Numelo

31 Pea neʼe ui e Sehova kia Moisese: 2 “Ke ke tauteaʼi+ te kau Matiane+ ʼuhi ko te meʼa ʼae neʼe natou fai ki te kau Iselaele. Hili ʼaia, ʼe tuku fakatahi anai ia koe mo ʼau kui.”*+

3 Neʼe palalau ai ia Moisese ki te hahaʼi, ʼo ina ui: “Kotou foaki he ʼu mahafu ki he ʼu tagata ia koutou, ke natou tauʼi ia Matiane pea mo fakahoko te lagavaka ʼa Sehova ki Matiane. 4 ʼE kotou filifili anai he ʼu tagata ʼe toko 1 000 mai te ʼu telepi takitahi fuli ʼo Iselaele, ke olo ki te tau.” 5 Koia, neʼe filifili ai ʼi te ʼu telepi takitahi ia he toko 1 000 mai te toko lauʼi afe ʼo Iselaele,+ ʼo fakatahiʼi ai ko tagata ʼe toko 12 000 neʼe kua tokalelei ki te tau.

6 Pea neʼe fekauʼi leva e Moisese te toko 1 000 ʼaia mai te ʼu telepi takitahi ke natou olo ki te tau, pea neʼe alu ia Fineasi,+ te foha ʼo te pelepitelo ko Eleasale mo natou. Neʼe tokaga ki te ʼu meʼa taputapu pea mo te ʼu fakatagi pupuhi ʼo te tau.+ 7 Neʼe natou tauʼi ia Matiane, ohage pe ko tona fakatotonu e Sehova kia Moisese, pea neʼe natou matematehi te ʼu tagata fuli. 8 Neʼe natou toe matehi foki mo te ʼu hau ʼe toko nima ʼo Matiane, ʼae ko Evi, mo Lekeme, mo Tesule, mo Ulu pea mo Lepa. Pea neʼe natou toe matehi ʼaki te heleta ia Palaame,+ te foha ʼo Peoli. 9 Kae neʼe ʼave popula e te kau Iselaele ia te hahaʼi fafine mo te ʼu fanau ʼo Matiane. Neʼe natou toe ʼave foki mo ʼanatou pipi fuli, mo ʼanatou ovi fuli, pea mo ʼonatou koloa fuli. 10 Pea neʼe natou tutu ʼonatou kolo fuli ʼae neʼe natou nonofo ai, ʼo feia mo ʼonatou nofoʼaga fale la fuli.* 11 Neʼe natou ʼave ʼonatou koloa fuli, mo ʼanatou manu fuli pea mo ʼave popula te hahaʼi. 12 Pea neʼe natou ʼaumai te ʼu hahaʼi ʼaia, mo te ʼu manu pea mo te ʼu koloa kia Moisese, mo Eleasale te pelepitelo, pea mo te kau Iselaele, ia tafa ʼo te nofoʼaga, ʼi te toafa ʼo Moape,+ ʼae ʼe ovi ki te Solotane, pea ʼe haga ki Seliko.

13 Neʼe olo leva ia Moisese, mo Eleasale te pelepitelo pea mo te kau pule fuli ʼo te hahaʼi ʼo fakafelaveʼi kia natou ʼi tuʼa atu ʼo te nofoʼaga. 14 Kae neʼe ita ia Moisese ki te ʼu tagata ʼae neʼe fakanofo ke pule ki te ʼu tagata tau, ia te ʼu pule ʼo te toko afe pea mo te ʼu pule ʼo te toko teau, ʼae neʼe toe liliu mai mai te tau. 15 Neʼe ui e Moisese kia natou: “He koʼe neʼe kotou tuku ke maʼuli ia te hahaʼi fafine fuli? 16 ʼE ko natou ʼaia neʼe natou uga te kau Iselaele ke natou heʼe agatonu+ kia Sehova ʼi te meʼa ʼae neʼe hoko ʼo ʼuhiga mo Peole,+ ʼuhi ko te ʼu palalau ʼa Palaame. Pea neʼe hoko ai te malaʼia ki te hahaʼi ʼa Sehova.+ 17 Koia, ʼi te lakaga nei, kotou matematehi te ʼu fanau tagata fuli, ʼo feia mo te hahaʼi fafine fuli ʼae kua momoe mo he tagata. 18 Kae ʼe feala hakotou tuku ke maʼuli ia te ʼu taʼahine fuli ʼae neʼe heʼeki momoe mo he tagata.+ 19 Pea ʼe kotou nonofo anai ʼi tuʼa atu ʼo te nofoʼaga lolotoga ʼaho ʼe fitu. Kapau ko he tahi ia koutou peʼe ia natou ʼae neʼe kotou ʼave popula, neʼe ina matehi he tahi* pe neʼe fāfā ki he tahi kua mate,+ ʼe tonu anai ke ina fakamaʼa ia ia+ ʼi te tolu ʼaho pea mo te fitu ʼaho. 20 Pea ʼe kotou toe fo anai mo te ʼu mutuʼi meʼa fuli, mo fakamaʼa te ʼu meʼa fuli ʼae neʼe fai ʼaki te kiliʼi manu, mo te fuluʼi tao pea mo te ʼakau.”

21 Neʼe ui leva e Eleasale te pelepitelo ki te ʼu tagata ʼo te foʼi kautau ʼae neʼe olo ki te tau: “Koʼeni te lao ʼae neʼe fakaha e Sehova kia Moisese: 22 ‘Ko te aulo, mo te siliva, mo te kapa, mo te ukamea, mo te etani* pea mo te pulu, 23 ia meʼa fuli ʼae ʼe feala ke fakalaka ʼi te afi, ʼe tonu anai ke fakalaka ʼi te afi, pea ʼe maʼa anai. Kae ʼe toe maʼua foki ke fakamaʼa ʼaki te vai ʼo te fakamaʼa.+ Ko te ʼu meʼa fuli ʼae ʼe mole feala ke fakalaka ʼi te afi, ʼe tonu anai ke fufulu. 24 Pea ʼe kotou fo anai ʼokotou mutuʼi meʼa ʼi te fitu ʼaho, pea ʼe kotou maʼa ai leva. Pea ʼe hoki feala ai leva ke kotou hu ki te nofoʼaga.’ ”+

25 Pea neʼe ui e Sehova kia Moisese: 26 “Ke ke lau te kaugamalie ʼo te hahaʼi popula ʼo feia mo te ʼu manu. Ke ke fai te faʼahi ʼaia mo Eleasale te pelepitelo pea mo te ʼu pule famili ʼo te hahaʼi. 27 Ke ke vaeluaʼi te ʼu koloa ʼaia, pea ke ke foaki he vahe kia natou ʼo te foʼi kautau ʼae neʼe olo ki te tau pea mo he vahe ki te toe ʼo te hahaʼi.+ 28 ʼE ke toʼo anai mai te kau tagata tau ʼae neʼe olo ki te tau, he foʼi tokotahi* mai te toko 500 pea mo he manu ʼe tahi mai te ʼu manu ʼe 500 ʼae ko te pipi, mo te asino pea mo te ovi, ʼo ke foaki ohage ko he tukuhau maʼa Sehova. 29 ʼE ke toʼo anai te tukuhau ʼaia mai tonatou vahe, pea ʼe ke foaki anai kia Eleasale te pelepitelo ohage ko he meʼa ʼofa maʼa Sehova.+ 30 ʼE ke toʼo anai mai te vahe ʼae ʼe foaki ki te kau Iselaele, he foʼi tokotahi mai te toko 50 pea mo he manu ʼe tahi mai te ʼu manu ʼe 50 ʼae ko te pipi, mo te asino, mo te ovi, pea mo te ʼu faʼahiga manu lalata kehekehe. Pea ʼe ke foaki anai ki te kau Levite,+ ʼae ʼe tokakaga ki te ʼu gaue ʼae ʼe fai ʼi te tapenakulo ʼa Sehova.”+

31 Koia, neʼe fai ai e Moisese mo Eleasale te pelepitelo ohage pe ko tona fakatotonu e Sehova kia Moisese. 32 Ko te lahi ʼo te koloa ʼae neʼe toe mai te ʼu koloa fuli ʼae neʼe toʼo e te hahaʼi ʼae neʼe olo ki te tau, neʼe ko ovi ʼe 675 000, 33 mo pipi ʼe 72 000, 34 pea mo asino ʼe 61 000. 35 Pea ko te hahaʼi fafine ʼae neʼe heʼeki momoe mo he tagata+ neʼe ko te toko 32 000. 36 Ko te vahe ʼae neʼe foaki kia natou ʼae neʼe olo ki te tau, neʼe ko ovi ʼe 337 500. 37 Neʼe ko ovi ʼe 675 ʼae neʼe toʼo mai te ʼu ovi ʼaia pea neʼe foaki ohage ko he tukuhau maʼa Sehova. 38 Pea neʼe ko pipi ʼe 36 000, pea neʼe toʼo mai ai te ʼu pipi ʼe 72 ke foaki ohage ko he tukuhau maʼa Sehova. 39 Pea neʼe ko asino ʼe 30 500, pea neʼe toʼo mai ai te ʼu asino ʼe 61 ohage ko he tukuhau maʼa Sehova. 40 Pea neʼe ko hahaʼi* ʼe toko 16 000, pea neʼe toʼo mai ia natou ʼaia te toko 32 ke foaki ohage ko he tukuhau maʼa Sehova. 41 Pea neʼe foaki leva e Moisese te tukuhau ʼaia kia Eleasale te pelepitelo ohage ko he meʼa ʼofa maʼa Sehova,+ ohage pe ko tona fakatotonu age e Sehova ki ai.

42 Pea ko te vahe ʼo te kau Iselaele, ʼae neʼe tuku keheʼi e Moisese mai te vahe ʼae neʼe foaki ki te ʼu tagata ʼae neʼe olo ki te tau, 43 neʼe ko ovi ʼe 337 500, 44 mo pipi ʼe 36 000, 45 pea mo asino ʼe 30 500, 46 pea mo hahaʼi* ʼe toko 16 000. 47 Neʼe toʼo leva e Moisese mai te vahe ʼo te kau Iselaele, he foʼi tokotahi ʼi te hahaʼi ʼe toko 50 pea mo he manu ʼe tahi mai te ʼu manu ʼe 50. Pea neʼe ina foaki ki te kau Levite,+ ʼae neʼe tokakaga ki te ʼu gaue ʼae ʼe fai ʼi te tapenakulo ʼa Sehova,+ ohage pe ko tona fakatotonu age e Sehova kia Moisese.

48 Neʼe fakaovi leva kia Moisese te ʼu pule ʼo te foʼi kautau,+ ia te ʼu pule ʼo te toko afe mo te ʼu pule ʼo te toko teau. 49 Pea neʼe natou ui kia Moisese: “Ko matou ʼaeni, ko ʼau tagata faifekau, neʼe matou lau te kaugamalie ʼo te ʼu tagata tau ʼae ʼe matou takitaki, pea ʼe mole puli he tahi ia natou.+ 50 Koia, ke ke fakagafua mai ke matou tahi foaki te ʼu meʼa ʼaeni neʼe matou maʼu ohage ko he molaga kia Sehova: he ʼu meʼa aulo, mo he ʼu vesa, mo he ʼu vesa ʼi te ʼu vaʼe, mo he ʼu mama,* mo he ʼu hau, pea mo he tahi age ʼu meʼa fakateuteu, ke fakamolemole ai ʼamatou agahala ia muʼa ʼo Sehova.”

51 Neʼe tali ai e Moisese pea mo Eleasale te pelepitelo mai ia natou te aulo, ia te ʼu meʼa fakateuteu fuli. 52 Ko te aulo fuli ʼo te meʼa ʼofa ʼae neʼe natou momoli kia Sehova neʼe ko sikele* ʼe 16 750, ʼae neʼe foaki e te ʼu pule ʼo te toko afe pea mo te ʼu pule ʼo te toko teau. 53 Neʼe tahi toʼo e te tagata ʼo te foʼi kautau tana meʼa mai te ʼu koloa ʼae neʼe maʼu ʼi te tau. 54 Neʼe tali e Moisese mo Eleasale te pelepitelo te aulo ʼae neʼe foaki age e te ʼu pule ʼo te toko afe pea mo te ʼu pule ʼo te toko teau. Pea neʼe nā ʼave ʼo tuku ki te fale la ʼo te fono, ke manatuʼi ai e te hahaʼi ʼo Iselaele te ʼu meʼa ʼae neʼe fai e Sehova maʼa natou.