Neʼe hoko atu pe te hake ʼo te vai pea neʼe lofia ai te kele, kae neʼe maʼanu pe te aleka ʼi te fuga vai. 19 Neʼe ʼaofi te ʼu moʼuga maʼoluga fuli ʼo te kele katoa ʼi te hake lahi ʼaia ʼo te vai.+ 20 Neʼe fakalaka leva te vai ʼi te ʼu fuga moʼuga ia fasiga nima* ʼe 15.
21 Pea neʼe mamate ai te ʼu meʼa maʼuli* fuli ʼae ʼi te kele:+ te ʼu manulele, mo te ʼu manu lalata, mo te ʼu manu ʼo te vao, mo te tahi age ʼu kiʼi manu,* pea mo te hahaʼi fuli.+ 22 Pea neʼe mamate leva te ʼu meʼa maʼuli fuli ʼae neʼe manava ʼi te kele moamoa.+ 23 Neʼe Ina pulihi te ʼu meʼa maʼuli fuli ʼi te fuga kele: te tagata, mo te ʼu manu, mo te ʼu manu totolo, pea mo te ʼu manulele. Neʼe pulihi fuli ia natou ʼi te kele.+ Kae neʼe hao pe ia Noe pea mo natou ʼae neʼe fakatahi mo ia ʼi te aleka.+ 24 Pea neʼe ʼaofi e te vai ia te kele katoa lolotoga ʼaho ʼe 150.+