Numelo

5 Neʼe toe ui e Sehova kia Moisese: 2 “Ke ke fakatotonu ki te kau Iselaele ke natou fakamavae mai te nofoʼaga he tahi pe ʼe kilia,+ mo he tahi pe ʼe maligi he meʼa mai ia ia,*+ pea mo he tahi pe kua heʼe maʼa he neʼe fāfā ki he tahi kua mate.+ 3 Tatau aipe pe ʼe ko he tagata peʼe ko he fafine, kae ʼe tonu anai ke fakamavae. ʼE tonu anai ke kotou fakamavae mai te nofoʼaga, ke mole ʼulihi+ ai te ʼu nofoʼaga ʼo taku hahaʼi, koteʼuhi ʼe au nofo ʼi te lotolotoiga ʼo natou.”+ 4 Neʼe mulimuli te kau Iselaele ki ai, ʼo natou fakamavae ʼi te nofoʼaga te tagata peʼe ko te fafine ʼae ʼe heʼe maʼa. Neʼe natou fai pe te meʼa ʼae neʼe fakatotonu e Sehova kia Moisese.

5 Neʼe hoko atu pe te palalau ʼa Sehova kia Moisese, ʼo ina ui age: 6 “Ke ke ui ki te kau Iselaele: ‘Kapau ʼe fai e he tagata peʼe ko he fafine he agahala, ʼo mole nofo agatonu ai kia Sehova, kua lakahala ia.+ 7 ʼE tonu anai ke ina vetevete+ tana agahala pea ke ina liufaki te totogi katoa moʼo fetogi ʼaki te agakovi ʼae neʼe ina fai, pea ʼe ina toe ʼavage anai mo te vahe tahi ki te nima ʼo te totogi ʼaia.+ ʼE ina foaki anai kia ia ʼae neʼe agahala ki ai. 8 Kae kapau kua mate ia ia ʼae neʼe agahala ki ai pea ʼe mole hona kaiga totonu ke foaki ki ai te totogi, ʼe tonu anai ke foaki kia Sehova pea ʼe maʼu pe anai e te pelepitelo, ʼo feia mo te ovi tagata ʼae ʼe ina momoli anai moʼo fakamolemole te agahala ʼa te tagata ʼaia.+

9 “ ‘Ko te ʼu meʼa ʼofa taputapu+ ʼae ka ʼaumai e te kau Iselaele ki te pelepitelo, ʼe ina maʼu anai.+ 10 ʼEi, ʼe ina maʼu anai te ʼu meʼa taputapu ʼae ʼe foaki anai e te tagata takitokotahi. Ko he meʼa pe ʼe foaki e he tahi ki te pelepitelo, ʼe maʼu pe anai e te pelepitelo.’ ”

11 Pea neʼe toe ui e Sehova kia Moisese: 12 “Ke ke ui ki te kau Iselaele: ‘Kapau ʼe agahala te ʼohoana ʼo he tagata ʼo mole nofo agatonu kia ia, 13 pea neʼe momoe mo he tahi age tagata+ kae neʼe mole iloʼi e tona ʼohoana, pea kapau neʼe fufu te faʼahi ʼaia, ʼo ʼulihi ai e te fafine ia ia totonu kae neʼe mole he tahi ke fakamoʼoni ki te meʼa ʼaia pea neʼe mole sio tonu he tahi ki ai, koʼeni te meʼa ʼae ʼe tonu ke fai: 14 Kapau ʼe maheka te tagata ʼohoana pea mo mahalohalo neʼe mole nofo agatonu tona ʼohoana, pe neʼe ʼulihi e te fafine ia ia totonu peʼe kailoa, 15 ʼe tonu anai ke ʼave e te tagata tona ʼohoana ki te pelepitelo mo he molaga ʼo tona ʼohoana, ko he vahe tahi ki te hogofulu ʼo he efa* falena olose ʼe tahi. Pea ʼe mole tonu anai ke ina liligi ki ai he moʼi lolo peʼe ʼai ki ai he iseso hina,* koteʼuhi ʼe ko he molaga meʼa kai ʼo ʼuhiga mo te maheka, ʼei, ko he molaga meʼa kai ʼe ina fakamanatuʼi he agahala.

16 “ ‘ ʼE fakatuʼu anai e te pelepitelo ia te fafine ia muʼa ʼo Sehova.+ 17 ʼE toʼo anai e te pelepitelo he ipu kele neʼe ʼai ai he moʼi vai taputapu, pea ʼe ina toʼo anai he moʼi efu mai te kele ʼae ʼe tuʼu ai te tapenakulo ʼo ʼai ki te moʼi vai ʼaia. 18 Pea ʼe fakatuʼu anai e te pelepitelo ia te fafine ia muʼa ʼo Sehova. ʼE veteki anai e te pelepitelo te lauʼulu ʼo te fafine pea ʼe ina ʼai anai ki ʼona nima te molaga meʼa kai ʼae ʼe ina fakamanatuʼi he agahala, ia te molaga meʼa kai ʼo ʼuhiga mo te maheka.+ Pea ʼe toʼo anai e te pelepitelo te vai kona ʼae ka hoko ai he tautea.*+

19 “ ‘Pea ʼe kole anai e te pelepitelo ki te fafine ke ina fai he fakapapau, ʼo ina ui age ki ai: “Kapau neʼe mole ke momoe mo he tahi age tagata kae kua ke ʼohoana,*+ ʼei, kapau neʼe mole ke agahala pea mo ʼulihi ia koe totonu, ʼe mole hoko anai he meʼa kia koe ʼi tau inu te vai kona, ʼae ʼe hoko ai he tautea.* 20 Kae kapau neʼe ke agahala kae kua ke ʼohoana ʼo ke ʼulihi ai ia koe totonu, ʼi tau momoe mo he tahi age tagata . . .”+ 21 ʼE kole anai e te pelepitelo ki te fafine ke ina fai he fakapapau.* Pea ʼe ui anai e te pelepitelo ki te fafine: “Ke fakamate noa e Sehova tou kauaga* pea mo fakamapula tou fatu, pea ke tuku e Sehova ke fakaʼaogaʼi e te hahaʼi tou higoa moka natou fai he ʼu fakapapau pea mo fakamalaʼia ki niʼihi. 22 ʼE ulu anai te vai ʼaeni ʼe hoko ai he tautea* ki tou gākau ʼo mapula ai tou fatu pea mo mate noa ai tou kauaga.”* Pea ʼe tali anai e te fafine: “Ameni! Ameni!”*

23 “ ‘Pea ʼe tohi anai e te pelepitelo te ʼu tautea ʼaia ʼi he tohi pea ʼe ina molehi anai ʼaki te vai kona ʼaia. 24 ʼE ina fakainu anai ki te fafine te vai ʼaia, pea ʼe ulu anai te vai ia ia ʼo mamahi ai. 25 Pea ʼe toʼo leva e te pelepitelo mai te ʼu nima ʼo te fafine ia te molaga meʼa kai ʼo ʼuhiga mo te maheka,+ ʼo ina lu ia muʼa ʼo Sehova, pea ʼe ina ʼaumai leva ʼo tuku ovi ki te ʼaletale. 26 ʼE toʼo anai e te pelepitelo he koga ʼo te molaga meʼa kai ʼaia, ʼo tutu ke kohu ʼi te ʼaletale.+ Ko he fakata ʼaia ʼo te molaga katoa. Pea hili ʼaia, ʼe ina fakainu anai ki te fafine te vai ʼaia. 27 ʼI te temi ʼae ʼe ina fakainu ai ki te fafine te vai ʼaia, ʼe hoko anai te meʼa ʼaeni: Kapau neʼe ʼulihi e te fafine ia ia totonu pea neʼe mole nofo agatonu ki tona ʼohoana, ʼe ulu anai ia ia te vai ʼae ʼe hoko ai he tautea* ʼo mamahi ai, pea ʼe mapula anai tona fatu pea mo mate noa tona kauaga,* pea ʼe fakaʼaogaʼi anai e te hahaʼi tona higoa moka natou fakamalaʼia ki niʼihi. 28 Kae kapau neʼe mole ʼulihi e te fafine ia ia totonu kae ʼe maʼa pe ia, ʼe hao anai mai te tautea ʼaia, pea ʼe feala anai ke maʼu fanau.

29 “ ‘ ʼE ko te lao ʼaia ʼo ʼuhiga mo te maheka,+ moka agahala he fafine pea neʼe ina ʼulihi ia ia totonu kae kua ʼohoana, 30 peʼe moka ʼe maheka he tagata pea mo mahalohalo neʼe mole nofo agatonu tona ʼohoana. ʼE ina ʼave anai tona ʼohoana kia muʼa ʼo Sehova pea ʼe mulimuli anai te pelepitelo ki te lao ʼaia. 31 ʼE mole lakahala anai te tagata, kae ʼe utu pe anai e tona ʼohoana te ʼu fua ʼo tana hala.’ ”