Numelo

34 Neʼe toe ui e Sehova kia Moisese: 2 “Ke ke tuku te ʼu fakatotonu ʼaeni ki te kau Iselaele: ‘Ka kotou hu anai ki te fenua ʼo Kanaane,+ koʼeni te fenua ʼae ka foaki atu anai ko tokotou tofiʼa, te fenua ʼo Kanaane mo ʼona tuʼakoi:+

3 “ ‘ ʼE kamata anai te tuʼakoi ʼi te potu saute mai te toafa ʼo Tesine, ʼae ia tafa ʼo Etome. Pea ko te tuʼakoi ʼi te potu saute esite, ʼe kamata anai mai te potu taupotu ʼo te Tai Kona.*+ 4 ʼE alu anai te tuʼakoi ʼaia ʼo fakalaka ʼi te potu saute ʼo te mahake ʼo Akilakimi,+ pea hoko atu ki Tesine. ʼE hifo anai ʼo aʼu ki te potu saute ʼo Katesi-palenea,+ pea toe hake ki Hatesale-atale+ ʼo hoko atu ki Asimoni. 5 ʼE alu anai te tuʼakoi mai Asimoni ki te Vai Tafe* ʼo Esipito, pea ʼe gata anai ʼi te Tai.*+

6 “ ‘ ʼI te potu uesite, ko te tuʼakoi ʼe ko te Tai Lahi* pea mo te matafenua. ʼE ko tokotou tuʼakoi ʼaia ʼi te potu uesite.+

7 “ ‘Koʼeni te tuʼakoi ʼi te potu noleto: ʼE kotou fakatuʼu anai te tuʼakoi ʼo kamata mai te Tai Lahi ʼo kaku ki te Moʼuga ʼo Hole. 8 Pea ʼe kotou fakatuʼu anai te tuʼakoi ʼo kamata mai te Moʼuga ʼo Hole ʼo kaku ki Lepo-hamate,*+ pea ʼe kaku anai ki Setate.+ 9 Pea ʼe alu anai te tuʼakoi ʼo kaku ki Sifiloni, pea ʼe gata anai leva ʼi Hatesale-enani.+ ʼE ko tokotou tuʼakoi ʼaia ʼi te potu noleto.

10 “ ‘ ʼI te potu esite, ʼe kotou fakatuʼu anai te tuʼakoi mai Hatesale-enani ʼo kaku ki Sefami. 11 Pea ʼe alu anai te tuʼakoi mai Sefami ʼo kaku ki Lipila, ʼae ʼi te potu esite ʼo Aine, pea hifo anai ʼo fakalaka ʼi te ʼu kiʼi moʼuga ʼae ʼe tuʼu ʼi te potu esite ʼo te Tai ʼo Kineleti.*+ 12 ʼE hoko atu anai te tuʼakoi ʼo kaku ki te Solotane, pea ʼe gata anai ʼi te Tai Kona.+ ʼE ko tokotou fenua ʼaia+ mo ʼona tuʼakoi.’ ”

13 Neʼe tuku ai e Moisese te ʼu fakatotonu ʼaeni ki te kau Iselaele: “Ko te fenua ʼaia ʼe kotou vaevae anai ʼaki te fai ʼo he ʼu toho,+ ia te fenua ʼae neʼe fakatotonu e Sehova ke foaki ki te ʼu telepi ʼe hiva vaelua. 14 Kua ʼosi maʼu ia e te telepi ʼo te kau Lupeni, mo te telepi ʼo te kau Kate pea mo te vaelua ʼo te telepi ʼo Manase tonatou tofiʼa.+ 15 Kua ʼosi foaki ki te ʼu telepi ʼe lua vaelua ʼaia tonatou tofiʼa ʼi te potu esite ʼo te potu fenua ʼo te Solotane, ʼae ʼe haga ki Seliko, ʼi te faʼahi ʼae ʼe hopo ake ai te laʼa.”+

16 Pea neʼe toe ui e Sehova kia Moisese: 17 “Koʼeni te ʼu higoa ʼo te ʼu tagata ʼae ka nā vaevae anai maʼa koutou ia te fenua: ko Eleasale+ te pelepitelo pea mo Sosue,+ te foha ʼo Nune. 18 Pea ʼe kotou hinoʼi anai he pule ʼi te ʼu telepi takitahi ke tokoni atu ki te vaevae ʼo te fenua.+ 19 Koʼeni te ʼu higoa ʼo te ʼu tagata ʼaia: ʼi te telepi ʼo Suta,+ ko Kalepo,+ te foha ʼo Sefune, 20 ʼi te telepi ʼo te ʼu foha ʼo Simeone,+ ko Simuele, te foha ʼo Amiute, 21 ʼi te telepi ʼo Pesamino,+ ko Elitate, te foha ʼo Kisilone, 22 ʼi te telepi ʼo te ʼu foha ʼo Tane,+ ko te pule ko Puki, te foha ʼo Sokeli, 23 ʼi te telepi ʼo te ʼu foha ʼo Manase,+ te foha ʼo Sosefo,+ ko te pule ko Aniele, te foha ʼo Efoti, 24 pea ʼi te telepi ʼo te ʼu foha ʼo Efalaimi,+ te foha ʼo Sosefo, ko te pule ko Kemuele, te foha ʼo Sifitane, 25 ʼi te telepi ʼo te ʼu foha ʼo Sepulone,+ ko te pule ko Elisafani, te foha ʼo Palenake, 26 ʼi te telepi ʼo te ʼu foha ʼo Isakale,+ ko te pule ko Paletiele, te foha ʼo Asane, 27 ʼi te telepi ʼo te ʼu foha ʼo Asele,+ ko te pule ko Aiuti, te foha ʼo Selomi, 28 pea ʼi te telepi ʼo te ʼu foha ʼo Nefetali,+ ko te pule ko Petaheli, te foha ʼo Amiute.” 29 Ko te ʼu tagata ʼaia neʼe fakatotonu age e Sehova ke natou vaevae te fenua ʼo Kanaane ki te kau Iselaele.+