Numelo
28 Pea neʼe ui leva e Sehova kia Moisese: 2 “Ke ke fakatotonu ki te kau Iselaele: ‘ ʼE tonu anai ke kotou tokakaga ʼo momoli mai taku molaga, ia taku pane. ʼE tonu anai ke momoli ʼaku molaga ʼae ʼe tutu pea ʼe ko he ʼaele lelei kia te au, ʼi te temi ʼae kua fakatuʼutuʼu ki ai.’+
3 “Pea ke ke ui kia natou: ‘Koʼeni te molaga ʼae ʼe kotou momoli anai kia Sehova pea ʼe tutu anai: ʼi te ʼaho fuli, ko akeno tagata ʼe lua ʼe taki taʼu tahi mo heʼe mele, pea ʼe momoli tuʼumaʼu pe anai ohage ko he holokoseta.+ 4 ʼE momoli anai te tahi akeno tagata ʼi te uhu, pea ko te tahi age akeno ʼi te ʼosi to ʼo te laʼa.*+ 5 ʼE momoli fakatahi anai mo te ʼu akeno ʼaia he molaga meʼa kai, ʼae ʼe ko he vahe tahi ki te hogofulu ʼo he efa* falena lelei neʼe natu ʼaki he vahe tahi ki te fa ʼo he hine* lolo.+ 6 ʼE ko he holokoseta ʼe momoli tuʼumaʼu anai,+ pea neʼe fakatotonu ʼi te Moʼuga ʼo Sinai. ʼE ko he molaga ʼe tutu maʼa Sehova pea ʼe ko he ʼaele lelei kia te ia. 7 Pea ʼe toe momoli fakatahi anai mo te ʼu akeno tagata takitahi he molaga vino, ʼe ko te vahe tahi ki te fa ʼo he hine.+ ʼE liligi anai te meʼa inu ʼaia ʼi te koga meʼa taputapu ohage ko he molaga kia Sehova. 8 ʼE momoli anai te tahi age akeno tagata ʼi te ʼosi to ʼo te laʼa,* mo he molaga meʼa kai pea mo he molaga vino ʼe tatau mo ʼae ʼo te uhu. ʼE ko he holokoseta ʼe tutu anai maʼa Sehova pea ʼe ko he ʼaele lelei kia te ia.+
9 “ ‘Kae ʼe momoli anai ʼi te ʼaho ʼo te Sapato+ he ʼu akeno tagata ʼe lua ʼe taki taʼu tahi mo heʼe mele, mo he molaga meʼa kai ʼae ʼe ko vahe lua ki te hogofulu ʼo he fua efa falena lelei neʼe natu mo te lolo, ʼo feia mo he molaga vino. 10 ʼE ko te holokoseta ʼaia ʼe momoli anai ʼi te Sapato, ʼo feia mo te holokoseta ʼae ʼe momoli tuʼumaʼu pea mo te molaga vino ʼo te holokoseta ʼaia.+
11 “ ‘ ʼI te kamata ʼo te mahina fuli,* ʼe kotou momoli anai kia Sehova ohage ko he holokoseta he ʼu vitulo kei mui ʼe lua, mo he ovi tagata ʼe tahi, pea mo he ʼu akeno tagata ʼe fitu, ʼe taki taʼu tahi pea mo heʼe mele.+ 12 ʼE kotou momoli fakatahi anai mo te ʼu vitulo takitahi ia he molaga meʼa kai, ʼae ʼe ko vahe tolu ki te hogofulu ʼo he fua falena lelei neʼe natu mo te lolo.+ Pea ʼe kotou momoli fakatahi anai mo te ovi tagata ia he molaga meʼa kai, ʼae ʼe ko vahe lua ki te hogofulu ʼo he fua falena lelei neʼe natu mo te lolo.+ 13 Pea ʼe kotou momoli fakatahi anai mo te ʼu akeno tagata takitahi ia he molaga meʼa kai, ʼae ʼe ko he vahe tahi ki te hogofulu ʼo he fua falena lelei neʼe natu mo te lolo. ʼE ko he holokoseta, ʼei ko he molaga ʼe tutu maʼa Sehova pea ʼe ko he ʼaele lelei kia te ia.+ 14 Pea ʼe toe momoli fakatahi anai he vitulo ʼe tahi mo he molaga vino, ʼae ʼe ko he vaeluaʼi hine vino.+ Kapau ʼe ko he ovi tagata, pea ʼe momoli fakatahi anai mo he vahe tahi ki te tolu ʼo he hine vino,+ pea kapau ʼe ko he akeno tagata, pea ʼe momoli fakatahi anai mo he vahe tahi ki te fa ʼo he hine vino.+ ʼE ko te holokoseta ʼaia ʼe momoli anai ʼi te mahina fuli. 15 Pea ʼe toe momoli anai kia Sehova he tao kei mui ohage ko he molaga ʼo te agahala, ʼo feia mo te holokoseta ʼae ʼe momoli tuʼumaʼu pea mo te molaga vino ʼo te holokoseta ʼaia.
16 “ ‘ ʼI te ʼaho 14 ʼo te ʼuluaki mahina, ʼe fai ai anai te Pasikate maʼa Sehova.+ 17 Pea ʼi te ʼaho 15 ʼo te mahina ʼaia, ʼe fai anai he ʼaho lahi. ʼE kotou kai anai he ʼu pane hala fakatupu lolotoga ʼaho ʼe fitu.+ 18 ʼI te ʼuluaki ʼaho, ʼe fai anai he fakatahi taputapu. ʼE mole tonu anai ke kotou fai he faʼahiga gaue kinakina pe. 19 ʼE kotou momoli anai ohage ko he holokoseta ʼe tutu maʼa Sehova, he ʼu vitulo kei mui ʼe lua, mo he ovi tagata ʼe tahi, pea mo he ʼu akeno tagata ʼe fitu, ʼe taki taʼu tahi. ʼE kotou momoli anai he ʼu manu ʼe heʼe mele.+ 20 ʼE kotou momoli fakatahi anai mo te ʼu manu ʼaia he ʼu molaga meʼa kai, ʼae ko te falena lelei neʼe natu ʼaki te lolo:+ ko te vahe tolu ki te hogofulu moka ko he vitulo, pea ko te vahe lua ki te hogofulu moka ko te ovi tagata. 21 Ko he vahe tahi ki te hogofulu ʼae ʼe kotou momoli fakatahi anai mo te ʼu akeno tagata takitahi ʼe fitu. 22 ʼE kotou toe momoli anai mo he tao tagata ohage ko he molaga ʼo te agahala, ke fakamolemole ai ʼakotou agahala. 23 ʼE kotou momoli anai te ʼu meʼa ʼaia ʼo feia mo te holokoseta ʼae ʼe momoli ʼi te uhu, ʼae ʼe ko he koga ʼo te holokoseta ʼae ʼe momoli tuʼumaʼu. 24 ʼE tatau pe anai takotou momoli te ʼu meʼa ʼaia ʼi te ʼaho fuli lolotoga ʼaho ʼe fitu, pea ʼe momoli anai ohage ko he meʼa kai,* ko he molaga ʼe tutu maʼa Sehova pea ʼe ko he ʼaele lelei kia te ia. ʼE toe momoli anai mo te holokoseta ʼae ʼe momoli tuʼumaʼu pea mo te molaga vino. 25 Pea ʼi te fitu ʼaho, ʼe fai anai he fakatahi taputapu.+ ʼE mole tonu anai ke kotou fai he faʼahiga gaue kinakina pe.+
26 “ ‘ ʼI te ʼaho lahi ʼo te ʼu ʼuluaki fua ʼae kua matutuʼa,+ moka kotou momoli anai he molaga meʼa kai foʼou kia Sehova,+ ʼe tonu anai ke kotou fai he fakatahi taputapu ʼi te ʼaho lahi ʼo te ʼu vahaʼa.+ ʼE mole tonu anai ke kotou fai he faʼahiga gaue kinakina pe.+ 27 ʼE kotou momoli anai he ʼu vitulo kei mui ʼe lua, mo he ovi tagata ʼe tahi, pea mo he ʼu akeno tagata ʼe fitu, ʼe taki taʼu tahi ohage ko he holokoseta ʼe tutu maʼa Sehova pea ʼe ko he ʼaele lelei kia te ia,+ 28 ʼo feia mo he molaga meʼa kai, ʼae ʼe ko te falena lelei neʼe natu ʼaki te lolo: ko te vahe tolu ki te hogofulu moka ko he vitulo, pea ko te vahe lua ki te hogofulu moka ko te ovi tagata, 29 pea ʼe ko he vahe tahi ki te hogofulu ʼae ʼe kotou momoli fakatahi anai mo te ʼu akeno tagata takitahi ʼe fitu. 30 ʼE kotou toe momoli anai mo he tao kei mui, ke fakamolemole ai ʼakotou agahala.+ 31 ʼE kotou momoli anai te ʼu meʼa ʼaia ʼo feia mo te holokoseta ʼae ʼe momoli tuʼumaʼu pea mo te molaga meʼa kai ʼo te holokoseta ʼaia. ʼE kotou momoli anai he ʼu manu ʼe heʼe mele+ fakatahi mo te ʼu molaga vino.