Numelo

3 Pea koʼeni te ʼu hologa* ʼo Alone mo Moisese ʼi te temi ʼae neʼe palalau ai ia Sehova kia Moisese ʼi te Moʼuga ʼo Sinai.+ 2 Koʼeni te ʼu higoa ʼo te ʼu foha ʼo Alone: ko Natape, te ʼuluaki, mo Apiu,+ mo Eleasale+ pea mo Itamale.+ 3 Ko te ʼu higoa ʼaia ʼo te ʼu foha ʼo Alone, ia te ʼu pelepitelo ʼae neʼe tākai lolo ʼonatou ʼulu pea neʼe fakanofo* ke natou gaue fakapelepitelo.+ 4 Kae neʼe mamate ia Natape mo Apiu ia muʼa ʼo Sehova, ʼi tanā tutu he afi ia muʼa ʼo Sehova+ kae neʼe mole fakagafua age, ʼi te toafa ʼo Sinai. Pea neʼe mole maʼu honā ʼu foha. Kae neʼe hoko atu pe te gaue ʼa Eleasale+ mo Itamale+ ʼi tonā ʼuhiga pelepitelo, fakatahi mo tanā tamai ko Alone.

5 Neʼe ui leva e Sehova kia Moisese: 6 “Ke ke fakaovi mai te kau Levite+ pea ke natou tutuʼu ia muʼa ʼo Alone, pea ke natou tokoni+ ki ai. 7 ʼE natou fakahoko anai ʼonatou maʼua kia ia pea mo te hahaʼi fuli ʼi te fale la ʼo te fono, ʼo natou fakahoko tanatou gaue ʼo ʼuhiga mo te tapenakulo. 8 ʼE natou tokakaga anai ki te ʼu meʼa kehekehe fuli+ ʼo te fale la ʼo te fono, pea mo fakahoko ʼonatou maʼua ki te kau Iselaele, ʼo fai te ʼu gaue ʼo te tapenakulo.+ 9 ʼE ke foaki anai te kau Levite kia Alone pea mo ʼona foha. ʼEi, ko natou ʼaia neʼe toʼo mai te kau Iselaele pea kua foaki kia ia.+ 10 ʼE tonu anai ke ke fakanofo ia Alone mo ʼona foha ke natou fakahoko ʼanatou gaue fakapelepitelo.+ Pea kapau ʼe fakaovi mai he tahi kehe* ki te sagatualio, ʼe tonu anai ke matehi.”+

11 Neʼe hoko atu pe te palalau ʼa Sehova kia Moisese, ʼo ina ui: 12 “Koʼeni, ʼe au filifili te kau Levite mai te kau Iselaele moʼo fetogi ʼaki te ʼu ʼuluaki tupu fuli ʼo te kau Iselaele,+ pea ʼe ʼaʼaku anai te kau Levite. 13 Koteʼuhi ʼe ʼaʼaku te ʼu ʼuluaki tupu fuli.+ ʼI te ʼaho ʼae neʼe au matehi ai te ʼu ʼuluaki tupu fuli ʼi te fenua ʼo Esipito,+ neʼe au fakamaʼoniʼoniʼi maʼaku te ʼu ʼuluaki tupu fuli ʼo Iselaele, mai te tagata ki te manu.+ ʼEi, ʼe ʼaʼaku anai. Ko au ia Sehova.”

14 Neʼe toe ui e Sehova kia Moisese ʼi te toafa ʼo Sinai:+ 15 “Ke ke tohi te kau Levite, ʼo mulimuli ki ʼanatou kui pea mo ʼonatou famili. ʼE ke tohi anai ʼonatou foha fuli ʼae ʼe mahina katoa ʼo fai ki ʼoluga.”+ 16 Neʼe tohi ai natou e Moisese, ohage pe ko tona fakatotonu age e Sehova. 17 Koʼeni te ʼu higoa ʼo te ʼu foha ʼo Levi: ko Kelesoni, mo Keate pea mo Melali.+

18 Koʼeni te ʼu higoa ʼo te ʼu foha ʼo Kelesoni pea mo ʼonā famili: ko Lipeni pea mo Simei.+

19 Ko te ʼu foha ʼo Keate pea mo ʼonatou famili, neʼe ko Amilame, mo Siteseale, mo Hepelone pea mo Usiele.+

20 Ko te ʼu foha ʼo Melali pea mo ʼonā famili, neʼe ko Makeli+ pea mo Musi.+

Neʼe ko te ʼu famili ʼaia ʼo te kau Levite ʼo mulimuli ki ʼanatou kui.

21 Neʼe hifo mai te famili ʼo te kau Lipeni+ pea mo te famili ʼo te kau Simei mai ia Kelesoni. Neʼe ko te ʼu famili ʼaia ʼo te kau Kelesoni. 22 Ko te kaugamalie ʼo ʼonatou foha fuli ʼae neʼe mahina katoa ʼo fai ki ʼoluga pea neʼe tohi, neʼe ko te toko 7 500.+ 23 Neʼe fakatuʼu e te ʼu famili ʼo te kau Kelesoni tonatou nofoʼaga ʼi te tuʼa tapenakulo,+ ʼi te potu uesite. 24 Ko te pule ʼo te ʼu famili ʼo te kau Kelesoni neʼe ko Eliasafe, te foha ʼo Laele. 25 Neʼe tokakaga te kau Kelesoni+ ki te ʼu faʼahi ʼaeni ʼo te fale la ʼo te fono: te tapenakulo pea mo te fale la,+ mo tona foʼi kie lahi,+ mo te lito+ ʼo te huʼaga ʼo te fale la ʼo te fono, 26 mo te ʼu kie ʼae ʼe ʼa takai ʼaki te malaʼe,+ mo te lito+ ʼo te huʼaga ʼo te malaʼe ʼi te ʼu tafaʼaki ʼo te tapenakulo mo te ʼaletale, mo te ʼu maea ʼo te fale la, pea mo te ʼu gaue fuli ʼae neʼe fai ʼo ʼuhiga mo te ʼu meʼa ʼaia.

27 Neʼe hifo mai te famili ʼo te kau Amilame, mo te famili ʼo te kau Siteseale, mo te famili ʼo te kau Hepelone pea mo te famili ʼo te kau Usiele mai ia Keate. Neʼe ko te ʼu famili ʼaia ʼo te kau Keate.+ 28 Ko te kaugamalie ʼo ʼonatou foha fuli ʼae neʼe mahina katoa ʼo fai ki ʼoluga, neʼe ko te toko 8 600. Neʼe tonu ke natou tokakaga ki te koga meʼa taputapu.+ 29 Neʼe fakatuʼu e te ʼu famili ʼo te kau Keate tonatou nofoʼaga ʼi te faʼahi ʼo te tapenakulo ʼae ʼe haga ki te potu saute.+ 30 Ko te pule ʼo te ʼu famili ʼo te kau Keate neʼe ko Elisafani, te foha ʼo Usiele.+ 31 Neʼe tonu ke natou tokakaga ki te Aleka,+ mo te laupapa,+ mo te tuʼulaga malama,+ mo te ʼu ʼaletale,+ mo te ʼu meʼa kehekehe+ ʼae neʼe fakaʼaogaʼi ki te gaue ʼae ʼi te koga meʼa taputapu, mo te lito,+ pea mo te ʼu gaue fuli ʼae neʼe fai ʼo ʼuhiga mo te ʼu meʼa ʼaia.+

32 Ko te pule lahi ʼo te kau Levite neʼe ko Eleasale,+ te foha ʼo Alone ia te pelepitelo. Neʼe ina takitaki ia natou ʼae neʼe tokakaga ki te koga meʼa taputapu.

33 Neʼe hifo mai te famili ʼo te kau Makeli pea mo te famili ʼo te kau Musi mai ia Melali. Neʼe ko te ʼu famili ʼaia ʼo Melali.+ 34 Ko te kaugamalie ʼo ʼonatou foha fuli ʼae neʼe mahina katoa ʼo fai ki ʼoluga pea neʼe tohi, neʼe ko te toko 6 200.+ 35 Ko te pule ʼo te ʼu famili ʼo Melali neʼe ko Tuliele, te foha ʼo Apihaile. Neʼe natou fakatuʼu tonatou nofoʼaga ʼi te faʼahi ʼae ʼe haga ki te potu noleto ʼo te tapenakulo.+ 36 Neʼe tonu ke tokakaga te kau Melali ki te ʼu kaumatapa ʼe tapa fa+ ʼo te tapenakulo, mo ʼona ʼakau fakalavalava,+ mo ʼona pou,+ mo ʼona tuʼuʼaga, mo ʼona meʼa kehekehe fuli,+ pea mo te ʼu gaue fuli ʼae neʼe fai ʼo ʼuhiga mo te ʼu meʼa ʼaia,+ 37 ʼo feia mo te ʼu pou ʼae neʼe ʼa takai ʼaki te malaʼe pea mo ʼonatou tuʼuʼaga,+ mo ʼonatou faʼo pea mo ʼonatou maea.

38 Ko natou ʼae neʼe natou fakatuʼu tonatou nofoʼaga ʼi te muʼa tapenakulo, ʼi te faʼahi ʼae ʼe haga ki te potu esite, ʼae ʼe hopo ake ai te laʼa, ʼi te muʼa fale la neʼe ko Moisese, mo Alone pea mo ʼona foha. Neʼe tonu ke natou tokakaga ki te sagatualio. Neʼe ko tonatou maʼua ʼaia ki te kau Iselaele. Kapau neʼe fakaovi age he tahi kehe* ki te sagatualio, neʼe tonu ke matehi.+

39 Neʼe toko 22 000 te ʼu foha fuli ʼo te kau Levite ʼae neʼe mahina katoa ʼo fai ki ʼoluga pea neʼe tohi e Moisese mo Alone ʼo mulimuli ki ʼonatou famili, ohage pe ko tona fakatotonu age e Sehova.

40 Neʼe ui leva e Sehova kia Moisese: “Ke ke tohi te ʼu ʼuluaki tupu tagata fuli ʼo te kau Iselaele ʼae ʼe mahina katoa ʼo fai ki ʼoluga,+ mo ke lau tonatou kaugamalie pea mo ke tohi ʼonatou higoa. 41 ʼE ke filifili anai te kau Levite maʼaku, moʼo fetogi ʼaki te ʼu ʼuluaki tupu tagata fuli ʼo te kau Iselaele.+ Pea ʼe ke toʼo anai te ʼu manu lalata ʼa te kau Levite moʼo fetogi ʼaki te ʼu ʼuluaki ʼuhi tagata fuli ʼo te ʼu manu lalata ʼa te kau Iselaele.+ ʼE ko au ia Sehova.” 42 Neʼe tohi ai leva e Moisese te ʼu ʼuluaki tupu fuli ʼo te kau Iselaele, ohage pe ko tona fakatotonu age e Sehova. 43 Ko te kaugamalie ʼo te ʼu ʼuluaki tupu tagata fuli ʼae neʼe tohi ʼonatou higoa pea neʼe mahina katoa ʼo fai ki ʼoluga, neʼe ko te toko 22 273.

44 Neʼe hoko atu pe te palalau ʼa Sehova kia Moisese, ʼo ina ui: 45 “Ke ke filifili te kau Levite moʼo fetogi ʼaki te ʼu ʼuluaki tupu fuli ʼo te kau Iselaele, pea ke ke toʼo te ʼu manu lalata ʼa te kau Levite moʼo fetogi ʼaki ʼanatou manu lalata, pea ʼe ʼaʼaku anai te kau Levite. ʼE ko au ia Sehova. 46 Pea ko te totogi+ ʼo te toko 273 ʼuluaki tupu ʼo te kau Iselaele ʼae ʼe fakalaka ʼi te kau Levite,+ 47 ʼe ko sikele* anai ʼe nima maʼa te ʼu tagata takitahi ʼaia,+ ʼo mulimuli ki te sikele ʼo te koga meʼa taputapu.* Ko he foʼi sikele ʼe tahi ʼe ko kela* ʼe 20.+ 48 ʼE ke foaki anai te falā kia Alone pea mo ʼona foha ohage ko he totogi ʼo natou ʼae ʼe fakalaka ʼi te kaugamalie ʼo te kau Levite.” 49 Neʼe tanaki ai leva e Moisese te falā moʼo totogi ʼaki ia natou ʼae ʼe fakalaka ʼi te kaugamalie ʼo te kau Levite. 50 Ko te falā ʼae neʼe ina toʼo moʼo totogi ʼaki te ʼu ʼuluaki tupu ʼo te kau Iselaele, ko sikele ʼe 1 365, ʼo mulimuli ki te sikele ʼo te koga meʼa taputapu. 51 Pea neʼe foaki leva e Moisese te falā ʼae neʼe totogi ʼaki ia natou ʼaia kia Alone mo ʼona foha, ʼo mulimuli pe ki te folafola ʼa Sehova, pea ohage pe ko tona fakatotonu e Sehova kia Moisese.