Numelo
23 Neʼe ui leva e Palaame kia Palaka: “Ke ke laga ʼi te koga meʼa ʼaeni he ʼu ʼaletale ʼe fitu,+ pea ke teuteuʼi maʼaku he ʼu vitulo ʼe fitu mo he ʼu ovi tagata ʼe fitu.” 2 Neʼe fai atu aipe e Palaka te meʼa ʼae neʼe ui age e Palaame. Pea neʼe momoli e Palaka mo Palaame he vitulo ʼe tahi mo he ovi tagata ʼe tahi ʼi te ʼu ʼaletale takitahi ʼaia.+ 3 Pea neʼe ui e Palaame kia Palaka: “Nofo ʼi heni ʼo ovi ki tau holokoseta, kae au alu muʼa. ʼE lagi felogoi anai ia Sehova mo au. Pea ko he meʼa pe ʼe ina fakaha mai, ʼe au tala atu anai.” Neʼe alu ai ki te tumutumu ʼo he kiʼi moʼuga.
4 Pea neʼe felogoi leva ia te ʼAtua mo Palaame,+ pea neʼe ui age e Palaame kia te Ia: “Neʼe au fakatuʼu he ʼu ʼaletale ʼe fitu ʼo fakaʼatu, pea neʼe au momoli he vitulo ʼe tahi mo he ovi tagata ʼe tahi ʼi te ʼu ʼaletale takitahi ʼaia.” 5 Pea neʼe fakaha e Sehova kia Palaame te ʼu palalau ʼae ʼe tonu anai ke ina tala.+ Hili ia, neʼe ina ui age leva: “Toe liliu kia Palaka, pea ʼe ko te ʼu palalau ʼaia ʼe tonu anai ke ke fakaha.” 6 Neʼe toe liliu ai pea neʼe sio kia Palaka mo te kau ʼaliki fuli ʼo Moape neʼe tutuʼu ovi ki tana holokoseta. 7 Neʼe ina tala leva te logo ʼaeni:+
“Neʼe ʼaumai au e Palaka, te hau ʼo Moape mai Alame,+
Mai te ʼu moʼuga ʼo te potu esite. Neʼe ina ui mai:
‘Haʼu ʼo tokoni mai pea ke faitutuku kia Sakopo.
ʼEi, haʼu ʼo tauteaʼi ia Iselaele.’+
8 ʼE lava feafeaʼi haku fakamalaʼia ia natou ʼae neʼe mole fakamalaʼia e te ʼAtua?
Pea ʼe au lava tauteaʼi feafeaʼi ia natou ʼae neʼe mole tauteaʼi e Sehova?+
9 ʼE au sio kia natou mai te tumutumu ʼo te ʼu fuʼu maka,
Pea ʼe au sio kia natou mai te ʼu kiʼi moʼuga.
10 Ko ai ʼae ʼe feala ke ina lau te hologa ʼo Sakopo+ ʼae ʼe kaugamalie ohage ko te efu ʼo te kele,
Peʼe ke ina lau pe la te vahe tahi ki te fa ʼo Iselaele?
Ke au mate ohage ko te mate ʼa te kau faitotonu,
Pea ke hage te fakaʼosi ʼo toku maʼuli ko te fakaʼosi ʼo tonatou maʼuli.”
11 Neʼe ui leva e Palaka kia Palaame: “He koʼe neʼe ke fai te faʼahi ʼaia kia au? Neʼe au ʼaumai koe ke ke faitutuku ki ʼoku fili, kae koʼeni ia kua ke tapuakiʼi koe ia natou.”+ 12 Neʼe ina tali: “ ʼE tonu ke au fakaha atu te ʼu palalau ʼae ʼe tala mai e Sehova.”+
13 Neʼe ui e Palaka kia ia: “Fakalelei siʼou loto, haʼu mo au ki he tahi age koga meʼa, pea ʼe feala anai ke ke sio mai ai kia natou. ʼE ke sio pe anai ki ʼihi, kae mole ko natou fuli. Pea ke ke faitutuku mai ai kia natou.”+ 14 Neʼe ina ʼave ai ia ia ki te moʼi kele ʼo Sofimi, ʼae ʼi te koga meʼa maʼoluga ʼo Pisika.+ Neʼe ina laga ai he ʼu ʼaletale ʼe fitu pea neʼe ina momoli he vitulo ʼe tahi mo he ovi tagata ʼe tahi ʼi te ʼu ʼaletale takitahi ʼaia.+ 15 Pea neʼe ui e Palaame kia Palaka: “Ke ke nofo ʼi heni ʼo ovi ki tau holokoseta, kae au alu ʼo felogoi mo te ʼAtua ʼi he age.” 16 Pea neʼe felogoi ia Sehova mo Palaame, ʼo ina fakaha age te ʼu palalau ʼae ʼe tonu anai ke ina tala.+ Hili ia, neʼe ina ui age leva: “Toe liliu kia Palaka, pea ʼe ko te ʼu palalau ʼaia ʼe tonu anai ke ke fakaha.” 17 Neʼe toe liliu ai pea neʼe sio ki tana fakatalitali ʼo ovi ki tana holokoseta, pea neʼe fakatahi mo ia te kau ʼaliki ʼo Moape. Neʼe fehuʼi age e Palaka ki ai: “Kotea ʼae neʼe ui atu e Sehova?” 18 Pea neʼe ina tala leva te logo ʼaeni:+
“Palaka, tuʼu ake pea ke fakalogo.
Foha ʼo Tesipoli, fakalogo mai.
19 ʼE mole hage te ʼAtua ko te tagata, ʼae ʼe loi,+
Ka ina tala he meʼa, ʼe mole ina fai anai koa?
Ka ina fai he fakapapau, ʼe mole ina fakahoko anai koa?+
20 Koʼeni, neʼe au haʼu ko te tapuakiʼi ʼo te hahaʼi ʼaeni,
Kae neʼe Ina tapuakiʼi natou,+ pea ʼe mole feala ke au fetogi.+
21 ʼE mole ina tali ke fakaʼaogaʼi te malohi fakamanamana kia Sakopo,
Pea ke fai he meʼa ʼe kovi ki Iselaele.
ʼE nofo ia Sehova tonatou ʼAtua mo natou,+
Pea ʼe natou vikiʼi leʼo lahi he ʼe ko tonatou hau.
22 ʼE fakamavae natou e te ʼAtua mai Esipito.+
ʼE tokoni tona mafimafi kia natou ohage ko te ʼu tala ʼo he vitulo ʼo te vao.+
23 Koia, ʼe mole feala ke fai he meʼa fakatemonio kia Sakopo,+
Pea mo he ʼu faifakakikite fakatemonio ki Iselaele.+
ʼI te temi ʼaeni, ʼe feala ke ui ʼo ʼuhiga mo Sakopo pea mo Iselaele:
‘Kotou sisio ki te meʼa ʼae neʼe fai e te ʼAtua!’
24 Koʼeni he hahaʼi ʼe tuʼu ake anai ohage ko he laione,
ʼEi, ʼe malaga ake anai ohage ko te laione.+
ʼE hoki takoto anai moka kua ina ʼosi kai te manu ʼae neʼe ina puke
Pea mo inu te toto ʼo te ʼu manu ʼae neʼe tamateʼi.”
25 Neʼe ui leva e Palaka kia Palaame: “Kapau ʼe mole feala ke ke faitutuku kia natou, pea ʼe mole tonu ke ke tapuakiʼi natou.” 26 Kae neʼe tali e Palaame kia Palaka: “Neʼe mole au ui atu koa la: ‘ ʼE au fai anai te ʼu meʼa fuli ʼae ʼe tala mai e Sehova’?”+
27 Neʼe ui e Palaka kia Palaame: “Fakalelei siʼou loto, haʼu mo au ke au toe ʼave koe ki he tahi age koga meʼa. ʼE lagi tali anai e te ʼAtua moʼoni ke ke faitutuku mai ai kia natou.”+ 28 Neʼe ʼave ai e Palaka ia Palaame ki te koga meʼa maʼoluga ʼo Peole, ʼae ʼe kita sio ai ki Sesimone.*+ 29 Pea neʼe ui leva e Palaame kia Palaka: “Ke ke laga he ʼu ʼaletale ʼe fitu ʼi te koga meʼa ʼaeni, pea ke teuteuʼi maʼaku he ʼu vitulo ʼe fitu mo he ʼu ovi tagata ʼe fitu.”+ 30 Neʼe fai ai e Palaka te meʼa ʼae neʼe ui age e Palaame, pea neʼe ina momoli he vitulo ʼe tahi mo he ovi tagata ʼe tahi ʼi te ʼu ʼaletale takitahi ʼaia.