Numelo

8 Neʼe ui e Sehova kia Moisese: 2 “Ke ke ui age kia Alone: ‘Ka ke tutu anai te ʼu malama ʼae ʼe fitu ʼo te tuʼulaga malama, ʼe malamagia pe anai ia muʼa.’ ”+ 3 Koia neʼe fai ai e Alone te faʼahi ʼaeni: Neʼe ina tutu te ʼu malama ʼo te tuʼulaga malama ke malamagia ia muʼa,+ ohage pe ko tona fakatotonu e Sehova kia Moisese. 4 Neʼe faʼu fenei te tuʼulaga malama: Neʼe tuki te aulo moʼo fai ʼaki te tuʼulaga malama, mai tona sinoʼi malama ki ʼona fisiʼi teu.+ Neʼe faʼu te tuʼulaga malama ʼo mulimuli ki te meʼa+ ʼae neʼe fakaha age e Sehova kia Moisese.

5 Neʼe toe ui age e Sehova kia Moisese: 6 “Ke ke filifili te kau Levite mai te kau Iselaele, pea ke ke fakamaʼa natou.+ 7 Koʼeni te meʼa ʼae ʼe tonu ke ke fai ke fakamaʼa ai ia natou: Ke ke afuhi kia natou te vai ʼae ʼe ina fakamaʼa mai te agahala, pea ʼe natou tele anai tonatou sino katoa, mo fo ʼonatou teu, pea ʼe natou maʼa ai anai ia muʼa ʼo te ʼAtua.+ 8 Pea ʼe natou toʼo anai he vitulo kei mui+ pea mo he molaga meʼa kai+ ʼae ko te falena lelei neʼe natu ʼaki te lolo, pea ʼe ke toʼo anai he tahi vitulo kei mui ke momoli ohage ko he molaga ʼo te agahala.+ 9 ʼE ke ʼave anai te kau Levite ki te muʼa fale la ʼo te fono pea ʼe ke fakatahiʼi anai te kau Iselaele fuli.+ 10 Ka ke fakatuʼu anai te kau Levite ia muʼa ʼo Sehova, ʼe hili anai e te kau Iselaele ʼonatou nima ki te ʼu ʼulu ʼo te kau Levite.+ 11 Pea ʼe foaki* anai e Alone te kau Levite ohage ko he molaga+ ʼa te kau Iselaele ʼe lu ia muʼa ʼo Sehova, pea ʼe natou fakahoko anai te gaue ʼa Sehova.+

12 “Pea ʼe hili anai e te kau Levite ʼonatou nima ki te ʼu ʼulu ʼo te ʼu vitulo.+ ʼOsi ʼaia, pea ʼe momoli anai te tahi vitulo ohage ko he molaga ʼo te agahala pea ko te tahi age vitulo ohage ko he holokoseta kia Sehova, ke fakamolemole ai te ʼu agahala+ ʼa te kau Levite. 13 Pea ʼe ke fakatuʼu anai te kau Levite ia muʼa ʼo Alone mo ʼona foha, pea ʼe ke foaki anai ia natou ohage ko he molaga ʼe lu ia muʼa ʼo Sehova. 14 ʼE ke vaheʼi kehe anai te kau Levite mai te kau Iselaele, pea ʼe ʼaʼaku anai te kau Levite.+ 15 Hili ʼaia, ʼe ʼomai anai te kau Levite ʼo gaue ʼi te fale la ʼo te fono. ʼE feia anai tau fakamaʼa ia natou mo tau foaki ia natou ohage ko he molaga ʼe lu. 16 Koteʼuhi ko natou ʼaia neʼe toʼo mai te kau Iselaele pea kua foaki mai kia te au. ʼE au filifili anai ia natou maʼaku moʼo fetogi ʼaki te ʼu ʼuluaki tupu fuli ʼo te kau Iselaele.+ 17 Koteʼuhi ʼe ʼaʼaku te ʼu ʼuluaki tupu fuli ʼo te kau Iselaele, mai te tagata ki te manu.+ Pea neʼe au fakamaʼoniʼoniʼi ia natou maʼaku ʼi te ʼaho ʼae neʼe au matehi ai te ʼu ʼuluaki tupu fuli ʼo te fenua ʼo Esipito.+ 18 ʼE au filifili anai te kau Levite moʼo fetogi ʼaki te ʼu ʼuluaki tupu fuli ʼo te kau Iselaele. 19 ʼEi, ʼe au filifili anai te kau Levite mai te kau Iselaele pea ʼe au foaki anai natou kia Alone mo ʼona foha, ke natou fakahoko te gaue maʼa te kau Iselaele ʼi te fale la ʼo te fono,+ pea mo tokoni ki te gaue ʼae ʼe fai e te kau pelepitelo moʼo fakamolemole te ʼu agahala ʼa te kau Iselaele. Pea ʼe mole hoko ai anai he malaʼia ki te hahaʼi ʼo Iselaele+ ʼi tanatou fakaovi ki te koga meʼa taputapu.”

20 Neʼe fai e Moisese, mo Alone pea mo te kau Iselaele fuli te ʼu meʼa ʼaia ʼo ʼuhiga mo te kau Levite. Neʼe fai pe e te kau Iselaele ʼo mulimuli ki te ʼu meʼa fuli ʼae neʼe fakatotonu e Sehova kia Moisese ʼo ʼuhiga mo te kau Levite. 21 Neʼe fakamaʼa ai e te kau Levite ia natou totonu pea mo fo ʼonatou teu,+ pea hili ʼaia, neʼe foaki e Alone ia natou ohage ko he molaga ʼe lu ia muʼa ʼo Sehova.+ Neʼe momoli leva e Alone he molaga ke fakamolemole ai ʼanatou agahala pea ke natou maʼa ai.+ 22 Pea neʼe ʼomai leva te kau Levite ʼo fakahoko tanatou gaue ʼi te fale la ʼo te fono ia muʼa ʼo Alone mo ʼona foha. Neʼe fai pe e te hahaʼi te ʼu meʼa ʼae neʼe fakatotonu e Sehova kia Moisese ʼo ʼuhiga mo te kau Levite.

23 Pea neʼe ui e Sehova kia Moisese: 24 “Koʼeni te fakatuʼutuʼu ʼo ʼuhiga mo te kau Levite: Ko te ʼu tagata ʼae ʼe taʼu 25 ʼo fai ki ʼoluga, ʼe olo anai ʼo gaue fakatahi mo natou ʼae ʼe gaue ʼi te fale la ʼo te fono. 25 Kae ka kua natou taʼu 50, ʼe natou mavae anai mai ia natou ʼaia pea ʼe mole natou toe gaue anai ʼi ai. 26 ʼE feala pe anai hanatou tokoni ki ʼonatou tehina ʼae ʼe tokakaga ki te ʼu gaue ʼo te fale la ʼo te fono, kae ʼe mole tonu anai ke natou gaue ai. Ko te meʼa ʼaia ka ke fai anai ʼo ʼuhiga mo te kau Levite pea mo ʼanatou gaue.”+