Numelo

32 Pea neʼe lahi ʼaupito te faga manu ʼa te ʼu foha ʼo Lupeni+ mo te ʼu foha ʼo Kate,+ pea neʼe natou sisio ko te ʼu fenua ʼo Saesele+ mo Kileate neʼe ko he potu fenua lelei maʼa tanatou faga manu. 2 Neʼe fakaovi ai te ʼu foha ʼo Kate mo te ʼu foha ʼo Lupeni kia Moisese, mo Eleasale te pelepitelo pea mo te ʼu pule ʼo te hahaʼi, ʼo natou ui age: 3 “Ko te potu fenua ʼae ʼe tuʼu ai te ʼu kolo ko Ataloti, mo Tiponi, mo Saesele, mo Nimila, mo Heseponi,+ mo Eleale, mo Sepami, mo Nepo+ pea mo Peoni,+ 4 ia te ʼu kolo ʼae neʼe tauʼi e Sehova pea mo malo ai ia muʼa ʼo te hahaʼi ʼo Iselaele,+ ʼe ko he potu fenua ʼe lelei maʼa te faga manu, he ʼe lahi ʼaupito tamatou faga manu.”+ 5 Pea natou hoko atu ʼo ui: “Kapau ʼe kotou ʼoʼofa ia matou, tuku mai kia matou ʼaeni ko ʼakotou hahaʼi faifekau ia te potu fenua ʼaia, ke liliu ko homatou kele. Pea ke ʼaua naʼa matou fakalaka ʼi te Solotane.”

6 Neʼe ui leva e Moisese ki te ʼu foha ʼo Kate mo te ʼu foha ʼo Lupeni: “ ʼE olo anai koa ʼokotou tehina ki te tau, kae nonofo pe koutou ʼi heni? 7 He koʼe ʼe kotou fakalotovaivaiʼi anai te hahaʼi ʼo Iselaele ke mole natou fia hu ki te fenua ʼae ʼe foaki moʼoni anai e Sehova kia natou? 8 Ko te meʼa ʼaia neʼe fai e ʼakotou tamai, ʼi te temi ʼae neʼe au fekauʼi ai natou mai Katesi-palenea ke olo ʼo vakaʼi ia te fenua.+ 9 ʼI tanatou hake ki te Vai Tafe* ʼo Esekoli+ pea mo sisio ki te fenua, neʼe natou fakalotovaivaiʼi ai te hahaʼi ʼo Iselaele ke mole natou fia hu ki te fenua ʼae ka foaki e Sehova kia natou.+ 10 Pea neʼe kovi ʼosi te ita ʼo Sehova ʼi te ʼaho ʼaia, ʼo ina fai ai te fakapapau ʼaeni:+ 11 ‘Ko te ʼu tagata ʼae neʼe mavae mai Esipito pea ʼe taʼu 20 ʼo fai ki ʼoluga, ʼe mole natou sisio anai ki te fenua+ ʼae neʼe au fakapapau ke au foaki kia Apalahamo, mo Isaake pea mo Sakopo,+ koteʼuhi neʼe mole natou mulimuli mai kia te au ʼaki tonatou loto katoa. 12 ʼE gata pe anai kia Kalepo,+ te foha ʼo Sefune, te tagata Kenase pea mo Sosue,+ te foha ʼo Nune, ʼae ka sisio anai ki te fenua, koteʼuhi neʼe nā mulimuli kia Sehova ʼaki tonā loto katoa.’+ 13 Neʼe to ai te hauhau ʼo Sehova ki Iselaele ʼo ina fakaheʼi ai ia natou ʼi te toafa lolotoga taʼu ʼe 40,+ ʼo kaku ki te puli ʼo te taʼiake ʼo natou fuli ʼae neʼe natou fai te meʼa ʼae ʼe kovi kia mata ʼo Sehova.+ 14 Pea koʼeni, ʼu tagata agahala, ʼe kotou toe fai pe te meʼa ʼae neʼe fai e ʼakotou tamai, ʼo ʼaʼasili lahi ai te hauhau ʼo Sehova ki Iselaele. 15 Kapau ʼe kotou maliu kehe mai ia te ia, pea ʼe ina toe liʼaki moʼoni anai ia Iselaele ʼi te toafa, pea ʼe mamate anai te hahaʼi fuli ʼaia ʼuhi ko koutou.”

16 Ki muli age, neʼe natou toe fakaovi age kia ia pea mo ui: “Fakagafua mai ke matou fakatuʼu ʼi heni he ʼu lotoʼa maka maʼa tamatou faga manu pea mo he ʼu kolo maʼa ʼamatou fanau. 17 Kae ʼe matou haga nonofo teuteu pe anai ki te tau+ pea mo olo ʼi muʼa ʼo te kau Iselaele, ʼo aʼu ki tamatou fakahu ia natou ki te koga meʼa ʼae kua tuku age maʼa natou, kae nonofo ʼamatou fanau ʼi te ʼu kolo tau, ke puipui ai natou mai te hahaʼi ʼo te fenua. 18 ʼE matou toe liliu pe anai ki ʼomatou ʼapi moka ʼosi maʼu e te kau Iselaele tonatou moʼi kele ʼa natou takitokotahi ohage ko honatou tofiʼa.+ 19 ʼE mole matou maʼu tofiʼa anai mo natou ʼi te tahi kauvai ʼo te Solotane, koteʼuhi kua foaki mai tomatou tofiʼa ʼi te potu esite ʼo te Solotane.”+

20 Neʼe tali leva e Moisese kia natou: “Kotou fai te meʼa ʼaeni: Kotou toʼo ʼakotou mahafu ʼo olo ki te tau, ohage ko tona fakatotonu e Sehova.+ 21 Kotou tahi toʼo ʼana mahafu ʼo fakalaka ʼi te Solotane ia muʼa ʼo Sehova, kae ʼe ina kapu anai ʼona fili ʼi ʼona muʼa+ 22 ʼo aʼu ki te fakalogo ʼa te fenua kia koutou ʼaki te tokoni ʼa Sehova.+ Kapau ʼe kotou fai te meʼa ʼaia, ʼe feala anai ke kotou toe liliu+ pea ʼe mole kotou lakahala anai ia muʼa ʼo Sehova pea mo Iselaele. Pea ʼe kotou maʼu anai te fenua ʼaeni ia muʼa ʼo Sehova.+ 23 Kae kapau ʼe mole kotou fai te meʼa ʼaia, ʼe kotou agahala anai kia Sehova. ʼEi, ʼe kotou utu pe anai te ʼu fua ʼo takotou agahala. 24 Koia, ʼe feala ke kotou laga he ʼu kolo ki ʼakotou fanau pea mo fakatuʼu he ʼu lotoʼa ʼo ʼakotou faga ovi,+ kae ʼe tonu ke kotou fakahoko takotou fakapapau.”

25 Neʼe ui age e te ʼu foha ʼo Kate pea mo te ʼu foha ʼo Lupeni kia Moisese: “Siʼomatou ʼaliki, ʼe fai anai e matou ʼaeni ko tau hahaʼi faifekau, ohage pe ko tau fakatotonu mai. 26 ʼE nonofo anai ʼamatou fanau, mo ʼomatou ʼohoana, mo ʼamatou faga pipi pea mo ʼamatou faga ovi fuli ʼi te ʼu kolo ʼo Kileate,+ 27 kae ʼe matou fakalaka anai ʼi te Solotane, pea ʼe matou tahi toʼo anai ʼana mahafu ʼo olo ki te tau ia muʼa ʼo Sehova,+ ohage pe ko te meʼa ʼe ke ui mai.”

28 Koia, neʼe fai ai e Moisese he fakatotonu kia Eleasale te pelepitelo, mo Sosue, te foha ʼo Nune pea mo te ʼu pule famili ʼo te ʼu telepi ʼo Iselaele ʼo ʼuhiga mo natou. 29 Neʼe ui e Moisese: “Kapau ʼe fakalaka te ʼu foha ʼo Kate mo te ʼu foha ʼo Lupeni mo koutou ʼi te Solotane, pea mo tahi toʼo ʼana mahafu ʼo alu ki te tau ia muʼa ʼo Sehova, pea kapau ʼe fakalogo te fenua kia koutou, ʼe kotou foaki age anai te fenua ʼo Kileate maʼa natou.+ 30 Kae kapau ʼe mole natou toʼo ʼanatou mahafu pea mo fakalaka mo koutou, ʼe natou nonofo anai mo koutou ʼi te fenua ʼo Kanaane.”

31 Neʼe tali e te ʼu foha ʼo Kate pea mo te ʼu foha ʼo Lupeni: “Ko te meʼa ʼae neʼe ui mai e Sehova kia matou, ʼe matou fai anai. 32 ʼE matou toʼo anai ʼamatou mahafu pea mo fakalaka anai ʼi te Solotane, ia muʼa ʼo Sehova ʼo olo ki Kanaane.+ Kae ko te kele ʼae ʼe matou maʼu anai ohage ko tomatou tofiʼa, ʼe tuʼu ia ʼi te faʼahi ʼaeni ʼo te Solotane.” 33 Koia, neʼe foaki ai e Moisese ki te ʼu foha ʼo Kate, mo te ʼu foha ʼo Lupeni+ pea mo te vaelua ʼo te telepi ʼo Manase,+ te foha ʼo Sosefo, ia te ʼu kolo ʼo te puleʼaga ʼo Sihone,+ te hau ʼo te kau Amole pea mo te ʼu kolo ʼo te puleʼaga ʼo Oke,+ te hau ʼo Pasani, ʼo feia mo te ʼu kele ʼae ʼi te ʼu tafaʼaki ʼo te ʼu puleʼaga ʼaia.

34 Pea neʼe laga* e te ʼu foha ʼo Kate ia Tiponi,+ mo Ataloti,+ mo Aloele,+ 35 mo Atoloti-sofani, mo Saesele,+ mo Sokepea,+ 36 mo Pete-nimila+ pea mo Pete-alane,+ ʼe ko he ʼu kolo tau, pea neʼe natou fakatuʼu mo he ʼu lotoʼa maka ʼo te faga manu. 37 Pea neʼe laga e te ʼu foha ʼo Lupeni ia Heseponi,+ mo Eleale,+ mo Kiliataimi,+ 38 mo Nepo,+ mo Paale-meoni+ (neʼe fetogi te ʼu higoa ʼaia) pea mo Sipima. Pea neʼe natou foaki he ʼu higoa foʼou ki te ʼu kolo ʼae neʼe natou toe laga.

39 Neʼe olo te ʼu foha ʼo Makile,+ te foha ʼo Manase ʼo tauʼi ia Kileate, pea neʼe natou maʼu. Neʼe natou kapu te kau Amole ʼae neʼe nonofo ai. 40 Neʼe foaki ai e Moisese ia Kileate kia Makile, te foha ʼo Manase pea neʼe nofo ai leva.+ 41 Neʼe alu leva ia Saile, te foha ʼo Manase ʼo tauʼi te kau Amole pea neʼe ina maʼu ʼonatou nofoʼaga fale la, ʼo ina fakahigoaʼi ko Havote-saile.*+ 42 Kae neʼe alu ia Nopaki ʼo tauʼi ia Kenati pea neʼe ina maʼu. Neʼe ina toe maʼu mo te ʼu kolo liliki ʼae ʼi ʼona tafaʼaki, pea neʼe ina fakahigoa ki tona higoa totonu ʼae ko Nopaki.