Numelo

22 Neʼe mavae leva te kau Iselaele ʼo fakatuʼu tonatou nofoʼaga ʼi te toafa ʼo Moape, ʼi te tahi kauvai ʼo te Solotane, pea ʼe haga ki Seliko.+ 2 Pea neʼe sio ia Palaka,+ te foha ʼo Tesipoli ki te ʼu meʼa fuli ʼae neʼe fai e Iselaele ki te kau Amole. 3 Pea neʼe matataku ʼaupito te kau Moape ʼi te kau Iselaele, he neʼe natou kaugamalie ʼaupito. ʼEi, neʼe matataku mo fehihiʼa ʼaupito te kau Moape ia natou.+ 4 Koia, neʼe ui ai e te kau Moape ki te kau takitaki ʼo Matiane:+ “ ʼE maumauʼi anai e te hahaʼi ʼaeni te ʼu meʼa fuli ʼae ʼi ʼotatou tafaʼaki, ohage pe ko te kai e he vitulo te ʼu meʼa fuli ʼae ʼi he koga meʼa lunaʼia.”

Ko Palaka, te foha ʼo Tesipoli, neʼe ko te hau ʼo Moape ʼi te temi ʼaia. 5 Neʼe ina fekauʼi he ʼu tagata ʼave logo ke olo kia Palaame, te foha ʼo Peoli ʼi te kolo ko Petoli,+ ʼae neʼe ovi ki te Vai Tafe* pea neʼe tupu ai. Neʼe ina fekauʼi ke haʼu, ʼo ina ui age: “Kua mavae mai he hahaʼi mai Esipito pea kua natou ʼaofi te fuga kele katoa,+ pea ʼe natou nonofo ovi ʼosi mai ki toku fenua. 6 Koia, fakalelei siʼou loto, kae ke ke haʼu ʼo tokoni mai pea mo faitutuku ki te hahaʼi ʼaia,+ he ʼe natou malolohi age ia au. ʼE lagi feala anai ke au malo ia natou pea mo kapu natou ʼi toku fenua, he ʼe au iloʼi ka ke tapuakiʼi he tahi pea ʼe tapuakina moʼoni, pea ka ke faitutuku ki he tahi pea ʼe hoko moʼoni.”

7 Neʼe olo ai te kau takitaki ʼo Moape pea mo te kau takitaki ʼo Matiane mo te totogi ʼo te faitutuku.* Neʼe natou olo kia Palaame+ pea neʼe natou fakahoko age te ʼu palalau ʼa Palaka. 8 Neʼe ina tali age kia natou: “Kotou nonofo ʼi heni ʼi te po ʼaeni, pea ʼe au fakaha atu pe anai te meʼa ʼae ka ui mai anai e Sehova.” Neʼe nonofo ai te kau ʼaliki ʼo Moape io Palaame.

9 Neʼe ha leva te ʼAtua kia Palaame, ʼo ina ui age:+ “Ko ai te ʼu tagata ʼaeni ʼe nonofo io koe?” 10 Neʼe tali e Palaame ki te ʼAtua moʼoni: “Neʼe natou ʼomai mo te logo ʼaeni mai ia Palaka, te foha ʼo Tesipoli pea ko te hau ʼo Moape: 11 ‘Ko te hahaʼi ʼae neʼe mavae mai Esipito kua natou ʼaofi te fuga kele katoa. Koia, ke ke haʼu ʼo tokoni mai pea mo faitutuku kia natou.+ ʼE lagi feala anai ke au tauʼi mo kapu natou.’ ” 12 Kae neʼe ui e te ʼAtua kia Palaame: “ ʼE mole tonu ke ke alu mo natou. ʼE mole tonu ke ke faitutuku ki te hahaʼi ʼaia, he neʼe au tapuakiʼi natou.”+

13 ʼI te ʼaho ake, neʼe tuʼu ake ia Palaame ʼo ui age ki te kau ʼaliki ʼa Palaka: “Kotou toe liliu ki tokotou fenua, he neʼe mole tali e Sehova ke au alu mo koutou.” 14 Neʼe mavae ai te kau ʼaliki ʼo Moape, ʼo natou toe liliu kia Palaka. Pea neʼe natou ui age ki ai: “Neʼe mole fia haʼu ia Palaame mo matou.”

15 Kae neʼe toe fekauʼi e Palaka he kau ʼaliki ʼe kaugamalie age pea mo maʼuhiga age ia natou ʼae neʼe ʼuluaki olo, ke natou olo kia Palaame. 16 Neʼe natou olo ai kia Palaame pea neʼe natou ui age ki ai: “Koʼeni te meʼa ʼae ʼe ui e Palaka, te foha ʼo Tesipoli: ‘Fakalelei siʼou loto, ʼaua naʼa ke tuku he meʼa ke ina taʼofi tau haʼu, 17 koteʼuhi ʼe au fakapale lahi anai ia koe pea ʼe au fai pe anai te ʼu meʼa fuli ʼae ka ke ui mai. Koia, fakalelei siʼou loto, ke ke haʼu ʼo tokoni mai pea mo faitutuku ki te hahaʼi ʼaeni.’ ” 18 Kae neʼe tali e Palaame ki te ʼu tagata faifekau ʼa Palaka: “Tatau aipe pe ʼe foaki mai e Palaka tona fale ʼo ia totonu, ʼae ʼe fonu ai te siliva mo te aulo, kae ʼe mole feala anai ke au fai he meʼa ʼe mole alu tahi mo te fakatotonu ʼa Sehova, toku ʼAtua, pe ʼe veliveli peʼe lahi.+ 19 Kae, fakalelei siʼokotou ʼu loto, kotou nonofo ʼi heni ʼi te po ʼaeni, ke au iloʼi ai pe kotea te meʼa ka toe ui mai anai e Sehova.”+

20 Neʼe ha leva te ʼAtua kia Palaame ʼi te poʼuli, ʼo ina ui age ki ai: “Kapau neʼe ʼomai te ʼu tagata ʼaeni ʼo kumi koe, ke ke alu mo natou. Kae ʼe ke fakaha pe anai te ʼu palalau ʼae ka au ui atu.”+ 21 Koia, ʼi te ʼaho ake, neʼe tuʼu ake ai ia Palaame ʼo teuteuʼi tana asino* pea neʼe alu leva mo te kau ʼaliki ʼo Moape.+

22 Kae neʼe kovi ʼosi te ita ʼo te ʼAtua ʼi tana alu ʼaia. Neʼe tuʼu leva te ʼaselo ʼa Sehova ʼi te ala ʼo taʼofi tona fagona. Neʼe heka ia Palaame ʼi tana asino, pea neʼe alu mo ʼana tagata gaue ʼe toko lua. 23 ʼI te sio ʼa te asino ki te tuʼu ʼa te ʼaselo ʼa Sehova ʼi te ala mo he heleta ʼi tona nima, neʼe faiga ke mavae ʼi te ala ʼo alu ki te vao. Kae neʼe ta e Palaame te asino ke toe liliu mai ki te ala. 24 Neʼe alu leva te ʼaselo ʼa Sehova ʼo tuʼu ʼi he kiʼi ala faveliveli, ʼae ʼe alu ʼi te vaha ʼo te ʼu gaueʼaga vite ʼe lua. Pea neʼe ʼi ai te kaupa maka ʼi te ʼu kauala lua. 25 ʼI te sio ʼa te asino ki te ʼaselo ʼa Sehova, neʼe fakaovi ai ki te kaupa, ʼo ʼefihia ai te vaʼe ʼo Palaame. Neʼe toe ta leva e Palaame te asino.

26 Pea neʼe toe alu leva te ʼaselo ʼa Sehova ʼo tuʼu ʼi he faʼahi ʼe faveliveli, ʼo mole kei feala ai ke alu he tahi ki te faʼahi mataʼu peʼe ko te faʼahi hema. 27 ʼI te sio ʼa te asino ki te ʼaselo ʼa Sehova, neʼe takoto ai ki lalo. Neʼe kovi ʼosi ai te ita ʼo Palaame pea neʼe ina ta te asino ʼaki tana ʼakau. 28 Neʼe fakafealagia leva e Sehova ke palalau te asino,*+ pea neʼe ui e te asino kia Palaame: “Kotea ʼae neʼe au fai atu? He ʼe ko te tuʼa tolu ʼaeni ʼo tau ta au.”+ 29 Neʼe tali e Palaame ki te asino: “Neʼe ke gaohi au ohage he vale. Ka na neʼe ʼi ai haku heleta, ʼe au matehi nei ia koe!” 30 Pea neʼe ui e te asino kia Palaame: “ ʼE mole ko au koa la tau asino, ʼae neʼe ke hekaʼi tuʼumaʼu ʼo kaku mai ki te ʼaho nei? Pe neʼe kua au gaohi feiaʼi koa ia koe?” Neʼe ina tali age: “ ʼOho!” 31 Neʼe avahi leva e Sehova te ʼu mata ʼo Palaame,+ ʼo sio ai ki te tuʼu ʼa te ʼaselo ʼa Sehova ʼi te ala mo he heleta ʼi tona nima. Neʼe tuʼutuli ifo aipe mo tulolo ki te kele.

32 Pea neʼe ui e te ʼaselo ʼa Sehova kia ia: “He koʼe neʼe ke ta tau asino? He ʼe ko te tuʼa tolu ʼaeni ʼo tau haga ʼo ta. Neʼe au haʼu ʼo taʼofi koe, koteʼuhi ko te meʼa ʼae ʼe ke fai ʼe mole alu tahi mo toku finegalo.+ 33 Neʼe sio mai te asino pea neʼe faiga tuʼa tolu ke maliu kehe.+ Fakakaukauʼi age muʼa mo ka na pau la neʼe mole maliu kehe! ʼE mahino ia, neʼe au matehi koe kae au tuku te asino ke maʼuli.” 34 Neʼe ui e Palaame ki te ʼaselo ʼa Sehova: “Neʼe au agahala, he neʼe mole au iloʼi neʼe ke tuʼu ʼi te ala ke ta felaveʼi. Kapau ʼe mole ke leleiʼia ke au alu, pea ʼe au toe liliu pe anai.” 35 Kae neʼe ui e te ʼaselo ʼa Sehova kia Palaame: “Alu mo te ʼu tagata ʼaia, kae ʼe ke fakaha pe anai te ʼu meʼa ʼae ka au ui atu.” Neʼe alu ai ia Palaame mo te kau ʼaliki ʼa Palaka.

36 ʼI te logo ʼa Palaka ʼe haʼu ia Palaame, neʼe alu atu aipe ʼo fakafelaveʼi kia ia ʼi te kolo ʼo Moape, ʼae ʼe tuʼu ʼi te kauvai ʼo te Alenone ʼi te tuʼakoi ʼo te fenua. 37 Neʼe ui age e Palaka kia Palaame: “Neʼe mole koa la au fekauʼi he ʼu tagata ke olo atu ʼo kumi mai koe? He koʼe neʼe mole ke haʼu? Neʼe ke manatu koa ʼe mole feala anai haku fakapale lahi ia koe?”+ 38 Neʼe tali e Palaame kia Palaka: “Koʼeni, kua au haʼu. Kae ʼe mole feala anai ke au tala te meʼa ʼae ʼe au loto ki ai. ʼE au fakaha atu pe anai te meʼa ʼae ka ui mai e te ʼAtua.”+

39 Neʼe alu leva ia Palaame mo Palaka, pea neʼe nā tau leva ki Kiliate-usoti. 40 Neʼe sakilifisioʼi e Palaka he ʼu vitulo mo he ʼu ovi pea neʼe ina foaki he vahe kia Palaame pea mo te kau ʼaliki ʼae neʼe ʼomai mo ia. 41 ʼI te ʼaho ake, neʼe hake ia Palaka mo Palaame ki Pamoti-paale, ke lava sio mai ai ia Palaame ki te hahaʼi ʼo Iselaele.+