Numelo

26 ʼI te kua gata ʼo te malaʼia,+ neʼe ui e Sehova kia Moisese pea mo Eleasale, te foha ʼo te pelepitelo ko Alone: 2 “Kolua lau te kau Iselaele fuli ʼae ʼe taʼu 20 ʼo fai ki ʼoluga, ʼo mulimuli ki ʼonatou famili. Kolua lau ia natou fuli ʼae ʼe feala ke kau ki te foʼi kautau ʼo Iselaele.”+ 3 Neʼe palalau ai ia Moisese mo Eleasale,+ te pelepitelo ki te hahaʼi ʼi te toafa ʼo Moape,+ ʼae ʼe ovi ki te Solotane, pea ʼe haga ki Seliko.+ Neʼe nā ui leva kia natou: 4 “Kotou tohi ia natou ʼae ʼe taʼu 20 ʼo fai ki ʼoluga, ohage pe ko tona fakatotonu e Sehova kia Moisese.”+

Koʼeni te ʼu foha ʼo Iselaele ʼae neʼe mavae mai te fenua ʼo Esipito: 5 Ko Lupeni,+ te ʼuluaki foha ʼo Iselaele. Ko te ʼu foha ʼo Lupeni+ neʼe ko Anoke, ʼae ʼe hifo mai ai te kau Anoke, mo Palu, ʼae ʼe hifo mai ai te kau Palu, 6 mo Eselone, ʼae ʼe hifo mai ai te kau Eselone, pea mo Kalemi, ʼae ʼe hifo mai ai te kau Kalemi. 7 Neʼe ko te ʼu famili ʼaia ʼo te kau Lupeni, pea ko natou ʼae neʼe tohi neʼe ko te toko 43 730.+

8 Ko te foha ʼo Palu neʼe ko Eliape. 9 Pea ko te ʼu foha ʼo Eliape neʼe ko Nemuele, mo Tatane pea mo Apilame. Ko te Tatane ʼaia mo te Apilame ʼaia neʼe ko he ʼu fakafofoga ʼo te hahaʼi pea neʼe nā fakafeagai kia Moisese+ mo Alone, ʼo feia mo te kutuga ʼa Kole,+ ʼi te temi ʼae neʼe natou fakafeagai ai kia Sehova.+

10 Pea neʼe ava te kele ʼo folo ai ia natou. Kae neʼe mamate ia Kole mo te hahaʼi ʼae neʼe lagolago kia ia, ʼi te temi ʼae neʼe tutu ai te ʼu tagata ʼe toko 250.+ Pea neʼe liliu ai te meʼa ʼaia neʼe hoko kia natou ko he fakatokaga.+ 11 Kae neʼe mole mamate te ʼu foha ʼo Kole.+

12 Koʼeni te ʼu foha ʼo Simeone+ ʼo mulimuli ki ʼonatou famili: ko Nemuele, ʼae ʼe hifo mai ai te kau Nemuele, mo Samine, ʼae ʼe hifo mai ai te kau Samine, mo Sakine, ʼae ʼe hifo mai ai te kau Sakine, 13 mo Sela, ʼae ʼe hifo mai ai te kau Sela, pea mo Saule, ʼae ʼe hifo mai ai te kau Saule. 14 Neʼe ko te ʼu famili ʼaia ʼo te kau Simeone, pea neʼe natou toko 22 200.+

15 Koʼeni te ʼu foha ʼo Kate+ ʼo mulimuli ki ʼonatou famili: ko Sefoni, ʼae ʼe hifo mai ai te kau Sefoni, mo Aki, ʼae ʼe hifo mai ai te kau Aki, mo Suni, ʼae ʼe hifo mai ai te kau Suni, 16 mo Osini, ʼae ʼe hifo mai ai te kau Osini, mo Eti, ʼae ʼe hifo mai ai te kau Eti, 17 mo Alote, ʼae ʼe hifo mai ai te kau Alote, pea mo Aleli, ʼae ʼe hifo mai ai te kau Aleli. 18 Neʼe ko te ʼu famili ʼaia ʼo te ʼu foha ʼo Kate, pea ko natou ʼae neʼe tohi neʼe ko te toko 40 500.+

19 Ko te ʼu foha ʼo Suta+ neʼe ko Ele mo Onane.+ Kae neʼe mamate ia Ele mo Onane ʼi te fenua ʼo Kanaane.+ 20 Koʼeni te tahi ʼu foha ʼo Suta ʼo mulimuli ki ʼonatou famili: ko Sila,+ ʼae ʼe hifo mai ai te kau Sila, mo Pelesi,+ ʼae ʼe hifo mai ai te kau Pelesi, pea mo Sela,+ ʼae ʼe hifo mai ai te kau Sela. 21 Pea koʼeni te ʼu foha ʼo Pelesi: ko Eselone,+ ʼae ʼe hifo mai ai te kau Eselone, pea mo Amule,+ ʼae ʼe hifo mai ai te kau Amule. 22 Neʼe ko te ʼu famili ʼaia ʼo Suta, pea ko natou ʼae neʼe tohi neʼe ko te toko 76 500.+

23 Koʼeni te ʼu foha ʼo Isakale+ ʼo mulimuli ki ʼonatou famili: ko Tola,+ ʼae ʼe hifo mai ai te kau Tola, mo Puva, ʼae ʼe hifo mai ai te kau Puni, 24 mo Sasupe, ʼae ʼe hifo mai ai te kau Sasupe, pea mo Similone, ʼae ʼe hifo mai ai te kau Similone. 25 Neʼe ko te ʼu famili ʼaia ʼo Isakale, pea ko natou ʼae neʼe tohi neʼe ko te toko 64 300.+

26 Koʼeni te ʼu foha ʼo Sepulone+ ʼo mulimuli ki ʼonatou famili: ko Seleta, ʼae ʼe hifo mai ai te kau Seleta, mo Eloni, ʼae ʼe hifo mai ai te kau Eloni, pea mo Saleli, ʼae ʼe hifo mai ai te kau Saleli. 27 Neʼe ko te ʼu famili ʼaia ʼo te kau Sepulone, pea ko natou ʼae neʼe tohi neʼe ko te toko 60 500.+

28 Ko te ʼu foha ʼo Sosefo,+ ʼo mulimuli ki ʼonā famili, neʼe ko Manase pea mo Efalaimi.+ 29 Koʼeni te ʼu foha ʼo Manase:+ ko Makile,+ ʼae ʼe hifo mai ai te kau Makile. Pea ko Makile ko te tamai ʼa Kileate.+ ʼE haʼu mai ia Kileate te kau Kileate. 30 Koʼeni te ʼu foha ʼo Kileate: ko Sesele, ʼae ʼe hifo mai ai te kau Sesele, mo Eleki, ʼae ʼe hifo mai ai te kau Eleki, 31 mo Aseliele, ʼae ʼe hifo mai ai te kau Aseliele, mo Sekemi, ʼae ʼe hifo mai ai te kau Sekemi, 32 mo Semita, ʼae ʼe hifo mai ai te kau Semita, pea mo Hefele, ʼae ʼe hifo mai ai te kau Hefele. 33 Kae ko Selofati, te foha ʼo Hefele, neʼe mole maʼu hona ʼu foha, kae neʼe ko ʼona pe ia ʼofafine.+ Pea neʼe higoa te ʼu ʼofafine ʼo Selofati+ ko Masela, mo Noa, mo Okala, mo Milika pea mo Tilitesa. 34 Neʼe ko te ʼu famili ʼaia ʼo Manase, pea ko natou ʼae neʼe tohi neʼe ko te toko 52 700.+

35 Koʼeni te ʼu foha ʼo Efalaimi+ ʼo mulimuli ki ʼonatou famili: ko Sutela,+ ʼae ʼe hifo mai ai te kau Sutela, mo Pekeli, ʼae ʼe hifo mai ai te kau Pekeli, pea mo Taani, ʼae ʼe hifo mai ai te kau Taani. 36 Pea koʼeni te foha ʼo Sutela: ko Elani, ʼae ʼe hifo mai ai te kau Elani. 37 Neʼe ko te ʼu famili ʼaia ʼo te ʼu foha ʼo Efalaimi, pea ko natou ʼae neʼe tohi neʼe ko te toko 32 500.+ Ko te hakoga ʼaia ʼo Sosefo, ʼo mulimuli ki ʼonatou famili.

38 Koʼeni te ʼu foha ʼo Pesamino,+ ʼo mulimuli ki ʼonatou famili: ko Pela,+ ʼae ʼe hifo mai ai te kau Pela, mo Asipeli, ʼae ʼe hifo mai ai te kau Asipeli, mo Asilami, ʼae ʼe hifo mai ai te kau Asilami, 39 mo Sefufame, ʼae ʼe hifo mai ai te kau Sufame, pea mo Haufame, ʼae ʼe hifo mai ai te kau Haufame. 40 Ko te ʼu foha ʼo Pela neʼe ko Alete mo Naamane.+ Neʼe hifo mai ia Alete te kau Alete, pea neʼe hifo mai ia Naamane te kau Naamane. 41 Ko te ʼu foha ʼaia ʼo Pesamino ʼo mulimuli ki ʼonatou famili, pea ko natou ʼae neʼe tohi neʼe ko te toko 45 600.+

42 Ko te foha ʼaeni ʼo Tane,+ ʼo mulimuli ki tona famili: ko Suami, ʼae ʼe hifo mai ai te kau Suami. Ko te famili ʼaia ʼo Tane. 43 Neʼe toko 64 400 ia natou ʼae neʼe tohi ʼi te ʼu famili fuli ʼo te kau Suami.+

44 Koʼeni te ʼu foha ʼo Asele,+ ʼo mulimuli ki ʼonatou famili: ko Imina, ʼae ʼe hifo mai ai te kau Imina, mo Sisevi, ʼae ʼe hifo mai ai te kau Sisevi, pea mo Pelia, ʼae ʼe hifo mai ai te kau Pelia. 45 Ko te ʼu foha ʼo Pelia ko Hepele, ʼae ʼe hifo mai ai te kau Hepele pea mo Malikiele, ʼae ʼe hifo mai ai te kau Malikiele. 46 Neʼe higoa te ʼofafine ʼo Asele ko Selate. 47 Neʼe ko te ʼu famili ʼaia ʼo te ʼu foha ʼo Asele, pea ko natou ʼae neʼe tohi neʼe ko te toko 53 400.+

48 Koʼeni te ʼu foha ʼo Nefetali+ ʼo mulimuli ki ʼonatou famili: ko Sateseele, ʼae ʼe hifo mai ai te kau Sateseele, mo Kuni, ʼae ʼe hifo mai ai te kau Kuni, 49 mo Setesele, ʼae ʼe hifo mai ai te kau Setesele, pea mo Silemi, ʼae ʼe hifo mai ai te kau Silemi. 50 Neʼe ko te ʼu famili ʼaia ʼo Nefetali, ʼo mulimuli ki ʼonatou famili, pea ko natou ʼae neʼe tohi neʼe ko te toko 45 400.+

51 Ko te kau Iselaele fuli ʼae neʼe tohi neʼe ko te toko 601 730.+

52 Hili ʼaia, neʼe ui e Sehova kia Moisese: 53 “ ʼE vaevae anai te fenua ohage ko he tofiʼa kia natou fuli ʼaia, ʼo mulimuli ki te ʼu higoa ʼae neʼe tohi.*+ 54 ʼE ke foaki anai ki te ʼu kutuga ʼae ʼe kaugamalie he tofiʼa ʼe lahi, kae kia natou ʼae ʼe tokosiʼi, he tofiʼa ʼe veliveli.+ ʼE mulimuli pe anai te tofiʼa ʼo he kutuga ki te kaugamalie ʼo natou ʼae neʼe tohi. 55 Kae ʼe fai anai ni toho ke vaevae ai te fenua.+ Pea ʼe natou maʼu anai tonatou tofiʼa ʼo mulimuli ki te ʼu higoa ʼo ʼonatou telepi. 56 ʼE foaki anai kia natou takitahi tona tofiʼa ʼo mulimuli ki te ʼu toho ʼae ka fai, pea mo te kaugamalie ʼo te kutuga.”

57 Koʼeni ia natou ʼae neʼe tohi ʼi te kau Levite+ ʼo mulimuli ki ʼonatou famili: ko Kelesoni, ʼae ʼe hifo mai ai te kau Kelesoni, mo Keate,+ ʼae ʼe hifo mai ai te kau Keate, pea mo Melali, ʼae ʼe hifo mai ai te kau Melali. 58 Pea koʼeni te ʼu famili ʼo te kau Levite: ko te kau Lipeni,+ mo te kau Hepelone,+ mo te kau Makeli,+ mo te kau Musi,+ pea mo te kau Kole.+

Ko Keate ko te tamai ʼa Amilame.+ 59 Pea ko te higoa ʼo te ʼohoana ʼo Amilame neʼe ko Sokepete,+ te ʼofafine ʼo Levi, pea neʼe tupu ʼi Esipito. Pea neʼe maʼu leva e Sokepete mo Amilame ia Alone, mo Moisese pea mo tonā tokolua ko Miliamu.+ 60 Pea ko te ʼu foha ʼo Alone neʼe ko Natape, mo Apiu, mo Eleasale pea mo Itamale.+ 61 Kae neʼe mamate leva ia Natape mo Apiu he neʼe nā tutu he afi ia muʼa ʼo Sehova kae neʼe mole gafua ke nā tutu.+

62 Ko natou fuli ʼae neʼe tohi neʼe ko te toko 23 000, ia te tamaliki tagata fuli ʼae neʼe mahina katoa ʼo fai ki ʼoluga.+ Neʼe mole tohi fakatahi natou mo te kau Iselaele,+ koteʼuhi neʼe mole tonu ke foaki age kia natou he tofiʼa ʼi te lotolotoiga ʼo te kau Iselaele.+

63 Ko natou ʼaia neʼe tohi e Moisese mo Eleasale, te pelepitelo ʼi te temi ʼae neʼe nā tohi ai te kau Iselaele ʼi te toafa ʼo Moape, ʼae ʼe ovi ki te Solotane, pea ʼe haga ki Seliko. 64 Kae neʼe mole kau he tahi ia natou ʼaia ʼi te kau Iselaele ʼae neʼe tohi e Moisese pea mo Alone te pelepitelo ʼi te toafa ʼo Sinai,+ 65 koteʼuhi neʼe ui age e Sehova ʼo ʼuhiga mo natou: “ ʼE natou mamate moʼoni anai ʼi te toafa.”+ Koia, neʼe mole kei toe ai he tahi ia natou, gata pe kia Kalepo, te foha ʼo Sefune, pea mo Sosue, te foha ʼo Nune.+